ഭാര്യയുടെ പിറന്നാൾ പാർട്ടിയ്ക്കിടെ തർക്കം; വിരുന്നിനെത്തിയ സുഹൃത്തിനെ യുവാവ് കഴുത്തറുത്ത് കൊന്നു

ഗസിയാബാദ്: പിറന്നാള്‍ പാര്‍ട്ടിയ്ക്കിടെ സുഹൃത്തുക്കള്‍ തമ്മിലുണ്ടായ തര്‍ക്കം കലാശിച്ചത് യുവാവിൻ്റെ കൊലപാതകത്തിൽ. യുപി സ്വദേശിയായ നിഷാന്ത് ചൗധരി (24)യാണ് കൊല്ലപ്പെട്ടത്. ഇദ്ദേഹത്തിൻ്റെ സുഹൃത്തായ മുദിത് നിഷാന്തിനെ കഴുത്തറുത്ത് കൊലപ്പെടുത്തുകയായിരുന്നുവെന്നാണ് കേസ്.



ഭാങ്കൽ സ്വദേശിയായ പ്രതി നോയിഡയിലെ ഒരു സ്വകാര്യ കമ്പനിയിലാണ് ജോലി ചെയ്യുന്നത്. ശനിയാഴ്ച മുദിതിൻ്റെ ഭാര്യയുടെ പിറന്നാള്‍ ആഘോഷത്തിനിടെയായിരുന്നു സംഭവം. പാര്‍ട്ടിയ്ക്കായി ചില സുഹൃത്തുക്കളെയും അയൽക്കാരെയും മുദിത് വീട്ടിലേയ്ക്ക് വിളിച്ചിരുന്നു. എന്നാൽ ഇതിനിടെ മുദിതും നിഷാന്തും തമ്മിൽ തര്‍ക്കമുണ്ടാകുകയായിരുന്നു. വാക്കുതര്‍ക്കം സംഘട്ടനത്തിലെത്തുകയും മുദിത് കത്തി ഉപയോഗിച്ച് നിഷാന്തിൻ്റെ കഴുത്തറുക്കുകയുമായിരുന്നു. സംഭവം നടന്ന ഉടൻ തന്നെ ഇയാള്‍ സ്ഥലത്തു നിന്നു കടന്നു. ഗുരുതരമായ പരിക്കുകളോടെ നിഷാന്തിനെ ആശുപത്രിയിൽ പ്രവേശിപ്പിച്ചെങ്കിലും ഇയാള്‍ ഞായറാഴ്ച മരണപ്പെടുകയായിരുന്നു.

Also Read: വരും ദിവസങ്ങളിൽ അതിശക്തമായ മഴയ്ക്ക് സാധ്യത; വിവിധ ജില്ലകളിൽ ഓറഞ്ച്, യെല്ലോ അലേർട്ട്

സംഭവത്തെപ്പറ്റി ഡോക്ടര്‍മാരാണ് പോലീസിൽ വിവരമറിയിച്ചത്. മരിച്ച യുവാവിൻ്റെ പോസ്റ്റ്‍‍മോര്‍ട്ടം റിപ്പോര്‍ട്ട് ഇതുവരെയും ലഭിച്ചിട്ടില്ലെന്നാണ് ടൈംസ് ഓഫ് ഇന്ത്യ റിപ്പോര്‍ട്ട്. പോസ്റ്റ് മോര്‍ട്ടം നടപടികള്‍ക്കു ശേഷം മൃതദേഹം ബന്ധുക്കള്‍ക്ക് വിട്ടുകൊടുത്തതായി പോലീസ് അറിയിച്ചു.

Also Read: ഇന്ത്യ കൊവിഡിൻ്റെ ‘എൻഡമിക് ഘട്ട’ത്തിൽ; ലോകാരോഗ്യ സംഘടനാ വിദഗ്ധ പറഞ്ഞതെന്ത്?

പരാതിയുടെ അടിസ്ഥാനത്തിൽ മുദിതിനെതിരെ കൊലപാതകക്കുറ്റത്തിനാണ് പോലീസ് കേസെടുത്തിട്ടുള്ളത്. പ്രതിയെ അറസ്റ്റ് ചെയ്തതായി ഡിസിപി ഹരീഷ് ഹന്ദര്‍ അറിയിച്ചു. ഇയാള്‍ നഗരത്തിൽ നിന്ന് രക്ഷപെടാൻ ശ്രമിക്കുകയായിരുന്നുവെന്നും എന്നാൽ ബസ് സ്റ്റാൻഡിൽ വെച്ച് ഇയാളെ കണ്ടെത്തി അറസ്റ്റ് ചെയ്തതായും പോലീസ് അറിയിച്ചു. കൊലപാതകത്തിന് ഉപയോഗിച്ച കത്തിയും പോലീസ് കണ്ടെടുത്തിട്ടുണ്ട്. കൊല്ലപ്പെട്ട യുവാവിൻ്റെ അച്ഛൻ്റെ പരാതിയിലാണ് കേസെടുത്തിട്ടുള്ളത്.

പ്രതിയും കൊല്ലപ്പെട്ട യുവാവും തമ്മിൽ ഒന്നര വര്‍ഷമായി പരിചയമുണ്ടെന്നാണ് യുവാവിൻ്റെ അച്ഛൻ പറയുന്നത്. ഇരുവരും ഒരേ സ്ഥാപനത്തിലായിരുന്നു ജോലി ചെയ്തിരുന്നത്. പാര്‍ട്ടി കഴിഞ്ഞു തിരിച്ചെത്താൻ വൈകുമെന്ന് നിഷാന്ത് അറിയിച്ചിരുന്നു. എന്നാൽ മകൻ ആക്രമിക്കപ്പെട്ട വിവരം സുഹൃത്തുക്കളും പോലീസും പറഞ്ഞാണ് അറിയുന്നതെന്നും അദ്ദേഹം വ്യക്തമാക്കി.