രാജ്യത്തെ ആകെ ജനസംഖ്യയുടെ 80.5 ശതമാനം പേര്‍ ഒരു ഡോസും 70.8 ശതമാനം പേര്‍ രണ്ട് ഡോസും എടുത്തതായി ആരോഗ്യ മന്ത്രാലയം അറിയിച്ചു. ജനസംഖ്യാനുപാതിക വാക്‌സിനേഷന്റെ കാര്യത്തില്‍ ലോകത്ത് രണ്ടാം സ്ഥാനത്താണ് ഖത്തര്‍.
പ്രതിരോധ ശേഷി കുറഞ്ഞവര്‍ക്ക് ബൂസ്റ്റര്‍ ഡോസ്
അതിനിടെ, രോഗപ്രതിരോധ ശേഷി കുറഞ്ഞ വിഭാഗങ്ങള്‍ക്ക് ബൂസ്റ്റര്‍ ഡോസായി മൂന്നാം ഡോസ് വാക്സിന്‍ നല്‍കാന്‍ ഖത്തര്‍ ആരോഗ്യ മന്ത്രാലയം അനുമതി നല്‍കി. ഫൈസര്‍, മൊഡേണ വാക്സിനുകളാണ് മൂന്നാം ഡോസായി നല്‍കുക. യുഎസ് ഫുഡ് ആന്റ് ഡ്രഗ് അഡ്മിനിസ്ട്രേഷന്റെയും യുഎസ് സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്റെയും അംഗീകാരത്തിന്റെ അടിസ്ഥാനത്തിലാണ് തീരമാനം. ലോകത്തിന്റെ വിവിധ ഭാഗങ്ങളില്‍ നടക്കുന്ന ഗവേഷണ ഫലങ്ങളില്‍ ബൂസ്റ്റര്‍ ഡോസ് കൊവിഡിന്റെ പുതിയ വകഭേദങ്ങളെ പ്രതിരോധിക്കാന്‍ പര്യാപ്തമാണെന്ന് കണ്ടെത്തുകയും ചെയ്തിരുന്നു.
ആദ്യഘട്ടത്തില്‍ ബൂസ്റ്റര്‍ നല്‍ക്കുന്നവര്‍
രോഗ പ്രതിരോധ ശേഷി കുറയ്ക്കുന്ന രീതിയിലുള്ള രോഗങ്ങളും ശാരീരിക പ്രശ്‌നങ്ങളും അനുഭവിക്കുന്ന വിഭാഗങ്ങള്‍ക്കാണ് ആദ്യഘട്ടത്തില്‍ ബൂസ്റ്റര്‍ ഡോസ് നല്‍കുക. സാധാരണ രോഗ പ്രതിരോധ ശേഷിയുളളവര്‍ രണ്ട് ഡോസ് വാക്സിന്‍ സ്വീകരിച്ചാല്‍ ലഭിക്കുന്നതു പോലുള്ള പ്രതിരോധ ശേഷി ഇവര്‍ക്ക് കൈവരിക്കാന്‍ സാധിക്കില്ലെന്ന കണ്ടെത്തിലിന്റെ അടിസ്ഥാനത്തിലാണിത്. പ്രതിരോധ ശേഷി കുറഞ്ഞ വിഭാഗങ്ങള്‍ക്ക് കൊവിഡ് ബാധിച്ചാല്‍ ഗുരുതരവും നീണ്ടുനില്‍ക്കുന്നതുമായ ആരോഗ്യ പ്രശ്നങ്ങളുണ്ടാവാനുള്ള സാധ്യതയും ഏറെയാണ്. ഇവര്‍ക്ക് കൊവിഡ് വൈറസിനെതിരെ മതിയായ സംരക്ഷണം ലഭിക്കുന്നുണ്ടെന്ന് ഉറപ്പുവരുത്തുന്നതിനാണ് അധിക ഡോസ് വാക്സിന്‍ നല്‍കുന്നതെന്നും മന്ത്രാലയം വ്യക്തമാക്കി.
ബൂസ്റ്റര്‍ ഡോസിന് അര്‍ഹതയുള്ള വിഭാഗങ്ങള്‍
– ട്യൂമര്‍, രക്താര്‍ബുദം തുടങ്ങി നിലവില്‍ കാന്‍സര്‍ ചികിത്സയ്ക്ക് വിധേയരാകുന്ന വ്യക്തികള്‍.
– അവയവമാറ്റ ശസ്ത്രക്രിയക്ക് വിധേയരാവുകയും രോഗപ്രതിരോധം കുറയ്ക്കുന്ന മരുന്നുകള്‍ ഉപയോഗിക്കുകയും ചെയ്യുന്നവര്‍.
– കഴിഞ്ഞ രണ്ട് വര്‍ഷത്തിനുള്ളില്‍ സ്റ്റെം സെല്‍ മാറ്റിവയ്ക്കലിന് വിധേയരാവരോ പ്രതിരോധശേഷി കുറയ്ക്കുന്ന മരുന്നുകള്‍ ഉപയോഗിക്കുന്നവരോ ആയ വ്യക്തികള്‍.
– മിതമോ കഠിനമോ ആയ പ്രാഥമിക രോഗപ്രതിരോധ ശേഷിക്കുറവ് നേരിടുന്ന വ്യക്തികള്‍. ഉദാഹരണമായി ഡീജോര്‍ജ് സിന്‍ഡ്രോം, വിസ്‌കോട്ട്-ആല്‍ഡ്രിച്ച് സിന്‍ഡ്രോം തുടങ്ങിയവ ബാധിച്ചവര്‍.
ഈ കാര്യങ്ങള്‍ ശ്രദ്ധിക്കുക
– ഹ്യൂമന്‍ ഇമ്മ്യൂണോ ഡെഫിഷ്യന്‍സി വൈറസ് (എച്ച്ഐവി) ബാധയുള്ളവര്‍
– നിലവില്‍ ഉയര്‍ന്ന അളവില്‍ കോര്‍ട്ടികോസ്റ്റിറോയിഡുകള്‍ കഴിക്കുന്നവര്‍, ട്യൂമര്‍ നെക്രോസിസ് ഫാക്ടര്‍ (ടിഎന്‍എഫ്) ബ്ലോക്കറുകള്‍ക്കുള്ള മരുന്നുകള്‍ കഴിക്കുന്നവര്‍
– അസ്പ്ലെനിയ, വൃക്കരോഗം തുടങ്ങിയ അവസ്ഥകളുള്ള വ്യക്തികള്‍.
ഇവര്‍ തൊട്ടടുത്ത പ്രൈമറി ഹെല്‍ത്ത് കെയര്‍ കോര്‍പറേഷനിലോ ഹമദ് മെഡിക്കല്‍ കോര്‍പറേഷനിലെ ബന്ധപ്പെട്ട ചികില്‍സാ വിഭാഗങ്ങളോ രജിസ്റ്റര്‍ ചെയ്ത് മൂന്നാം ഡോസ് സ്വീകരിക്കേണ്ടതാണെന്ന് ആരോഗ്യ മന്ത്രാലയം അറിയിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : 20 lakh people fully vaccinated in qatar
Malayalam News from malayalam.samayam.com, TIL Network
