കാബൂൾ: അഫ്ഗാനിസ്ഥാൻ തലസ്ഥാനമായ കാബൂളിലെ വിമാനത്താവളത്തിന് മുന്നിലുണ്ടായ ചാവേര്‍ സ്ഫോടനങ്ങളിൽ കൊല്ലപ്പെട്ടവരുടെ എണ്ണം 72 ആയതായി റിപ്പോര്‍ട്ട്. 143 പേര്‍ക്ക് പരിക്കേറ്റു. ആക്രമണത്തിന്റെ ഉത്തരവാദിത്തം ഇസ്ലാമിക് സ്റ്റേറ്റ് ഏറ്റെടുത്തു.



വ്യാഴാഴ്ച വൈകിട്ട് തുടര്‍ച്ചയായി രണ്ട് സ്ഫോടനമാണ് വിമാനത്താവളത്തിന് മുന്നിലുണ്ടായത്. 12 അമേരിക്കൻ സൈനികരും 11 നാവികരും കൊല്ലപ്പെട്ടവരിൽ ഉള്‍പ്പെടുന്നു. അതേസമയം, കൊല്ലപ്പെട്ടവരിൽ താലിബാൻകാരുമുണ്ടെന്ന് വാര്‍ത്താക്കുറിപ്പിൽ വ്യക്തമാക്കി.

ഉത്തരവാദിത്തം ഏറ്റെടുത്ത് ഐഎസ്

ഇസ്ലാമിക് സ്റ്റേറ്റ് ആക്രമണത്തിന്റെ ഉത്തരവാദിത്തം ഏറ്റെടുത്ത് രംഗത്തുവന്നിട്ടുണ്ട്. ചാവേര്‍ ഭീകരന്റെ ചിത്രവും ഇവര്‍ പുറത്തുവിട്ടിട്ടുണ്ട്. നേരത്തെ ആക്രമണത്തിന് പിന്നിൽ ഐഎസ് ആണെന്ന് താലിബാനും രഹസ്യാന്വേഷണ ഏജൻസികളും ആരോപിച്ചിരുന്നു. പ്രദേശത്ത് ഇനിയും സമാനമായ രീതിയിൽ സ്ഫോടനമുണ്ടാകുവാന്‍ സാധ്യതയുണ്ടെന്നും മുന്നറിയിപ്പ് നൽകിയിട്ടുണ്ട്. നേരത്തെ ഒരു ഐഎസ് ഭീകരനെ താലിബാൻ വിമാനത്താവളത്തിന് സമീപം അറസ്റ്റ് ചെയ്തിരുന്നതായി താലിബാൻ അറിയിച്ചു. ആക്രമണം നടക്കാനിടയുണ്ടെന്നും മുന്നറിയിപ്പ് നൽകിയിരുന്നു.

ഐഎസിനോട് ക്ഷമിക്കില്ലെന്ന് ബൈഡൻ

രക്ഷാദൗത്യം പുരോഗമിക്കുന്നതിനിടെ കാബൂൾ വിമാനത്താവളത്തിന് സമീപമുണ്ടായ സ്ഫോടനത്തിന് അക്രമികള്‍ കനത്ത വില നൽകേണ്ടി വരുമെന്ന് മുന്നറിയിപ്പുമാണ് നൽകി അമേരിക്കൻ പ്രസിഡന്റ് ജോ ബൈഡൻ. ഭീകരവാദ വേട്ടയിലൂടെ തിരിച്ചടിക്കുമെന്നും പ്രസിഡന്റ് വ്യക്തമാക്കി. ഐഎസ് പരാജയപ്പെടുമെന്നും അഫ്ഗാനിൽ നിന്നുള്ള ഒഴിപ്പിക്കൽ ഓഗസ്റ്റ് 31ന് പൂര്‍ത്തിയാക്കുമെന്നും യുഎസ് പ്രസിഡന്റ് വ്യക്തമാക്കി. 1,500 ഓളം അമേരിക്കൻ പൗരന്മാര്‍ അഫ്ഗാന്റെ വിവിധ മേഖലകളില്‍ കുടുങ്ങിക്കിടക്കുന്നതായും റിപ്പോര്‍ട്ടുണ്ട്.

ഐഎസും താലിബാനും

അഫ്ഗാനിസ്ഥാനിലെ ഖോരാസൻ പ്രവശ്യയിൽ പ്രവര്‍ത്തിക്കുന്ന ഇസ്ലാമിക് സ്റ്റേറ്റ് ഖൊറേസാൻ യഥാര്‍ത്ഥ ഭീകര സംഘടനയുടെ പ്രാദേശിക പതിപ്പാണ്. ഇവരാണ് പാകിസ്ഥാനിലും അഫ്ഗാനിസ്ഥാനിലും പ്രവര്‍ത്തനങ്ങള്‍ നടത്തുന്നത്. ഐഎസ് – ഖൊറേസാൻ എന്നതിന്റെ ചുരുക്കപ്പേരാണ് ഐഎസ്-കെ. അഫ്ഗാനിസ്ഥാനിൽ നിന്നും ഒഴിപ്പിക്കൽ പ്രക്രിയ അലങ്കോലമാക്കി പ്രതിസന്ധിയുണ്ടാക്കുക എന്നതാണ് ഐഎസിന്റെ ശ്രമം. അതിനാൽ തന്നെ ഇത്തരത്തിൽ ഒരു ആക്രമണം ഉണ്ടായേക്കുമെന്ന് അമേരിക്കയും താലിബാനും അടക്കം നേരത്തെ റിപ്പോര്‍ട്ട് ചെയ്തിരുന്നു.

ആക്രമണത്തിന് പിന്നിൽ ഐഎസ് -കെ

ഈ ഭീകരസംഘടന തന്നെയാണ് കാബൂൾ വിമാനത്താവളത്തിലെ ചാവേര്‍ സ്ഫോടനത്തിന് പിന്നില്‍. കഴിഞ്ഞ ഏതാനും വര്‍ഷങ്ങളായി വിവിധ ഭാഗങ്ങളിലായി ആക്രമണം നടത്തുന്ന സംഘമാണ് ഇസ്ലാമിക് സ്റ്റേറ്റ്. പെൺകുട്ടികള്‍ പഠിക്കുന്ന സ്കൂളുകള്‍, ആശുപത്രികള്‍ എന്നിവിടങ്ങളിലടക്കം ഇവര്‍ ആക്രമണം നടത്തിയിട്ടുണ്ട്. ആശുപത്രിയിലെ പ്രസവ വാര്‍ഡിൽ കടന്ന് ഗര്‍ഭിണികളേയും നഴ്സുമാരേയും കൂട്ടക്കുരുതി നടത്തിയതായും ബിബിസി അടക്കമുള്ള മാധ്യയമങ്ങള്‍ റിപ്പോര്‍ട്ട് ചെയ്തിരുന്നു. താലിബാന് പുറമെ, അഫ്ഗാന്‍ മണ്ണിൽ നോട്ടമുള്ള മറ്റൊരു ഭീകരസംഘടനയാണ് ഐഎസ്.

ഐഎസ് താലിബാൻ ബന്ധം

അമേരിക്കയുടെ പിന്മാറ്റത്തോടെ അഫ്ഗാൻ മണ്ണിൽ ഇസ്ലാമിക തീവ്രവാദ സംഘടനയായ ഐഎസും താലിബാനും ശക്തി പ്രാപിച്ചു വരികയാണ്. ഇരു കൂട്ടരും കര്‍ശന സുന്നി ഇസ്ലാമിക ഭീകരവാദികളും ജിഹാദിന്റെ യഥാര്‍ത്ഥ പതാക വാഹകരാണെന്നും അവകാശപ്പെടുന്നവരാണ്. ആശയപരമായി ചെറിയ വിത്യാസങ്ങളില്‍ ശത്രുക്കളാണ് ഇവര്‍. നേരത്തെ ദോഹയിൽ വച്ച് താലിബാനും അമേരിക്കയും കരാര്‍ ഒപ്പുവച്ചതിൽ ഐഎസ് കടുത്ത എതിര്‍പ്പ് അറിയിച്ചിരുന്നു. താലിബാൻ കാബൂൾ കീഴടക്കിയതിന് ശേഷം മറ്റ് ജിഹാദി ഗ്രൂപ്പുകളില്‍ നിന്നും വ്യത്യസ്ഥമായി ഇസ്ലാമിക് സ്റ്റേറ്റ് വിമതരെ അഭിനന്ദിച്ച് രംഗത്തുവന്നില്ലെന്നതും ശ്രദ്ധേയമാണ്.