മൈസൂരു കൂട്ടബലാത്സംഗം: നാലു പ്രതികള്‍ തമിഴ്നാട്ടിൽ നിന്ന് അറസ്റ്റിൽ

മൈസൂരു: കര്‍ണാടകയിലെ വനപ്രദേശത്ത് സുഹൃത്തിനൊപ്പം ബൈക്കിൽ സഞ്ചരിച്ച യുവതിയെ കൂട്ടബലാത്സംഗം ചെയ്ത കേസിൽ നാലു പേരെ കര്‍ണാടക പോലീസ് അറസ്റ്റ് ചെയ്തതായി റിപ്പോര്‍ട്ട്. തമിഴ്നാട്ടിൽ നിന്നാണ് പ്രതികളെ അറസ്റ്റ് ചെയ്തതെന്നാണ് ഏഷ്യാനെറ്റ് ന്യൂസ് റിപ്പോര്‍ട്ട്. ഇതുസംബന്ധിച്ച കൂടുതൽ വിവരങ്ങള്‍ ലഭ്യമായിട്ടില്ല.



മഹാരാഷ്ട്ര സ്വദേശിനിയായ യുവതി ഗുരുതരാവസ്ഥയിൽ ചികിത്സയിൽ തുടരുകയാണ്. യുവതിയുടെ ആരോഗ്യനിലയിൽ ചെറിയ പുരോഗതിയുണ്ട്. ഇതുവരെ പോലീസ് യുവതിയുടെ മൊഴി രേഖപ്പെടുത്തിയിട്ടില്ല. കഴിഞ്ഞ വ്യാഴാഴ്ചയാണ് വിനോദസഞ്ചാരകേന്ദ്രമായ ചാമുണ്ഡിയിൽ സുഹൃത്തിനൊപ്പമെത്തിയ യുവതി ക്രൂരമായി ആക്രമിക്കപപെട്ടത്. മലടയിവാരത്തെ പാറക്കെട്ടിൽ സുഹൃത്തിനൊപ്പം ഇരുന്നു സംസാരിക്കുകയായിരുന്നു യുവതിയെ ആറംഗ സംഘം കൂട്ടലബലാത്സംഗം ചെയ്യുകയായിരുന്നു. മഹാരാഷ്ട്ര സ്വദേശികളായ യുവാവിനോടും യുവതിയോടും സംഘം പണം ആവശ്യപ്പെട്ടെങ്കിലും ഇവർ നൽകാൻ തയ്യാറായില്ല. തുടർന്നായരുന്നു പീഡനം. പ്രതികൾ പീഡനദൃശ്യങ്ങൾ മൊബൈൽ ക്യാമറയിൽ പകർത്തിയതായും ദൃശ്യങ്ങൾ പുറത്തു വിടാതിരിക്കാൻ പണം ആവശ്യപ്പെട്ടതായും യുവാവ് മൊഴി നൽകിയിട്ടുണ്ട്.

പ്രദേശവാസികളായ മദ്യപസംഘമാണ് ആക്രമണത്തിനു പിന്നിലെന്നായിരുന്നു പോലീസ് കരുതിയിരുന്നതെങ്കിലും പ്രദേശത്തു നിന്ന് ചിലരെ കസ്റ്റഡിയിലെടുത്ത് ചോദ്യം ചെയ്തതോടെ ആക്രമണത്തിനു പിന്നിൽ പുറത്തു നിന്നുള്ളവരാണെന്നു വ്യക്തമാകുകയായിരുന്നു. ക്രൂരമര്‍ദ്ദനത്തിന് ഇരയായ യുവതിയുടെ സുഹൃത്തിൻ്റെ മൊഴിയുടെ അടിസ്ഥാനത്തിലാണ് പോലീസ് അന്വേഷണം നടത്തിയത്. മൊബൈൽ ഫോൺ സിഗ്നലുകള്‍ കേന്ദ്രീകരിച്ചു നടത്തിയ അന്വേഷണത്തിൽ സംഭവദിവസം പുറത്തു നിന്നുള്ള ചിലര്‍ എവിടെയെത്തിയതായി പോലീസ് കണ്ടെത്തിയിരുന്നു. യുവതിയുടെ സുഹൃത്തിൻ്റെ മൊഴിയുടെ അടിസ്ഥാനത്തിൽ കേരളത്തിലേയ്ക്കും തമിഴ്നാട്ടിലേയ്ക്കും അന്വേഷണം വ്യാപിപ്പിച്ചിരുന്നു.

Also Read: മൈസൂരു പീഡനം: പ്രതികളെ ഹൈദരാബാദ് മാതൃകയിൽ വെടിവെച്ചു കൊല്ലണം; വിവാദപ്രസ്താവനയുമായി കുമാരസ്വാമി

കേസിൽ നാട്ടുകാരായ മുപ്പതു പേരെ പോലീസ് ചോദ്യം ചെയ്തിരുന്നു. ഇവര്‍ക്ക് സംഭവത്തിൽ പങ്കില്ലെന്നു വ്യക്തമായതോടെ മൊബൈൽ ഫോൺ ലൊക്കേഷൻ കേന്ദ്രീകരിച്ച് അന്വേഷണം നടത്തുകയായിരുന്നു. പരിസരത്ത് ഈ സമയം ഉണ്ടായിരുന്ന 20 സിം കാര്‍ഡുകള്‍ കേന്ദ്രീകരിച്ചായിരുന്നു അന്വേഷണം. ഇതിലെ ആറു നമ്പറുകള്‍ യുവതി പഠിക്കുന്ന കോളേജിലെ വിദ്യാര്‍ഥികളുടേതാണെന്നു കണ്ടെത്തി. ഇതിൽ മൂന്ന് സിം കാര്‍ഡുകള്‍ തമിഴ്നാട്ടിലും ഒരു സിം കാര്‍ഡ് കേരളത്തിലും രജിസ്റ്റര്‍ ചെയ്തതായിരുന്നു. ഈ വിദ്യാര്‍ഥികള്‍ പിറ്റേ ദിവസത്തെ പരീക്ഷ എഴുതിയിരുന്നില്ലെന്നും കണ്ടെത്തി. ഇതോടെയാണ് അയൽസംസ്ഥാനങ്ങളിലേയ്ക്ക് അന്വേഷണം വ്യാപിപ്പിച്ചത്. അതേസമയം, നിലവിൽ അറസ്റ്റിലായിട്ടുള്ളത് ഈ വിദ്യാര്‍ഥികളാണോ എന്നു വ്യക്തമല്ല.

Also Read: ഒറ്റദിവസം നൽകിയത് ഒരു കോടി ഡോസ് വാക്‌സിന്‍; ആരോഗ്യ പ്രവർത്തകരെ അഭിനന്ദിച്ച് മോദി

സംഘത്തിലുള്ളവര്‍ക്കെല്ലാം മുപ്പത് വയസിനു താഴെയാണ് പ്രായം തോന്നിച്ചതെന്നും കന്നഡ ഭാഷയിലായിരുന്നില്ല ഇവര്‍ സംസാരിച്ചിരുന്നതെന്നുമാണ് യുവാവിൻ്റെ മൊഴി. യുവതി ഇതുവരെ കേസിൽ പരാതി നല്‍കാത്തതിനാൽ പോലീസ് സ്വമേധയാ രജിസ്റ്റര്‍ ചെയ്ത കേസിലാണ് അന്വേഷണം നടക്കുന്നത്. യുവതിയുടെ നില മെച്ചപ്പെട്ട ശേഷം മൊഴി രേഖപ്പെടുത്താമെന്ന നിലപാടിലാണ് പോലീസ്.