കശ്മീരിൽ മനോഹരമായ ഭൂമി വാങ്ങാം; വൃദ്ധദമ്പതികളിൽ നിന്ന് ഒരു കോടി രൂപ തട്ടിയ ആള്‍ദൈവം അറസ്റ്റിൽ

ന്യൂഡൽഹി: വൃദ്ധദമ്പതിമാരെ കബളിപ്പിച്ച് ഒരു കോടി രൂപ തട്ടിച്ച ആള്‍ദൈവത്തെ അറസ്റ്റ് ചെയ്ത് പോലീസ്. നരേഷ് കുമാര്‍ എന്നയാളെയാണ് ഡൽഹി പോലീസ് അറസ്റ്റ് ചെയ്തത്. പ്രതി പതിവായി ദമ്പതിമാരെ സന്ദര്‍ശിക്കാറുണ്ടായിരുന്നുവെന്നു പോലീസ് പറഞ്ഞു.



ജമ്മു കശ്മീരിൽ മനോഹരമായ ഒരു വീട് വാങ്ങി നൽകാമെന്നു പ്രലോഭിപ്പിച്ചാണ് ഇയാള്‍ പണം കവര്‍നനതെന്നാണ് സംഭവത്തെപ്പറ്റിയുള്ള ടൈംസ് ഓഫ് ഇന്ത്യ റിപ്പോര്‍ട്ടിൽ പറയുന്നത്. ഉത്സവങ്ങള്‍ക്കും വിശേഷാവസരങ്ങളിലും പതിവായി ദമ്പതിമാരെ സന്ദര്‍ശിച്ച ആള്‍ദൈവം കഴിഞ്ഞ വര്‍ഷമാണ് വീട് വാങ്ങിക്കാനുള്ള പദ്ധതി മുന്നോട്ടു വെച്ചത്. ജമ്മു കശ്മീരിൻ്റെ പ്രത്യേക പദവി കേന്ദ്രസര്‍ക്കാര്‍ എടുത്തു നീക്കിയ സാഹചര്യത്തിൽ പുറത്തു നിന്നുള്ളവര്‍ക്കും കശ്മീരിൽ ഭൂമി വാങ്ങാമെന്നു ഇയാള്‍ ദമ്പതിമാരെ അറിയിച്ചു. കശ്മീരിൽ ഭൂമി വാങ്ങാൻ ഏറ്റവും മികച്ച അവസരം ഇതാണെന്നും ഇയാള്‍ വ്യക്തമാക്കി. തുടര്‍ന്ന് ഇതിനായി ദമ്പതികളിൽ നിന്ന് ഇയാള്‍ ബ്ലാങ്ക് ചെക്കുകള്‍ ഒപ്പിട്ടു വാങ്ങുകയായിരുന്നു.

Also Read: ‘കൊവിഡ് വന്നയാൾക്ക് കൊവാക്സിൻ്റെ ഒറ്റഡോസ് മതിയാകും’; രണ്ട് ഡോസിന് തുല്യമെന്ന് ഐസിഎംആർ

സ്റ്റേഷൻ ഹൗസ് ഓഫീസര്‍ അനിൽ ശര്‍മയുടെ നേതൃത്വത്തിലുള്ള സംഘമാണ് ജമ്മു കശ്മീരിൽ നിന്ന് ഇയാളെ അറസ്റ്റ് ചെയ്തതെന്ന് ഡിസിപി ഉര്‍വിജ ഗോയൽ അറിയിച്ചു. 2020ൽ തട്ടിപ്പിന് ഇരയായ വൃദ്ധ നല്‍കിയ പരാതിയുടെ അടിസ്ഥാനത്തിലാണ് അറസ്റ്റ് നടന്നതെന്നും ടൈംസ് ഓഫ് ഇന്ത്യ റിപ്പോര്‍ട്ടിൽ പറയുന്നു.

തട്ടിപ്പിന് ഇരയായ കുടുംബവും ആള്‍തദൈവവും തമ്മിൽ വര്‍ഷങ്ങളുടെ പരിചയമുണ്ടായിരുന്നു. ഈ വിശ്വാസത്തിലാണ് തുക എഴുതാത്ത ബ്ലാങ്ക് ചെക്കുകള്‍ ഇയാള്‍ക്ക് നല്‍കിയത്. കശ്മീരിൽ ഭൂമി വാങ്ങാനെന്ന പേരിൽ വിവിധ അക്കൗണ്ടുകളിലേയ്ക്കായി ഇയാള്‍ 1.25 കോടി രൂപ മാറ്റിയിട്ടുണ്ടെന്നാണ് ഡൽഹി പോലീസ് പറയന്നത്.

Also Read: ‘ഇളവുകൾ വന്നതോടെ കൊവിഡ് വർധിച്ചു’; മൂന്നാം തരംഗസാധ്യത നിലനിൽക്കുന്നുവെന്ന് മുഖ്യമന്ത്രി

ഒളിവിലായിരുന്ന പ്രതിയ്ക്കു വേണ്ടി പോലീസ് പലയിടത്തും അന്വേഷണം നടത്തി വരികയായിരുന്നു. ഇയാള്‍ക്കെതിരെ കോടതി ജാമ്യമില്ലാ വാറണ്ട് പുറപ്പെടുവിക്കുകയും ചെയ്തിരുന്നു. പോലീസ് അന്വേഷണത്തിനൊപ്പം ഇയാള്‍ക്കു വേണ്ടി ഇരകളായ കുടുംബവും സമാന്തര അന്വേഷണം നടത്തിയെങ്കിലും മാസങ്ങളോളം പ്രതി ഒളിവിൽ തുടരുകയായിരുന്നു. എന്നാൽ അപ്പര്‍ രൂപ് നഗറിൽ ഇയാള്‍ ഉണ്ടെന്ന സൂചന ലഭിച്ചതിനെ തുടര്‍ന്ന് പോലീസ് ഇവിടെ പരിശോധന നടത്തി ഇയാളെ അറസ്ര്റ് ചെയ്യുകയായിരുന്നു. എസ്ഐ രാജ്പാലിൻ്റെ നേതൃത്വത്തിലുള്ള സംഘമാണ് റെയ്ഡ് നടത്തി പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയെ ശേഷം ഇയാളെ റിമാൻഡ് ചെയ്തു. പോലീസ് കസ്റ്റഡിയിലുള്ള ആള്‍ദൈവത്തെ വിശദമായി ചോദ്യം ചെയ്യുമെന്നാണ് റിപ്പോര്‍ട്ട്.

അതേസമയം, കൂടുതൽ പേരിൽ നിന്ന് ഇയാള്‍ സമാനമായ രീതിയിൽ തട്ടിപ്പ് നടത്തി പണം കവര്‍ന്നിട്ടുണ്ടോ എന്ന സംശയം പോലീസിനുണ്ട്. ഇക്കാര്യങ്ങളിൽ വിശദമായ അന്വേഷണം നടത്തുന്നതിനായാണ് പ്രതിയെ ചോദ്യം ചെയ്യുന്നത്. വിവിധ അക്കൗണ്ടുകളിലേയ്ക്ക് ഇയാള്‍ ചെക്ക് ഉപയോഗിച്ച് മാറ്റിയ പണം കണ്ടെത്താനും പോലീസ് ശ്രമം തുടങ്ങിയിട്ടുണ്ട്. കയ്യിലുള്ള സമ്പാദ്യം ഇത്തരത്തിൽ തട്ടിപ്പുകാര്‍ കൊണ്ടുപോകാതിരിക്കാൻ ജാഗ്രത വേണമെന്നും പോലീസ് നിര്‍ദേശിച്ചു.