‘മുങ്ങുകയല്ല, കോൺഗ്രസ് സ്വയം മുക്കുകയാണ്’; ആ ‘കപ്പലിൽ’ ആരു നിൽക്കുമെന്ന് ഷിബു ബേബി ജോൺ

തിരുവനന്തപുരം: ആര്‍എസ്‍‍പി യുഡിഎഫ് വിടുമെന്ന അഭ്യൂഹങ്ങള്‍ക്കിടെ കോൺഗ്രസിനെതിരെ പരസ്യവിമര്‍ശനവുമായി ഷിബു ബേബി ജോൺ. കോൺഗ്രസ് മുങ്ങുകയല്ലെന്നും കോൺഗ്രസ് നേതാക്കള്‍ പാര്‍ട്ടിയെ മുക്കുകയാണെന്നുമാണ് ഷിബു ബേബി ജോണിൻ്റെ വിമര്‍ശനം. രാജ്യത്ത് കോൺഗ്രസിൻ്റെ ആവശ്യം മനസ്സിലാക്കി തങ്ങള്‍ ഒപ്പം നന്നതാണെന്നും എന്നാൽ കോൺഗ്രസ് നേതാക്കള്‍ ഇക്കാര്യം മനസ്സിലാക്കുന്നില്ലെന്നും ഷിബു ബേബി ജോൺ വ്യക്തമാക്കി.



“കോൺഗ്രസ് എന്ന കപ്പൽ മുങ്ങുകയല്ല, പകരം നേതാക്കള്‍ തന്നെ മുക്കുകയാണ്. അങ്ങനെ മുക്കുന്ന കപ്പലിൽ നിന്ന് പുറത്തു പോകാനല്ലേ എല്ലാവരും ആഗ്രഹിക്കുക?” ഷിബു ബേബി ജോൺ വ്യക്തമാക്കി. പാര്‍ട്ടി യുഡിഎഫ് വിടുമോ എന്ന മാധ്യമങ്ങളുടെ ചോദ്യത്തിനായിരുന്നു അദ്ദേഹത്തിൻ്റെ മറുപടി. രാജ്യത്ത് കോൺഗ്രസിൻ്റെ പ്രാധാന്യം കോൺഗ്രസ് നേതാക്കള്‍ തന്നെ മനസ്സിലാക്കാത്ത അവസ്ഥയാണുള്ളതെന്ന് അദ്ദേഹം കുറ്റപ്പെടുത്തി. മറ്റു സംസ്ഥാനങ്ങളിൽ കോൺഗ്രസ് നാമാവശേഷമായെന്നും എന്നാൽ ഇവിടുത്തെ നേതാക്കള്‍ ഇതിൽ നിന്ന് പാഠം ഉള്‍ക്കൊള്ളുന്നില്ലെന്നും ഷിബു ബേബി ജോൺ വിമര്‍ശിച്ചു. അതേസമയം, കോൺഗ്രസിനു ഇനി രക്ഷയില്ലെന്നു താൻ കരുതുന്നില്ലെന്നും ഷിബു ബേബി ജോൺ കൂട്ടിച്ചേര്‍ത്തു.

Also Read: അവസാന യുഎസ് വിമാനവും കാബൂൾ വിട്ടു; ചരിത്ര നിമിഷമെന്ന് താലിബാൻ, വെടിയുതിർത്ത് ആഘോഷം

ഡിസിസി പട്ടികയുമായി ബന്ധപ്പെട്ട് ഗ്രൂപ്പുനേതാക്കള്‍ അടക്കമുള്ളവര്‍ കെപിസിസിയ്ക്കെതിരെ തിരിയുകയും പരസ്യപ്രതികരണം നടത്തിയ നേതാക്കള്‍ക്കെതിരെ ഹൈക്കമാൻഡ് നടപടിയെടുക്കുകയും ചെയ്യുന്നതിനിടയിലാണ് മുന്നണി വിടാനുള്ള ആര്‍എസ്‍‍പിയുടെ നീക്കം. കഴിഞ്ഞ നിയമസഭാ തെരഞ്ഞെടുപ്പിലെ തോൽവിയെ തുടര്‍ന്നായിരുന്നു ആര്‍എസ്‍പി കോൺഗ്രസിൽ നിന്ന് അകന്നത്. പ്രശ്നങ്ങള്‍ പരിഹരിക്കാൻ ഉഭയകക്ഷി ചര്‍ച്ച വേണമെന്ന് ആവശ്യപ്പെട്ട് കോൺഗ്രസിനു കത്ത് നല്‍കി 40 ദിവസം പിന്നിട്ടിട്ടും പരിഗണിക്കാത്തതിൽ പ്രതിഷേധിച്ച് കഴിഞ്ഞ ദിവസം നടന്ന യുഡിഎഫ് യോഗത്തിൽ നിന്ന് ആര്‍എസ്‍‍പി വിട്ടു നിന്നിരുന്നു. ഇതോടെ ആര്‍എസ്‍‍പി യുഡിഎഫ് വിടുമെന്ന അഭ്യൂഹവും ശക്തമായിരുന്നു. ഇതു സ്ഥിരീകരിക്കുന്നതാണ് പാര്‍ട്ടി സംസ്ഥാന സെക്രട്ടറിയേറ്റ് അംഗമായ ഷിബു ബേബി ജോണിൻ്റെ പ്രതികരണം.

അതേസമയം, കോൺഗ്രസിനെതിരെ പരസ്യവിമര്‍ശനവുമായി ആര്‍എസ്‍‍പി നേതാക്കള്‍ രംഗത്തെത്തിയതിനു പിന്നാലെ തിങ്കളാഴ്ചത്തെ യുഡിഎഫ് യോഗത്തിനു മുൻപു തന്നെ ഉഭയകക്ഷി ചര്‍ച്ച നടത്തുമെന്നാണ് മുന്നണി കൺവീനര്‍ എംഎം ഹസ്സൻ പ്രതികരിച്ചത്.

Also Read: കോൺഗ്രസ് പഴയ കോൺഗ്രസല്ല, എന്തും വിളിച്ചു പറയാനാകില്ല; നേതാക്കൾക്ക് പൂട്ടിട്ട് ഹൈക്കമാൻഡ്

കഴിഞ്ഞ ദിവസം നടത്തിയ പ്രതികരണത്തിലും കോൺഗ്രസിനെതിരെ ഷിബു ബേബി ജോൺ വലിയ വിമര്‍ശനമായിരുന്നു ഉന്നയിച്ചത്. തമ്മിലടിക്കുന്നവരെ ഇന്നത്തെ തലമുറയ്ക്ക് ഇഷ്ടമല്ലെന്ന് അദ്ദേഹം പറഞ്ഞു. കോൺഗ്രസിനെ കുറ്റപ്പെടുത്തിയ അദ്ദേഹം സിപിഎമ്മിനെ പരോക്ഷമായി പുകഴ്ത്താനും തയ്യാറായി. പിണറായി വിജയൻ ഏകാധിപതിയാണെന്നു പറയുമ്പോഴും 21 വയസുള്ളയാളെ മേയറാക്കാൻ പാര്‍ട്ടി തയ്യാറായിട്ടുണ്ടെന്നും എന്നാൽ കോൺഗ്രസിൽ ഇരു ഗ്രൂപ്പുകളും തമ്മിൽ ഗവേഷണം നടത്തി എഴുപത്തിയഞ്ചും എൺപതും വയസ് പ്രായമുള്ളവരെയാണ് നേതാക്കളാക്കുന്നതെന്നുമായിരുന്നു ഷിബു ബേബി ജോണിൻ്റെ പ്രതികരണം. ഇതാണ് നടക്കുന്നതെന്ന് കോൺഗ്രസിനെ ഓര്‍മിപ്പിക്കാൻ തന്നെപ്പോലുളളവര്‍ നിര്‍ബന്ധിതരായെന്നും ഷിബു ബേബി ജോൺ പറഞ്ഞു.