സ്വാതന്ത്ര്യത്തിന് വേണ്ടി പോരാടാത്തവര്‍ക്ക് ആരൊക്കെ പോരാടിയെന്ന് അറിയാനാവില്ലെന്ന് കോണ്‍ഗ്രസ് നേതാവ് രാഹുല്‍ഗാന്ധി ട്വീറ്റ് ചെയ്തു.
നെഹ്‌റുവിനെ പോസ്റ്ററില്‍ നിന്ന് ബോധപൂര്‍വ്വം ഒഴിവാക്കിയിട്ടുണ്ടാവില്ലെന്ന് ഐസിഎച്ച്ആര്‍ മുന്‍ ചെയര്‍മാന്‍ അരവിന്ദ് ജംഖേദ്ഖര്‍ പറഞ്ഞു. ” ഐസിഎച്ച്ആറിന്റെ അശ്രദ്ധ മൂലമാവാം നെഹ്‌റു ഒഴിവാക്കപ്പെട്ടത്. സ്വാതന്ത്ര്യസമരത്തെ കുറിച്ച് പറയുമ്പോള്‍ നെഹ്‌റുവിനെ ഒഴിവാക്കാന്‍ ആര്‍ക്കുമാവില്ല. രാഷ്ട്രീയമായ ഇടപെടലുകള്‍ ഉണ്ടാവുമെന്ന് വിശ്വസിക്കുന്നില്ല. ആരെങ്കിലും കരുതിക്കൂട്ടി നെഹ്‌റുവിനെ ഒഴിവാക്കുമെന്ന് വിശ്വസിക്കുന്നില്ല.”- അരവിന്ദ് ജംഖേദ്ഖര്‍ പറയുന്നു. കാലാവധി കഴിഞ്ഞതിനെ തുടര്‍ന്ന് കഴിഞ്ഞ മാര്‍ച്ചില്‍ അരവിന്ദ് സ്ഥാനം ഒഴിഞ്ഞിരുന്നു. പുതിയ ചെയര്‍മാനെ വിദ്യഭ്യാസ മന്ത്രാലയം നിയമിച്ചിട്ടില്ല.
അതി നിര്‍ണായകമായ വിഷയത്തില്‍ പ്രധാനമന്ത്രി നരേന്ദ്രമോദി മൗനം പാലിക്കുകയാണെന്ന് മുതിര്‍ന്ന കോണ്‍ഗ്രസ് നേതാവ് ജയ്‌റാം രമേശ് ട്വിറ്ററില്‍ ആരോപിച്ചു. ”സത്യസന്ധമായ ചരിത്രത്തിനും വസ്തുതകള്‍ക്കും എതിരായ നടപടികളാണ് ഉണ്ടായിരിക്കുന്നത്. നെഹ്‌റുവിന്റെ പാരമ്പര്യം നശിപ്പിക്കണമെന്ന് പ്രധാനമന്ത്രിക്ക് ആഗ്രഹമുണ്ടെന്ന് നമുക്കറിയാം. മുന്‍വിധി ഒഴിവാക്കി പ്രശ്‌നത്തില്‍ ഇടപെട്ട് ഐസിഎച്ച്ആറിനെ കൊണ്ട് തെറ്റുതിരുത്തിപ്പിക്കുകയാണ് പ്രധാനമന്ത്രി ചെയ്യേണ്ടത്”– ജയ്‌റാം രമേശിന്റെ ട്വീറ്റ് പറയുന്നു.
വിഷയത്തില്‍ ഐസിഎച്ച്ആര്‍ നല്‍കിയ വിശദീകരണം പരിഹാസ്യമാണെന്ന് കോണ്‍ഗ്രസ് നേതാവ് പി.ചിദംബരം പറഞ്ഞു. വെറുപ്പിനും വിദ്വേഷത്തിനും ഐസിഎച്ച്ആര്‍ മെമ്പര്‍ സെക്രട്ടറി കീഴടങ്ങിയിരിക്കുകയാണ്. കാറുകളുടെ ചരിത്രം ആഘോഷിക്കുമ്പോള്‍ ഹെന്റി ഫോര്‍ഡിനെയോ വിമാനങ്ങളുടെ ചരിത്രം ആഘോഷിക്കുമ്പോള്‍ റൈറ്റ് സഹോദരന്‍മാരെയോ അവഗണിക്കുമോയെന്നും ചിദംബരം ചോദിച്ചു.
മോശമായ രാഷ്ട്രീയമാണ് നടന്നുകൊണ്ടിരിക്കുന്നതെന്ന് കോണ്‍ഗ്രസ് ജനറല്‍ സെക്രട്ടറി കെ.സി വേണുഗോപാല്‍ ആരോപിച്ചു. ”നെഹ്‌റു രാജ്യത്തിന് നല്‍കിയ പുരോഗമന സംഭാവനകള്‍ ഉള്‍പ്പെടാത്ത ഏതു സ്വാതന്ത്രദിന ആഘോഷവും ചരിത്രവിരുദ്ധമാണ്. നെഹ്‌റുവിന്റെ പേര് വെട്ടിമാറ്റാന്‍ നിങ്ങള്‍ക്കാവും. പക്ഷെ, ആശയങ്ങളെ ഇല്ലാതാക്കാനാവില്ല”–കെ.സി വേണുഗോപാല്‍ പറയുന്നു.
ഐസിഎച്ച്ആര്‍ നടപടിയെ അപലപിച്ച് മുതിര്‍ന്ന കോണ്‍ഗ്രസ് നേതാക്കളായ ശശി തരൂര്‍, ഗൗരവ് ഗൊഗോയ്, പവന്‍ ഖേറ എന്നിവരും രംഗത്തെത്തിയിരുന്നു.
****
(Compiled by അനീബ് പി.എ)
