കടുത്ത പനി, നിര്‍ജ്ജലീകരണം, പ്ലേറ്റ്ലെറ്റുകളുടെ എണ്ണത്തില്‍ പെട്ടെന്ന് കുറവ് സംഭവിക്കുക എന്നിവയാണ് പനിയുടെ ലക്ഷണങ്ങള്‍ എങ്കിലും ഇത് ഏതുതരം പിനിയാണെന്ന് കണ്ടെത്താന്‍ ഇതുവരെ കഴിഞ്ഞിട്ടില്ല. ‘ അജ്ഞാത പനിയുടെ ഉറവിടം കണ്ടെത്താനുള്ള പരിശ്രമത്തിലാണ് ആരോഗ്യവകുപ്പെന്ന് ഫിറോസാബാദിലെ മെഡിക്കല്‍ സൂപ്രണ്ട് ഹന്‍സരാജ് സിംഗ് പറഞ്ഞു.’ എന്നാല്‍, മരിച്ചവരില്‍ ചിലര്‍ക്ക് ഡെങ്കിപ്പനിയുടെ ലക്ഷണങ്ങള്‍ കണ്ടെത്തിയത് കൂടുതല്‍ ആശങ്കയ്ക്ക് വഴിവെച്ചിരിക്കുകയാണ്.
ജില്ലകളിലെ സ്ഥിതി ആശങ്കാജനകമാണെന്നും വെള്ളക്കെട്ട്, ശുചിത്വമില്ലായ്മ, എന്നിവയാണ് രോഗം പടരുന്നു പിടിക്കുന്നതിന് പിന്നിലെ കാരണങ്ങളെന്നും ഫിറോസാബാദ് എം.എല്‍.എ മനീഷ് അസിജ പറഞ്ഞു.
അജ്ഞാത പനി ഏറ്റവും കൂടുതല്‍ ബാധിക്കുന്നത് ഉത്തര്‍പ്രദേശിലെ ഗ്രാമപ്രദേശങ്ങളിലെ ജനതയെയാണ്. ആരോഗ്യവകുപ്പിലെ ഒരു ടീം മരുന്നുകളുമായി ഗ്രാമ പ്രദേശത്തേക്ക് എത്തിയെങ്കിലും വേണ്ടത്ര ആശുപത്രി സൗകര്യം ഇല്ലാത്തതിനാല്‍ ഈ രോഗികളില്‍ ചിലരെ ആഗ്രയിലേക്കും മറ്റ് നഗരങ്ങളിലേക്കും മാറ്റുകയാണ്. അതേസമയം, ഗ്രാമീണ മേഖലകളിലുള്ള സ്വകാര്യ ആശുപത്രികളിലും വീടുകളിലും മരിക്കുന്നവരുടെ കൃത്യമായ എണ്ണം എത്രയാണെന്നത് വ്യക്തമല്ല.
വളരെ മോശം അവസ്ഥ
ഫിറോസാബാദ് മെഡിക്കല്‍ കോളേജിലെ സ്ഥിതി നിലവില്‍ വളരെ മോശമാണ്. 72 കുട്ടികളാണ് ജീവനു വേണ്ടി പോരാടുന്നത്. അവരില്‍ 50% ത്തിലധികം പേര്‍ക്കും ഡെങ്കിപ്പനിയുടെ ലക്ഷണങ്ങളുണ്ടെന്നാണ് അധികൃതര്‍ പറയുന്നത്.
നാല് വയസ്സുമാത്രം പ്രായമുള്ള മകളെ നഷ്ടപ്പെട്ട, ഫിറോസാബാദിലെ സെഖ്പൂര്‍ സ്വദേശി വിനോദ് കുമാറിന്റെ വേദനനിറഞ്ഞ ജീവിതം ടൈംസ് ഓഫ് ഇന്ത്യ റിപ്പോര്‍ട്ട് ചെയ്തിരുന്നു. അതില്‍ പറയുന്നത് ഇങ്ങനെയാണ്. ‘ എന്റെ നാല് വയസ്സുള്ള മകള്‍ക്ക് കുറച്ച് ദിവസമായി കടുത്ത പനി ഉണ്ടായിരുന്നു. കിടക്ക ഇല്ലാത്തതിനെ തുടര്‍ന്ന് ഞങ്ങള്‍ അവളെ ഒരു സ്വകാര്യ ആശുപത്രിയില്‍ പ്രവേശിപ്പിച്ചു. എന്നാല്‍, കടുത്ത പനിക്ക് പുറമെ പ്ലേറ്റ്ലെറ്റുകള്‍ കുറയുകയും ചെയ്തതിനെ തുടര്‍ന്ന് അവള്‍ ശനിയാഴ്ച മരണപ്പെട്ടു.’
അതേസമയം, കൊവിഡ് വാര്‍ഡുകളിലാണ് അജ്ഞാത പനി ബാധിച്ച രോഗികളെയും പ്രവേശിപ്പിച്ചിരിക്കുന്നതെന്നും ഡോക്ടര്‍മാരും ആരോഗ്യപ്രവര്‍ത്തകരും ജാഗ്രതയിലാണെന്നും ഫിറോസാബാദ് മെഡിക്കല്‍ കോളേജിലെ ചീഫ് മെഡിക്കല്‍ സൂപ്രണ്ട് (സി.എം.എസ്) ഡോ. ഹന്‍സരാജ് സിംഗ് പറഞ്ഞു. കുട്ടികള്‍ സുഖം പ്രാപിക്കാന്‍ രണ്ടാഴ്ചയെങ്കിലും എടുക്കുമെന്നും അതിനാല്‍ കിടക്കകളുടെ എണ്ണം വര്‍ദ്ധിപ്പിക്കുന്നതായും അദ്ദേഹം വ്യക്തമാക്കി.
മുന്‍കരുതല്‍ നടപടികളുമായി ആരോഗ്യവകുപ്പ്
മലേറിയ, ഡെങ്കിപ്പനി എന്നിവയുടെ ലക്ഷണങ്ങള്‍ കണ്ടെത്തിയതിനെ തുടര്‍ന്ന് ജനങ്ങള്‍ ജാഗ്രത പാലിക്കാനും സ്വയം ചികിത്സ ചെയ്യുന്നതിന് പകരം ഡോക്ടറെ സമീപിക്കാനും ആരോഗ്യവകുപ്പ് ആവശ്യപ്പെട്ടിട്ടുണ്ട്.
എല്ലാ എ.എന്‍.എം (ഓക്‌സിലറി നഴ്‌സ് മിഡൈ്വഫ്) ജീവനക്കാര്‍ക്കും ആശ വര്‍ക്കര്‍ തൊഴിലാളികള്‍ക്കും പ്രദേശങ്ങളില്‍ നിരന്തരം നിരീക്ഷണം നടത്താന്‍ നിര്‍ദേശം നല്‍കിയിട്ടുണ്ടെന്ന് ചീഫ് മെഡിക്കല്‍ ഓഫീസര്‍ (സി.എം.ഒ) ഡോ സുനില്‍ ശര്‍മ്മ പറഞ്ഞു. അജ്ഞാത പനിയുടെ ലക്ഷണങ്ങള്‍ രോഗികളില്‍ കണ്ടാല്‍, കമ്മ്യൂണിറ്റി ഹെല്‍ത്ത് സെന്ററുകള്‍, പ്രാഥമിക ആരോഗ്യ കേന്ദ്രങ്ങള്‍, എന്നിവിടങ്ങളിലെ ബന്ധപ്പെട്ട ആരോഗ്യ വകുപ്പ് ഉദ്യോഗസ്ഥരോട് റിപ്പോര്‍ട്ട് ചെയ്യാനും ആവശ്യപ്പെട്ടിട്ടുണ്ടെന്ന് അദ്ദേഹം കൂട്ടിച്ചേര്‍ത്തു.
കൂടാതെ, മലേറിയയുടെ ലക്ഷണങ്ങളുള്ള ഏതൊരു വ്യക്തിയും യാതൊരു മടിയും കൂടാതെ കമ്മ്യൂണിറ്റി ഹെല്‍ത്ത് സെന്ററുകള്‍, പ്രാഥമിക ആരോഗ്യ കേന്ദ്രങ്ങള്‍, ഉള്‍പ്പെടെ സര്‍ക്കാര്‍ ആശുപത്രികളില്‍ പരിശോധനയ്ക്ക് വിധേയരാകണമെന്നും സി.എം.ഒ പറഞ്ഞു. എല്ലാ സര്‍ക്കാര്‍ ആശുപത്രികളിലും പരിശോധനയും ചികിത്സയും സൗജന്യമായി ലഭ്യമാക്കുമെന്നും ശര്‍മ്മ അറിയിച്ചു.
സംസ്ഥാനത്തെ കൊവിഡ് സാഹചര്യം
അഷ്ടമിരോഹിണി പ്രമാണിച്ച് തിങ്കളാഴ്ചയും ചൊവ്വാഴ്ചയും സംസ്ഥാനത്തുടനീളം രാത്രി കര്‍ഫ്യൂയില്‍ ഉത്തര്‍പ്രദേശ് സര്‍ക്കാര്‍ ഇളവ് അനുവദിച്ചിരിക്കുകയാണ്. ഞായറാഴ്ച വൈകീട്ടാണ് സംസ്ഥാനത്തെ അഡീഷണല്‍ ചീഫ് സെക്രട്ടറി അവനിഷ് അവസ്തി ഉത്തരവ് പുറപ്പെടുവിച്ചത്. എന്നാല്‍, കൊവിഡ് പ്രോട്ടോക്കോളുകള്‍ പാലിച്ചായിരിക്കണം ആഘോഷങ്ങള്‍ നടത്തേണ്ടതെന്നും ആളുകള്‍ മാസ്‌ക് ധരിക്കുകയും ഹാന്‍ഡ് സാനിറ്റൈസറുകള്‍ ഉപയോഗിക്കുകയും വേണമെന്നും ഉത്തരവില്‍ പറഞ്ഞിരുന്നു.
‘ ഇതുവരെ 1,709,248 കൊവിഡ് കേസുകളാണ് ഉത്തര്‍പ്രദേശില്‍ ആകെ റിപ്പോര്‍ട്ട് ചെയ്തത്. കൂടാതെ, 22,818 മരണങ്ങളും 1,686,165 പേര്‍ രോഗമുക്തി നേടുകയും ചെയ്തിട്ടുണ്ട്. 14 പുതിയ കേസുകള്‍ കൂടി ഞായറാഴ്ച റിപ്പോര്‍ട്ട് ചെയ്യപ്പെട്ടിരുന്നു. മാത്രമല്ല, രണ്ട് രോഗികള്‍ മരണപ്പെടുകയും 37 പേര്‍ സുഖം പ്രാപിക്കുകയും ചെയ്തു. സംസ്ഥാനത്ത് നിലവിലെ കൊവിഡ് കേസുകളുടെ എണ്ണം 265 ആണ്.’ — ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്തു.
അതേസമയം, കൊവിഡ് കേസുകള്‍ കുറയുന്ന സാഹചര്യത്തില്‍ ഉത്തര്‍പ്രദേശ് സര്‍ക്കാര്‍ സംസ്ഥാനത്തെ പല ജില്ലകളിലും നിയന്ത്രണങ്ങളില്‍ ഇളവുകള്‍ വരുത്തിയിട്ടുണ്ട്. ശനിയാഴ്ചകളില്‍ രാവിലെ 6 മുതല്‍ രാത്രി 10 വരെ സാധാരണ രീതിയില്‍ ജനങ്ങള്‍ക്ക് പുറത്തിറങ്ങാമെന്നും ഞായറാഴ്ച നിയന്ത്രണങ്ങള്‍ തുടരുമെന്നുമായിരുന്നു ഈ മാസം ആദ്യം മുഖ്യമന്ത്രി യോഗി ആദിത്യനാഥ് പറഞ്ഞിരുന്നത്.
ഓഗസ്റ്റ് 11 ലെ കണക്കുകള്‍ അനുസരിച്ച്, അലിഗഡ്, അമേഠി, ചിത്രകൂട്, ഇറ്റാ, ഫിറോസാബാദ്, ഗോണ്ട, ഹത്രാസ്, കസ്ഗഞ്ച്, പിലിഭിത്, പ്രതാപ്ഗഡ്, ഷംലി, സോന്‍ഭദ്ര തുടങ്ങിയ സ്ഥലങ്ങളില്‍ കേസുകളുടെ എണ്ണം വളരെ കുറവാണ് മാത്രമല്ല, രോഗമുക്തരുടെ എണ്ണം 98.6 ശതമാനമായി ഉയര്‍ന്നു.
മാത്രമല്ല, സ്വാതന്ത്ര്യദിനത്തിന് ശേഷം ഹയര്‍ സെക്കന്‍ഡറി, ടെക്‌നിക്കല്‍, വൊക്കേഷണല്‍ വിദ്യാഭ്യാസ സ്ഥാപനങ്ങള്‍ തുറക്കാന്‍ സംസ്ഥാന സര്‍ക്കാര്‍ അനുമതി നല്‍കിയിട്ടുണ്ട്.
****
(Compiled by ഭദ്ര ചന്ദ്രൻ)
