മൈസൂരു കൂട്ടബലാത്സംഗക്കേസ്: പ്രതികളിൽ ഒരാൾകൂടി പിടിയിൽ

മൈസൂരു: മൈസൂരുവിൽ വിദ്യാർഥിനിയെ കൂട്ടബലാത്സംഗം ചെയ്ത കേസിൽ ഒരാൾ കൂടി അറസ്റ്റിൽ. ലോറി ഡ്രൈവറായ വിജയകുമാറിനെ തമിഴ്നാട്ടിൽ നിന്ന് കർണാടക പോലീസാണ് അറസ്റ്റ് ചെയ്തത്. കേസിൽ രണ്ട് പേർകൂടി അറസ്റ്റിലാകാനുണ്ടെന്ന് കർണാടക പോലീസ് നേരത്തെ അറിയിച്ചിരുന്നു. കേസുമായി ബന്ധപ്പെട്ട് പതിനേഴുകാരൻ ഉൾപ്പെടെയുള്ള തിരുപ്പൂർ സ്വദേശികളെ പോലീസ് നേരത്തെ അറസ്റ്റ് ചെയ്തിരുന്നു.



അറസ്റ്റിലായ പ്രതികളെല്ലാം സ്ഥിരം കുറ്റവാളികളാണെന്നാണ് റിപ്പോർട്ട്. തമിഴ്നാട്ടിലും കർണാടകയിലും ഇവർക്കെതിരെ മോഷണക്കുറ്റം ഉണ്ടെന്നാണ് ഏഷ്യാനെറ്റ് ന്യൂസ് റിപ്പോർട്ട് ചെയ്യുന്നത്. മൈസൂരുവിലെ ചാമുണ്ഡി ഹിൽസ് പ്രദേശത്ത് വെച്ചാണ് സംഘം സുഹൃത്തിനെ അടിച്ചുവീഴ്ത്തി പെൺകുട്ടിയെ കൂട്ടബലാത്സംഗത്തിനിരയാക്കിയത്.

Also Read : അവരെ കാലുവാരിയ ഒരു കോണ്‍ഗ്രസുകാരനും പാര്‍ട്ടിയിലുണ്ടാകില്ല; പിണറായിയുടെ ചെരുപ്പ് നക്കും എന്ന് പറയുന്നത് ദൗര്‍ഭാഗ്യകരം: കെ മുരളീധരൻ

കേസിൽ നേരത്തെ അറസ്റ്റിലായ പ്രതികളെ സ്ഥലത്തെത്തിച്ച് പോലീസ് തെളിവെടുപ്പ് നടത്തിയിരുന്നു. മലയടിവാരത്തെ പാറക്കെട്ടിൽ സുഹൃത്തിനൊപ്പം ഇരുന്നു സംസാരിക്കുകയായിരുന്ന യുവതിയെ ആറംഗ സംഘം കൂട്ടലബലാത്സംഗം ചെയ്യുകയായിരുന്നെന്നാണ് റിപ്പോർട്ട്. വിദ്യാർഥികളോട് സംഘം പണം ആവശ്യപ്പെട്ടെങ്കിലും ഇവർ നൽകാൻ തയ്യാറായില്ല. തുടർന്നായരുന്നു പീഡനം. പ്രതികൾ പീഡനദൃശ്യങ്ങൾ മൊബൈൽ ക്യാമറയിൽ പകർത്തിയതായും ദൃശ്യങ്ങൾ പുറത്തു വിടാതിരിക്കാൻ പണം ആവശ്യപ്പെട്ടതായും യുവാവ് പോലീസിന് നൽകിയ മൊഴിയിലുണ്ട്

സംഭവത്തിന് പിന്നാലെ പ്രദേശവാസികളായ മദ്യപസംഘമാണ് ആക്രമണത്തിനു പിന്നിലെന്നായിരുന്നു പോലീസ് കരുതിയിരുന്നത്. ഇവരിൽ ചിലരെ കസ്റ്റഡിയിലെടുത്ത് ചോദ്യം ചെയ്തതോടെ ആക്രമണത്തിനു പിന്നിൽ പുറത്തു നിന്നുള്ളവരാണെന്നു വ്യക്തമാകുകയായിരുന്നു. ക്രൂരമര്‍ദ്ദനത്തിന് ഇരയായ യുവതിയുടെ സുഹൃത്തിന്‍റെ മൊഴിയുടെ അടിസ്ഥാനത്തിലാണ് പോലീസ് അന്വേഷണം നടത്തിയത്.

Also Read : “കോൺഗ്രസ് സംഘടന തകര്‍ച്ചയ്ക്ക് കാരണം കെ സി വേണുഗോപാൽ, പാലോട് രവി കുമ്പിടി”; പുറത്താക്കലിനു പിന്നാലെ രാജി പ്രഖ്യാപിച്ച് പ്രശാന്ത്

മൊബൈൽ ഫോൺ സിഗ്നലുകള്‍ കേന്ദ്രീകരിച്ചു നടത്തിയ അന്വേഷണത്തിൽ സംഭവദിവസം പുറത്തു നിന്നുള്ള ചിലര്‍ എവിടെയെത്തിയതായി പോലീസ് കണ്ടെത്തിയിരുന്നു. യുവതിയുടെ സുഹൃത്തിന്‍റെ മൊഴിയുടെ അടിസ്ഥാനത്തിൽ കേരളത്തിലേയ്ക്കും തമിഴ്നാട്ടിലേയ്ക്കും അന്വേഷണം വ്യാപിപ്പിക്കുകയായിരുന്നു. സംഘത്തിലുള്ളവര്‍ക്കെല്ലാം മുപ്പത് വയസിനു താഴെയാണ് പ്രായം തോന്നിച്ചതെന്നും കന്നഡ ഭാഷയിലായിരുന്നില്ല ഇവര്‍ സംസാരിച്ചിരുന്നതെന്നുമായിരുന്നു യുവാവിന്‍റെ മൊഴി.

Also Read : ‘മുങ്ങുകയല്ല, കോൺഗ്രസ് സ്വയം മുക്കുകയാണ്’; ആ ‘കപ്പലിൽ’ ആരു നിൽക്കുമെന്ന് ഷിബു ബേബി ജോൺ

മൊബൈൽ ഫോൺ ലൊക്കേഷൻ കേന്ദ്രീകരിച്ച് നടത്തിയ അന്വേഷണം പ്രതികൾ മലയാളി വിദ്യാർഥികളാണോ എന്ന സംശയത്തിനും ഇടയാക്കിയിരുന്നു. സംഭവസമയത്ത് പരിസരത്ത് ഉണ്ടായിരുന്ന 20 സിം കാര്‍ഡുകള്‍ കേന്ദ്രീകരിച്ചായിരുന്നു അന്വേഷണം.