ആൺകുഞ്ഞ് ഉണ്ടാകുന്നില്ല; ആള്‍ദൈവം നല്‍കിയ ഭസ്മം യുവതിയുടെ ദേഹത്തിട്ടു; ഭര്‍ത്താവിനെതിരെ കേസ്

പൂനെ: ആൺകുട്ടിയ്ക്ക് ജന്മം നല്‍കിയില്ലെന്നതിൻ്റെ പേരിൽ മഹാരാഷ്ട്രയിൽ യുവതി ഭര്‍തൃവീട്ടുകാരുടെ ക്രൂരപീഡനത്തിന് ഇരയായതായി റിപ്പോര്‍ട്ട്. ആൺകുട്ടിയ്ക്ക് ജന്മം നല്‍കാനായി യുവതിയെ അപമാനിച്ചെന്നും അന്ധവിശ്വാസത്തിൻ്റെ പേരിൽ യുവതി അമ്മായിയമ്മയുടെ അടക്കം പീഡനം ഏറ്റുവാങ്ങിയെന്നുമാണ് റിപ്പോര്‍ട്ട്.



വസ്ത്രങ്ങള്‍ അഴിച്ചു മാറ്റിയ ശേഷം ആൺകുട്ടി ഉണ്ടാകാനായി ഒരു ആള്‍ദൈവം നല്‍കിയ ഭസ്മം യുവതിയുടെ നഗ്നശരീരത്തിൽ പൂശുകയാണ് ചെയ്തതെന്നാണ് റിപ്പോര്‍ട്ടിൽ പറയുന്നത്. കൂടാതെ ഇതേ വിഷയത്തിൻ്റെ പേരിൽ യുവതിയെ കുടുംബം നാലു വര്‍ഷത്തോളമായി മാനസികമായും ശാരീരികമായും ഉപദ്രവിച്ചെന്നും റിപ്പോര്‍ട്ടിൽ പറയുന്നു. ഭര്‍ത്താവിനും ഇയാളുടെ മാതാപിതാക്കള്‍ക്കുമെതിരയാണ് കേസ്.

മഹാരാഷ്ട്രയിലെ ഖേദ് താലൂക്കിലെ ഒരു ഗ്രാമത്തിലാണ് സംഭവുണ്ടായത്. ഭര്‍ത്താവിനും മാതാപിതാക്കള്‍ക്കും ഒപ്പമാണ് യുവതി താമസിച്ചിരുന്നത്. എന്നാൽ അടുത്തിടെ യുവതി സ്വന്തം വീട്ടിൽ തിരിച്ചെത്തിയപ്പോള്‍ മാത്രമാണ് ബന്ധുക്കള്‍ ഉപദ്രവത്തെപ്പറ്റി അറിയുന്നത്. ദമ്പതികള്‍ക്ക് രണ്ട് കുട്ടികള്‍ ഉണ്ടായെങ്കിലും രണ്ട് പേരും പെൺകുട്ടികളാണെന്നതായിരുന്നു ഉപദ്രവത്തിൻ്റെ കാരണമെന്നാണ് റിപ്പോര്‍ട്ടിൽ പറയുന്നത്.

Also Read: വിവാദങ്ങൾ അടഞ്ഞ അധ്യായം; എകെജി സെൻ്ററിൽ നിന്ന് നിർദേശം വേണ്ടെന്ന് വി ഡി സതീശൻ

2016ലായിരുന്നു ഇരയായ യുവതിയുടെ വിവാഹം കഴിഞ്ഞത്. തുടര്‍ന്ന് ഒരു പെൺകുട്ടിയ്ക്ക് യുവതി ജന്മം നല്‍കി. ഇതിനു ശേഷം ഭര്‍ത്താവിൻ്റെ കുടുംബം തന്നെ ഉപദ്രവിക്കാൻ തുടങ്ങുകയായിരുന്നുവെന്നാണ് ഇവര്‍ പറയുന്നത്. കുടുംബത്തിലേയ്ക്ക് യുവതി നിര്‍ഭാഗ്യം കൊണ്ടുവന്നെന്നു ആരോപിച്ച് യുവതിയെ അമ്മായിയമ്മ ക്രൂരമായി മര്‍ദ്ദിച്ചിരുന്നു. പലപ്പോഴും വയറ്റിൽ അവര്‍ ഇടിച്ചിരുന്നുവെന്നും യുവതി പറഞ്ഞു.

ഇതിനിടെ സ്ത്രീധനമായി കൂടുതൽ സ്വര്‍ണം വേണമെന്ന് ആവശ്യപ്പെട്ട് ഭര്‍ത്താവിൻ്റെ കുടുംബം വീണ്ടും യുവതിയുടെ വീട്ടുകാരെ സമീപിച്ചു. 2020ൽ രണ്ടാമത്തെ പെൺകുട്ടിയ്ക്കും യുവതി ജന്മം നല്‍കിയതോടെ പീഡനം ഇരട്ടിച്ചു. രണ്ട് പെൺമക്കളെയും കൊന്നുകളയുമെന്ന് ഭര്‍ത്താവ് ഭീഷണിപ്പെടുത്തിയെന്നാണ് യുവതിയെ ഉദ്ധരിച്ചുള്ള ഇന്ത്യൻ എക്സ്പ്രസ് റിപ്പോര്‍ട്ടിൽ പറയുന്നത്. ഉപദ്രവം സഹിക്കവയ്യാതെ വന്നതോടെ യുവതി സ്വന്തം വീട്ടിലേയ്ക്ക് തിരിച്ചു വന്ന ശേഷം ഇവിടെ താമസിക്കുകയായിരുന്നു. എന്നാൽ ഇതിനിടെയാണ് നാടകീയമായ സംഭവങ്ങള്‍ അരങ്ങേറിയത്.

Also Read: അവരെ കാലുവാരിയ ഒരു കോണ്‍ഗ്രസുകാരനും പാര്‍ട്ടിയിലുണ്ടാകില്ല; പിണറായിയുടെ ചെരുപ്പ് നക്കും എന്ന് പറയുന്നത് ദൗര്‍ഭാഗ്യകരം: കെ മുരളീധരൻ

ഓഗസ്റ്റ് മാസം മൂന്നാമത്തെ ആഴ്ച യുവതിയെ കാണാനായി വീട്ടിലെത്തിയ ഭര്‍ത്താവ് ഒരു ആള്‍ദൈവത്തെ കാണാനായി യുവതിയെ കൂട്ടിക്കൊണ്ടു പോകുകയായിരുന്നു. ആള്‍ദൈവം ഇവര്‍ക്ക് ഒരു പാക്കറ്റ് ഭസ്മം നല്‍കി വിടുകയായിരുന്നുവെന്നാണ് ആരോപണം. ഇയാള്‍ പറഞ്ഞതനുസരിച്ച് ഈ പൊടി യുവതിയുടെ നഗ്നശരീരത്തിൽ പുരട്ടുകയായിരുന്നു.

സംഭവത്തിൽ അടുത്തിടെയാണ് പരാതി ലഭിച്ചതെന്നും യുവതിയുടെ പരാതിയിൽ കേസ് രജിസ്റ്റര്‍ ചെയ്ത് പ്രാഥമിക അന്വേഷണം പൂര്‍ത്തിയാക്കിയിട്ടുണ്ടെന്നും പോലീസ് പറഞ്ഞു. അന്ധവിശ്വാസ നിര്‍മാര്‍ജന നിയമപ്രകാരം യുവതിയുടെ ഭര്‍ത്താവിനെതിരെ കേസെടുത്തിട്ടുണ്ടെന്ന് പോലീസ് പറഞ്ഞു.