താലിബാനുമായി ചർച്ച നടത്തി ഇന്ത്യ; അഫ്​ഗാനിൽ കുടുങ്ങിയ ഇന്ത്യക്കാരുടെ സുരക്ഷ ഉറപ്പാക്കണമെന്ന് ആവശ്യം

ന്യൂഡല്‍ഹി: താലിബാനുമായി ഇന്ത്യ ചര്‍ച്ച നടത്തി. ദോഹയിൽ വെച്ച് ഖത്തറിലെ ഇന്ത്യന്‍ അംബാസിഡറാണ് താലിബാന്‍ പ്രതിനിധിയുമായി ചര്‍ച്ച നടത്തിയതെന്ന് വിദേശകാര്യ മന്ത്രാലയമാണ് അറിയിച്ചത്. അഫ്ഗാനിൽ കുടുങ്ങിയ ഇന്ത്യക്കാരുടെ സുരക്ഷ, അഫ്ഗാൻ മണ്ണ് ഇന്ത്യാ വിരുദ്ധ പ്രവർത്തനങ്ങൾക്ക് താവളമാകരുത് തുടങ്ങിയ വിഷയങ്ങൾ ചർച്ചയായെന്ന് വിദേശകാര്യ മന്ത്രാലയത്തെ ഉദ്ധരിച്ച് വാർത്താ ഏജൻസിയായ എഎൻഐ റിപ്പോർട്ട് ചെയ്തു.



ഖത്തറിലെ ഇന്ത്യന്‍ അംബാസിഡര്‍ ദീപക് മിത്തൽ ദോഹയിലെ താലിബാൻ പൊളിറ്റിൽ ഓഫീസ് മേധാവി ഷേര്‍ മുഹമ്മദ് അബ്ബാസുമായാണ് കൂടിക്കാഴ്ച നടത്തിയത്. താലിബാന്‍ അഫ്ഗാന്‍ പിടിച്ചെടുത്തതിനു ശേഷം നടക്കുന്ന ആദ്യ ചര്‍ച്ചയാണിത്. അഫ്ഗാനിലുള്ള ഇന്ത്യക്കാരുടെ സുരക്ഷ, മടങ്ങിവരവ് എന്നിവ കേന്ദ്രീകരിച്ചായിരുന്നു കൂടിക്കാഴ്ച.

Also Read : അവരെ കാലുവാരിയ ഒരു കോണ്‍ഗ്രസുകാരനും പാര്‍ട്ടിയിലുണ്ടാകില്ല; പിണറായിയുടെ ചെരുപ്പ് നക്കും എന്ന് പറയുന്നത് ദൗര്‍ഭാഗ്യകരം: കെ മുരളീധരൻ

അഫ്ഗാന്‍ മണ്ണ് ഇന്ത്യാ വിരുദ്ധ പ്രവര്‍ത്തനങ്ങള്‍ക്കോ ഭീകരവാദ പ്രവർത്തനങ്ങൾക്കോ ഒരുവിധത്തിലും ഉപയോഗിക്കപ്പെടരുതെന്ന ആശങ്ക ഇന്ത്യൻ പ്രതിനിധി കൂടിക്കാഴ്ചയിൽ ഉന്നയിച്ചു. ഈ പ്രശ്നങ്ങൾ ക്രിയാത്മകമായി പരിഗണിക്കുമെന്ന് താലിബാൻ പ്രതിനിധി ഇന്ത്യൻ അംബാസഡറിന് ഉറപ്പ് നൽകി.

അതേസമയം 20 വർഷങ്ങൾക്ക് ശേഷം അഫ്ഗാനിസ്ഥാൻ നിന്നും യുഎസ് സൈന്യം പൂർണമായി പിന്മാറിയിരിക്കുകയാണ്. ഇന്ത്യൻ സമയം രാത്രി 12.59ന് അമേരിക്കൻ വിമാനമായ സി17 കാബൂളിലെ ഹമീദ് കർസായി വിമാനത്താവളത്തിൽ നിന്നും പറന്നുയർന്നതോടെയാണ് അഫ്ഗാനിസ്ഥാനിലെ സേന പിന്മാറ്റം പൂർണമായത്.

Also Read : “കോൺഗ്രസ് സംഘടന തകര്‍ച്ചയ്ക്ക് കാരണം കെ സി വേണുഗോപാൽ, പാലോട് രവി കുമ്പിടി”; പുറത്താക്കലിനു പിന്നാലെ രാജി പ്രഖ്യാപിച്ച് പ്രശാന്ത്

കാബൂൾ വിമാനത്താവളത്തിൽ നിന്നും പറന്നുയർന്ന വിമാനത്തിൽ യുഎസിന്‍റെ അഫ്ഗാൻ അംബാസിഡർ റോസ് വിൽസൺ അടക്കമുള്ള നൂറിലധികം പേരുണ്ടായിരുന്നു. കാബൂൾ വിമാനത്താവളത്തിന് സുരക്ഷാ ഭീഷണി നിലനിന്നിരുന്നതിനാൽ അവസാന വിമാനമാണ് പറന്നുയരുന്നതെന്ന സൂചന അമേരിക്ക നൽകിയിരുന്നില്ല. ഓഗസ്റ്റ് 31വരെ രക്ഷാദൗത്യം തുടരുമെന്നായിരുന്നു അമേരിക്ക മുൻപ് വ്യക്തമാക്കിയിരുന്നത്. അവസാന യുഎസ് സൈന്യവും അഫ്ഗാൻ വിട്ടതോടെ ചൊവ്വാഴ്ച പുലർച്ചെ വെടിയുതിർത്താണ് താലിബാൻ ആഘോഷിച്ചത്.

Also Read : ‘മുങ്ങുകയല്ല, കോൺഗ്രസ് സ്വയം മുക്കുകയാണ്’; ആ ‘കപ്പലിൽ’ ആരു നിൽക്കുമെന്ന് ഷിബു ബേബി ജോൺ

അമേരിക്കയുടെ അവസാന വിമാനവും കാബൂൾ വിട്ടതിന് പിന്നാലെ സന്തോഷം പങ്കുവച്ച താലിബാൻ ‘ചരിത്ര നിമിഷം’ എന്നാണ് ഇതിനെ വിശേഷിപ്പിച്ചത്. കടുത്ത സമ്മർദ്ദത്തിനും ഭീഷണിയ്ക്കുമിടെ 18 ദിവസങ്ങൾ നീണ്ട രക്ഷാദൗത്യത്തിൽ 123,000 പേരെ അഫ്ഗാനിസ്ഥാനിൽ നിന്നും തിരിച്ചെത്തിച്ചെന്ന് പെന്‍റഗൺ പറഞ്ഞു. രക്ഷാദൗത്യത്തിന്‍റെ പേരിൽ ആരോപണങ്ങൾ തുടരുന്ന പശ്ചാത്തലത്തിൽ യു എസ് പ്രസിഡന്‍റ് ജോ ബൈഡൻ വരും ദിവസങ്ങളിൽ രാജ്യത്തെ അഭിസംബോധന ചെയ്യും. രക്ഷാദൗത്യത്തിൽ പങ്കാളികളായവർക്ക് അദ്ദേഹം നന്ദി പറഞ്ഞു.