ഇന്ത്യയില്‍ നിന്നുള്ള അനുമതി ലഭിക്കുന്നതിന് അനുസരിച്ച് നേരിട്ടുള്ള വിമാന സര്‍വീസ് ആരംഭിക്കുന്നതിന് എല്ലാ തയ്യാറെടുപ്പുകളും നടത്തിക്കഴിഞ്ഞതായി കുവൈറ്റ് സിവില്‍ ഏവിയേഷന്‍ അതോറിറ്റി അറിയിച്ചു.
ഇന്ത്യന്‍ അധികൃതരുടെ അഭിപ്രായം ആരാഞ്ഞു
ഇന്ത്യയില്‍ നിന്നുള്ള യാത്രക്കാരുടെ പ്രതിവാര ക്വാട്ടയായി നിശ്ചയിച്ച 760 യാത്രക്കാരെ കുവൈറ്റ്, ഇന്ത്യന്‍ വിമാന കമ്പനികള്‍ക്കിടയില്‍ വീതം വയ്ക്കാനാണ് പദ്ധതി. ഇതുപ്രകാരം ഇരു രാജ്യങ്ങളിലെയും വിമാന കമ്പനികള്‍ക്ക് 360 പേരെ വീതം ആഴ്ചയില്‍ കൊണ്ടുവരാനാവും. ഇതുമായി ബന്ധപ്പെട്ട നിര്‍ദ്ദേശം ഇന്ത്യന്‍ അധികൃതരുടെ അനുമതിക്കായി സമര്‍പ്പിച്ചിരിക്കുകയാണെന്നും പത്രം റിപ്പോര്‍ട്ട് ചെയ്തു. ഇക്കാര്യത്തില്‍ ഇന്ത്യയില്‍ നിന്നുള്ള അനുമതി ലഭിക്കുന്ന മുറയ്ക്ക് ഇന്ത്യയില്‍ നിന്ന് നേരിട്ടുള്ള വിമാന സര്‍വീസ് ആരംഭിക്കുന്നതിന് എല്ലാ തയ്യാറെടുപ്പുകളും നടത്തിക്കഴിഞ്ഞതായി കുവൈറ്റ് സിവില്‍ ഏവിയേഷന്‍ അതോറിറ്റി അറിയിച്ചു. അതോടൊപ്പം ഇന്ത്യയ്ക്കു പുറമെ, പുതുതായി യാത്രാവിലക്ക് നീക്കിയ ഈജിപ്ത്, ശ്രീലങ്ക, ബംഗ്ലാദേശ്, പാകിസ്താന്‍, നേപ്പാള്‍ എന്നീ രാജ്യങ്ങള്‍ക്കും ക്വാട്ട നിശ്ചയിച്ച് നല്‍കിയതായും പത്രം റിപ്പോര്‍ട്ട് ചെയ്തു.
സര്‍വീസ് തുടങ്ങുമെന്ന പ്രതീക്ഷയില്‍ പ്രവാസികള്‍
ഇന്ത്യ ഉള്‍പ്പെടെ ആറ് റെഡ് ലിസ്റ്റ് രാജ്യങ്ങളില്‍ നിന്നുള്ളവര്‍ക്ക് നേരിട്ടുള്ള യാത്രാനുമതി നല്‍കിക്കൊണ്ട് പ്രധാനമന്ത്രി ശെയ്ഖ് സബാഹ് അല്‍ ഖാലിദിന്റെ അധ്യക്ഷതയില്‍ ആഗസ്ത് 18ന് ചേര്‍ന്ന മന്ത്രി സഭാ യോഗം തീരുമാനം കൈക്കൊണ്ടിരുന്നുവെങ്കിലും തീരുമാനം ഇതുവരെ നടപ്പിലായിട്ടില്ല. ഇതിന് തടസ്സമായി നിന്നത് വിമാനത്താവളത്തിലെത്താവുന്ന പ്രതിദിന യാത്രക്കാരുടെ എണ്ണവുമായി ബന്ധപ്പെട്ട പ്രശ്‌നമായിരുന്നു. ഇതുവരെ 7500 പേര്‍ക്ക് മാത്രമായിരുന്നു ഒരു ദിവസം വിമാനത്താവളത്തിലേക്ക് യാത്ര ചെയ്യാനാവുക. ഇപ്പോള്‍ സര്‍വീസ് നടത്തുന്ന വിമാനങ്ങള്‍ക്കു തന്നെ ഈ എണ്ണം മതിയാവാത്ത അവസ്ഥയായിരുന്നു നിലവില്‍. പുതിയ സാഹചര്യത്തില്‍ യാത്രക്കാരുടെ പരിധി 10,000മാക്കി ഉയര്‍ത്തിയതോടെ മലയാളികള്‍ ഉള്‍പ്പെടെയുള്ള പതിനായിരക്കണക്കിന് പ്രവാസികളാണ് പ്രതീക്ഷയോടെ കാത്തിരിക്കുന്നത്.
നേരിട്ടുള്ള സര്‍വീസ് നിര്‍ത്തിയിട്ട് ഏഴു മാസം
കൊവിഡ് വ്യാപനത്തെ തുടര്‍ന്ന് ഏഴു മാസം മുമ്പാണ് കുവൈറ്റ് വിദേശ രാജ്യങ്ങളില്‍ നിന്നുള്ള വിമാന സര്‍വീസുകള്‍ക്ക് യാത്രാ വിലക്കേര്‍പ്പെടുത്തിയത്. എന്നാല്‍ ആഗസ്ത് ഒന്നു മുതല്‍ വാക്‌സിനെടുത്ത പ്രവാസികള്‍ക്ക് കുവൈറ്റ് യാത്രാനുമതി നല്‍കിയിരുന്നുവെങ്കിലും ഇന്ത്യ ഉള്‍പ്പെടെയുള്ള ആറു രാജ്യങ്ങളില്‍ നിന്നുള്ള വിമാന സര്‍വീസുകള്‍ക്ക് വിലക്ക് തുടരുകയായിരുന്നു. കൊവിഡിന്റെ ഡെല്‍റ്റ വൈറസ് വ്യാപനം രൂക്ഷയമായ രാജ്യങ്ങളില്‍ നിന്നുള്ളവര്‍ക്കായിരുന്നു വിലക്ക് തുടര്‍ന്നത്. അതിനു ശേഷം കഴിഞ്ഞ മാസമാണ് ഇന്ത്യ ഉള്‍പ്പെടെയുള്ള രാജ്യങ്ങള്‍ക്കുള്ള യാത്രാ വിലക്ക് പിന്‍വലിച്ച് മന്ത്രിസഭ തീരുമാനമെടുത്തത്. യാത്രയുടെ മുന്നോടിയായി ആയിരക്കണക്കിന് ഇന്ത്യന്‍ പ്രവാസികള്‍ കുവൈറ്റ് ആരോഗ്യ മന്ത്രാലയത്തിന്റെ വെബ്‌സൈറ്റില്‍ വാക്‌സിന്‍ സര്‍ട്ടിഫിക്കറ്റ് ഉള്‍പ്പെടെ രജിസ്റ്റര്‍ ചെയ്ത് സര്‍വീസ് തുടങ്ങുന്നതും കാത്തിരിക്കുകയാണ്. നിലവില്‍ ഇന്ത്യക്കാര്‍ക്ക് കുവൈറ്റില്‍ എത്തണമെങ്കില്‍ മറ്റൊരു രാജ്യത്ത് 14 ദിവസം ക്വാറന്റൈനില്‍ കഴിയണമെന്നാണ് വ്യവസ്ഥ.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : kuwait to allow 760 indian passengers per week
Malayalam News from malayalam.samayam.com, TIL Network
