കോണ്ടം ഉണ്ടെന്നത് സമ്മതത്തിൻ്റെ തെളിവല്ലെന്ന് കോടതി; പീഡനക്കേസിലെ പ്രതിയ്ക്ക് ജാമ്യം

മുംബൈ: യുവതിയെ പീഡിപ്പിച്ചെന്ന കേസ് പരിഗണിക്കുന്നതിനിടെ സുപ്രധാന പരാമര്‍ശവുമായി മുംബൈയിലെ സെഷൻസ് കോടതി. പീഡനം നടന്ന സ്ഥലത്തു നിന്ന് കോണ്ടം കണ്ടെടുത്തു എന്നത് ഇരുവരും തമ്മിലുള്ള സമ്മതത്തിൻ്റെ ലക്ഷണമല്ലെന്ന് കോടതി വ്യക്തമാക്കി. നാവികസേനാ ഉദ്യോഗസ്ഥൻ്റെ ഭാര്യയെ സഹപ്രവര്‍ത്തകൻ പീഡിപ്പിച്ചെന്ന കേസിൽ പ്രതിയുടെ ജാമ്യാപേക്ഷ പരിഗണിക്കവേയാണ് കോടതിയുടെ പരാമര്‍ശം. അതേസമയം, പ്രതിയ്ക്ക് ജാമ്യം നല്‍കാൻ കോടതി തയ്യാറായി.



പീഡനം നടന്ന സ്ഥലത്ത് ഗര്‍ഭനിരോധന ഉറ കണ്ടെത്തിയിരുന്നുവെന്നാണ് കേസിലെ രേഖകള്‍ വ്യക്തമാക്കുന്നത്. എന്നാൽ ഇത് ലൈംഗികബന്ധത്തിന് ഇര സമ്മതിച്ചതിൻ്റെ തെളിവാണെന്നു കണ്ടെത്താൻ കഴിയില്ലെന്നായിരുന്നു കോടതിയുടെ നിരീക്ഷണം. “സംഭവം നടന്ന സ്ഥലത്ത് ഉറ കണ്ടെത്ത എന്നത് ഹര്‍ജിക്കാരനുമായി ലൈംഗികബന്ധത്തിൽ ഏര്‍പ്പെടാൻ പരാതിക്കാരി സമ്മതിച്ചു എന്നതിന് പര്യാപ്തമായ തെളിവല്ല. കൂടുതൽ പ്രശ്നങ്ങള്‍ ഒഴിവാക്കാനായി പ്രതി കോണ്ടം ഉപയോഗിച്ചിരിക്കാനുള്ള സാധ്യതയും തള്ളിക്കളയാനാകില്ല.” കോടതി പറഞ്ഞതായി ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു. അതേസമയം, കേസിൽ അന്വേഷണം പൂര്‍ത്തിയാക്കി പോലീസ് കുറ്റപത്രം സമര്‍പ്പിച്ച സാഹചര്യത്തിലാണ് പ്രതിയ്ക്ക് കോടതി ജാമ്യം നല്‍കിയത്.

Also Read: തെരഞ്ഞെടുപ്പ് പ്രചാരണ വീഴ്ച: വികെ മധുവിനെ തരംതാഴ്ത്താൻ സിപിഎം; സുധാകരനെതിരെയും നടപടി ഉണ്ടാകുമോ?

ഭര്‍ത്താവ് കേരളത്തിൽ ട്രെയിനിങിനു പോയ സമയത്ത് അടുത്ത ക്വാര്‍ട്ടേഴ്സിൽ താമസിക്കുന്ന സഹപ്രവര്‍ത്തകൻ വീട്ടിലെത്തി പീഡിപ്പിച്ചെന്ന യുവതിയുടെ പരാതിയിലാണ് കോടതിയുടെ നടപടി. ഏപ്രിൽ 29നായിരുന്നു സംഭവം നടന്നത്. സംഭവദിവസം പ്രതി തനിക്ക് ഒരു ചോക്കളേറ്റ് നല്‍കിയെന്നും ഇതു കഴിച്ചതോടെ തനിക്ക് കലശലായ തലവേദന അനുഭവപ്പെടുകയായിരുന്നുവെന്നും പരാതിക്കാരി പറഞ്ഞു. തുടര്‍ന്ന് യുവതി വിവരം അറിയിച്ചത് അനുസരിച്ച് ക്വാര്‍ട്ടേഴ്സിലെത്തിയ പ്രതി പാരസെറ്റമോള്‍ ഗുളിക നല്‍കുകയായിരുന്നു. എന്നാൽ കുറച്ചു സമയത്തിനു ശേഷം പ്രതി ശ്വാസം മുട്ടിച്ചെന്നും തന്നെ പീഡിപ്പിച്ചെന്നുമാണ് യുവതി പരാതിയിൽ വ്യക്തമാക്കിയത്. പീഡനം തടയാനായി യുവാവിനെ താൻ ബ്ലേഡ് വെച്ച് ആക്രമിച്ചതായും യുവതി ചൂണ്ടിക്കാട്ടി.

പീഡനം നടന്നതിനു പിന്നാലെ യുവതി ആത്മഹത്യാശ്രമവും നടത്തിയിരുന്നുവെന്നാണ് ഇതു സംബന്ധിച്ച റിപ്പോര്‍ട്ടുകള്‍ പറയുന്നത്. അടുത്ത ദിവസം ഭര്‍ത്താവ് തിരിച്ചെത്തിയതോടെ യുവതി നടന്ന കാര്യങ്ങള്‍ അറിയിക്കുകയായിരുന്നു. തുടര്‍ന്ന് ഇരുവരും ചേര്‍ന്ന് പോലീസിൽ പരാതി നല്‍കുകയും പോലീസ് പ്രതിയായ യുവാവിനെ അറസ്റ്റ് ചെയ്യുകയുമായിരുന്നു.

Also Read: ഏഴ് ജില്ലകളില്‍ പ്ലസ് വണ്ണിന് 20 ശതമാനം അധിക സീറ്റുകള്‍; സംസ്ഥാനത്ത് വിവിധ സേവനങ്ങള്‍ക്കായി ഏകീകൃത വിവര സംവിധാനം

അതേസമയം, തന്നെ കേസിൽ കുടുക്കിയതാണെന്നാണ് പ്രതി കോടതിയിൽ വാദിച്ചത്. മുറിയിൽ മറ്റൊരാള്‍ കൂടിയുണ്ടായിരുന്നുവെന്നും അതുകൊണ്ടു തന്നെ പീഡനം നടന്നെന്നത് വിശ്വസനീയമല്ലെന്നും പ്രതിഭാഗം കോടതിയെ അറിയിച്ചു. പീഡനം നടന്ന മുറിയിൽ കോണ്ടം ഉണ്ടായിരുന്നുവെന്നത് സമ്മതത്തോടു കൂടിയ ലൈംഗികബന്ധമാണ് നടന്നതന്നതിൻ്റെ സൂചനയാണെന്നും പ്രതിഭാഗം വ്യക്തമാക്കി. എന്നാൽ ഇക്കാര്യങ്ങള്‍ കോടതി തള്ളിക്കളഞ്ഞു.