ഭക്ഷണം പാചകം ചെയ്തിട്ടും ഭർത്താവ് പാനിപുരി കൊണ്ടുവന്നു; തർക്കത്തിനൊടുവിൽ യുവതി ജീവനൊടുക്കി

പൂനെ: അത്താഴത്തെ ചൊല്ലിയുള്ള തർക്കത്തിനൊടുവിൽ ഭാര്യ ആത്മഹത്യ ചെയ്തു. മഹാരാഷ്ട്രയിലെ പൂനെയിലാണ് സംഭവം. ഭക്ഷണം പാചകം ചെയ്തിട്ടും ഭർത്താവ് പാനിപുരി വാങ്ങിക്കൊണ്ടുവന്നതിനെച്ചൊല്ലിയുള്ള തർക്കത്തിനൊടുവിലാണ് സംഭവമെന്ന് ഇംഗ്ലീഷ് വാർത്ത ചാനലായ എൻഡിടിവിയാണ് റിപ്പോർട്ട് ചെയ്തത്.



വെള്ളിയാഴ്ച രാത്രിയാണ് ഭർത്താവ് പാനി പുരി വാങ്ങി വന്നത്. ഇതിനെച്ചൊല്ലിയുള്ള തർക്കമാണ് പ്രശ്നങ്ങൾക്ക് തുടക്കമെന്നാണ് റിപ്പോർട്ട്. പാനി പുരി കൊണ്ടുവന്ന സമയത്ത് ഭാര്യ വീട്ടിൽ ഭക്ഷണം പാചകം ചെയ്തിട്ടുണ്ടായിരുന്നു. ഇതേച്ചൊല്ലി ഇരുവരും തർക്കിച്ചു. തുടർന്ന് ഭക്ഷണം കഴിക്കാതെയാണ് ഇരുവരും കിടന്ന് ഉറങ്ങിയത്. പിറ്റേന്ന് സ്ത്രീ ആത്മഹത്യക്ക് ശ്രമിക്കുകയായിരുന്നു.

Also Read : ഏഴ് ജില്ലകളില്‍ പ്ലസ് വണ്ണിന് 20 ശതമാനം അധിക സീറ്റുകള്‍; സംസ്ഥാനത്ത് വിവിധ സേവനങ്ങള്‍ക്കായി ഏകീകൃത വിവര സംവിധാനം



ഉച്ചയ്ക്ക് ഒരു മണിയോടെയായിരുന്നു സംഭവം. ഉടൻ തന്നെ ഇവരെ ആശുപത്രിയിലേക്ക് കൊണ്ടുപോവുകയും ചെയ്തു. ചികിത്സയിലിരിക്കെ ഞായറാഴ്ചയാണ് ഇവർ മരിക്കുന്നത്. 2019ലാണ് ദമ്പതികളുടെ വിവാഹം കഴിഞ്ഞതെന്നാണ് റിപ്പോർട്ട്. സോളാപുർ സ്വദേശിയായ ഇവർ പിന്നീട് പൂനെയിലേക്ക് താമസം മാറുകയായിരുന്നു.

സോളാപൂരിൽ താമസിക്കുന്ന സമയത്ത് ഇവര്‍ തമ്മില്‍ പലപ്പോഴും കലഹം പതിവായിരുന്നുവെന്നാണ് അയല്‍വാസികള്‍ പറയുന്നത്. ഭർത്താവിനോട് പൂനെയിൽ ജോലി നോക്കാനും അവിടേക്ക് താമസം മാറാനും ഇവർ പതിവായി നിർബന്ധിക്കാറുണ്ടായിരുന്നു. പൂനെയിലേക്ക് താമസം മാറിയതിന് പിന്നാലെ ഇതിനെച്ചൊല്ലിയുള്ള തർക്കം അവസാനിച്ചെങ്കിലും ഇരുവരും തമ്മിൽ മറ്റു പല പ്രശ്നങ്ങളും ഉണ്ടായിരുന്നു.

Also Read : അവരോട് പൊയ്‍ക്കോളാനല്ലേ പറഞ്ഞത്? രമേശ് ചെന്നിത്തലയെ ബിജെപിയിലേക്ക് സ്വാഗതം ചെയ്ത് എഎൻ രാധാകൃഷ്ണൻ

യുവതിയുടെ അച്ഛൻ പ്രകാശ് മകളുടെ ആത്മഹത്യയെക്കുറിച്ച് പോലീസിൽ പരാതി നൽകിയതോടെയാണ് സംഭവം പുറത്തറിഞ്ഞത്. മകളെ ഭർത്താവ് ഉപദ്രവിക്കാറുണ്ടായിരുന്നെന്ന് കാട്ടിയാണ് അച്ഛൻ പരാതി നൽകിയത്. പരാതിയുടെ അടിസ്ഥാനത്തിൽ ഐപിസി സെക്ഷൻ 306 ( ആത്മഹത്യ പ്രേരണ), 498 (എ) (ഗാർഹിക പീഡനം) തുടങ്ങിയ വകുപ്പുകൾ പ്രകാരം പോലീസ് കേസ് രജിസ്റ്റർ ചെയ്തു.

Also Read : തെരഞ്ഞെടുപ്പ് പ്രചാരണ വീഴ്ച: വികെ മധുവിനെ തരംതാഴ്ത്താൻ സിപിഎം; സുധാകരനെതിരെയും നടപടി ഉണ്ടാകുമോ?

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, നിങ്ങള്‍ ഒറ്റയ്ക്കല്ല. സഹായം തേടാം ഉടനെ. ദയവായി വിളിക്കൂ: ദിശ ഹെല്‍പ്പ്‍ലൈന്‍ – 1056 (ടോള്‍ ഫ്രീ)