22 ക്യാരറ്റ് സ്വർണം പൂശിയ വടാപാവ് കഴിച്ചാലോ? 2000 രൂപ മാത്രം

അടുത്തിടെയാണ് ഭക്ഷിക്കാവുന്ന സ്വർണം ചേർത്ത് തയ്യാറാകുന്ന ഭക്ഷണ വിഭവങ്ങൾ സമൂഹ മാധ്യമങ്ങളിൽ വൈറലായത്. ദുബായിലെ സ്കൂപ്പി കഫേയിൽ വിളമ്പുന്ന ബ്ലാക്ക് ഡയമണ്ട് എന്ന് പേരിട്ടിരിക്കുന്ന ഐസ് ക്രീം, ദുബായിയിലെ ഇന്ത്യൻ ഭക്ഷണ ശാലയായ ബോംബെ ബോറോയിൽ വിളമ്പുന്ന റോയൽ ഗോൾഡ് ബിരിയാണി, ഡച്ച് ഷെഫ് ആയ റോബർ‌ട്ട് ജാൻ‌ ഡി വീൻ‌ തയ്യാറാക്കിയ ദി ഗോൾഡൻ ബോയ് ബർഗർ, മാൻഹട്ടനിലെ പ്രവർത്തിക്കുന്ന സെറെൻഡിപിറ്റി 3 വിളമ്പുന്ന ലോകത്തിലെ ഏറ്റവും വിലകൂടിയ ഫ്രഞ്ച് ഫ്രൈസ് എന്നീ വിഭവങ്ങളിലെല്ലാം താരം ഭക്ഷിക്കാവുന്ന സ്വർണം തന്നെ. ഈ ശ്രേണിയിലെ പുത്തൻ താരമാണ് സ്വർണം പൂശിയ വടാപാവ്.



വടാപാവ് മനസ്സിലായില്ലേ? ഇന്ത്യയുടെ വാണിജ്യ തലസ്ഥാനമായ മുംബൈക്കാരെ സംബന്ധിച്ചിടത്തോളം ‘മലയാളികൾക്ക് പൊറോട്ട’ എന്നത് പോലുള്ള വിഭവമാണിത്. ക്രിക്കറ്റ് ഇതിഹാസം സച്ചിൻ തെണ്ടുൽക്കറുടെ പോലും ഏറ്റവും ഇഷ്ട്ടപെട്ട ഭക്ഷണമാണ് വടാപാവ്. സ്വർണം പൂശിയ വടാപാവ് കഴിക്കാൻ വീണ്ടും പോകേണ്ടത് ദുബായിലേക്കാണ്. കരാമയിലും അൽ കോസിലും പ്രവർത്തിക്കുന്ന ഓ’പാവോ ഭക്ഷണശാലയാണ് സ്വർണം പൂശിയ വടാപാവ് വിളമ്പുന്നത്. ഓ’ഗോൾഡ് എന്ന് പേരിട്ടിരിക്കുന്ന ഗോൾഡൻ വടാപാവിന് 99 ദിർഹം (ഏകദേശം 2,000 രൂപ) ആണ് വില.

60,000 രൂപയ്ക്ക് ഒരു സ്കൂപ് ഐസ്ക്രീം, ഇതെന്താ സ്വർണം കൊണ്ടാണോ?

22 കാരറ്റ് സ്വർണ്ണം പൂശിയത് കൂടാതെ ട്രഫിൽ വെണ്ണയും, ചീസും, ഉരുളക്കിഴങ്ങിന്റെ ഫ്രൈയും, മിന്റ് നാരങ്ങാവെള്ളവും ചേർന്ന മീലിനാണ് 99 ദിർഹം. ഖലീജ് ടൈംസ് റിപ്പോർട്ട് അനുസരിച്ച് ട്രഫിൽ വെണ്ണ ഫ്രാൻസിൽ നിന്നാണ് വരുത്തുന്നത്. മിന്റ് മയോണൈസിൽ മുക്കിയാണ് പാവ് ക്രമീകരിച്ചിരിക്കുന്നത്. ഫ്രാൻസിൽ നിന്ന് ഇറക്കുമതി ചെയ്ത പ്രീമിയം ഗുണനിലവാരമുള്ള 22 കാരറ്റ് ഗോൾഡൻ ഷീറ്റ് ഉപയോഗിച്ചാണ് ഓ’ഗോൾഡ് വടാപാവ് ഗാർണിഷ് ചെയ്തിരിക്കുന്നത്.

ലോകത്തിലെ ഏറ്റവും വിലയുള്ള ബിരിയാണി, ബർഗർ, ഫ്രഞ്ച് ഫ്രൈസ് എവിടെ കിട്ടും?

ഓ’ഗോൾഡ് വടാപാവിന്റെ വീഡിയോ ട്വിറ്ററിൽ പോസ്റ്റ് ചെയ്തതോടെ സംഭവം വൈറൽ. അതെ സമയം “ഇതിനൊപ്പം പച്ചമുളക് പുതിന സോസ് ഇല്ല” എന്നാണ് ഒരാളുടെ കമന്റ്. “വടാപാവ് ഇപ്പോൾ സ്വർണ്ണ നിലവാരം ആസ്വദിക്കുന്നു” എന്നാണ് മറ്റൊരാളുടെ കമന്റ്.