കശ്മീർ വിഷയത്തിൽ ഇടപടില്ല, ‘പഴയതെല്ലാം മറക്കാം’; ഇന്ത്യയോടു നിലപാട് വ്യക്തമാക്കി താലിബാൻ

ന്യൂഡൽഹി: അഫ്ഗാനിസ്ഥാനിൽ അധികാരം പിടിച്ച താലിബാനുമായി ഇന്ത്യ നയതന്ത്ര ചര്‍ച്ചകള്‍ നടത്തിയതിനു പിന്നാലെ കശ്മീര്‍ വിഷയത്തിൽ നിലപാട് വ്യക്തമാക്കി ഭീകരസംഘടന. കശ്മീര്‍ വിഷയം തങ്ങളുടെ അധികാരപരിധിയിൽ വരുന്നതല്ലെന്നും ഇക്കാര്യത്തിൽ ഇടപെടാൻ താത്പര്യമില്ലെന്നും താലിബാൻ നേതാവ് അനസ് ഹഖാനി പറഞ്ഞു.



താലിബാൻ ശക്തിപ്പെടുന്നതോടെ ജമ്മു കശ്മീരിൽ ഭീകരത ശക്തിപ്പെടുമെന്ന ആശങ്കകള്‍ക്കിടെയാണ് താലിബാൻ നേതാവിൻ്റെ പ്രസ്താവന. അഫ്ഗാനിസ്ഥാനിലെ പുതിയ താലിബാൻ ഭരണകൂടം ഇന്ത്യയുമായി നല്ല ബന്ധമാണ് ആഗ്രഹിക്കുന്നതെന്നും അനസ് ഹഖാനി പറഞ്ഞതായി സിഎൻഎൻ – ന്യൂസ് 18 റിപ്പോര്‍ട്ട് ചെയ്തു. മുൻപ് താലിബാൻ മുതിര്‍ന്ന നേതാവായ ശേര്‍ മുഹമ്മദ് അബ്ബാസ് സ്റ്റാനിക്സായിയും സമാനമായ പ്രസ്താവന നടത്തിയിരുന്നു.

Also Read: ചവറയിലെ തോൽവി; നിയോജക മണ്ഡലം ചെയർമാനെ മാറ്റി കോൺഗ്രസ്

അതേസമയം, ജമ്മു കശ്മീരിൽ സജീവമായി ഇടപെടുന്ന അൽ ഖ്വയ്‍ദയും ജെയ്ഷെ മുഹമ്മദുമായും താലിബാൻ ഇപ്പോഴും ബന്ധം പുലര്‍ത്തുന്നുണ്ടെന്നാണ് റിപ്പോര്‍ട്ടുകള്‍. ജമ്മു കശ്മീരിൽ ഭീകരത ശക്തിപ്പെടുത്താനായി ജെയ്ഷെ മുഹമ്മദ് നേതാക്കള്‍ താലിബാനുമായി ചര്‍ച്ച നടത്തിയെന്നു കഴിഞ്ഞ ദിവസം വിവിധ ദേശീയമാധ്യമങ്ങളാണ് റിപ്പോര്‍ട്ട് ചെയ്യുന്നത്. അൽ ഖ്വയ്ദയുമായി താലിബാൻ ബന്ധപ്പെടരുതെന്ന യുഎസ് സമാധാനക്കരാറിലെ നിര്‍ദേശം താലിബാൻ അംഗീകരിച്ചിട്ടുണ്ടെന്നും ഇരു സംഘടനകളും തമ്മിൽ ഇപ്പോഴും ബന്ധമുണ്ടെന്നാണ് ഐക്യരാഷ്ട്രസഭാ ഏജൻസികള്‍ അടക്കം സ്ഥിരീകരിക്കുന്നത്. അഫ്ഗാനിസ്ഥാനെ “സ്വതന്ത്രമാക്കിയതിൽ” താലിബാനെ അഭിനന്ദിച്ച് പ്രസ്താവന പുറത്തിറക്കിയ അൽ ഖ്വയ്ദ കശ്മീര്‍ അടക്കമുള്ള ഭൂപ്രദേശങ്ങളും പിടിക്കാൻ താലിബാനെ സ്വാഗതം ചെയ്തിരുന്നു. ഇതിനിടയിലാണ് പുതിയ റിപ്പോര്‍ട്ടുകള്‍ പുറത്തു വരുന്നത്.

Also Read: അമ്മയ്ക്കും മകനുമെതിരായ സദാചാര ആക്രമണം; പ്രതി പിടിയിൽ

മുൻപ് നടന്നതെല്ലാം മരക്കാും ഇന്ത്യയുമായുള്ള ബന്ധം മുന്നോട്ടു കൊണ്ടുപോകാനും താലിബാൻ തയ്യാറാണെന്ന് അനസ് ഹഖാനി പറഞ്ഞു. 1995 മുതൽ താലിബാനൊപ്പം പ്രവര്‍ത്തിക്കുന്ന ഹഖാനി നെറ്റ്‍‍വര്‍ക്കിൻ്റെ സ്ഥാപകനായ ജലാലുദ്ദീൻ ഹഖാനിയുടെ ഇളയ മകനാണ് അനസ ഹഖാനി. താലിബാൻ കശ്മീരിൻ്റെ ആഭ്യന്തര കാര്യങ്ങളിൽ ഇടപെടില്ലെന്നും അതുപോലെ മറ്റു രാജ്യങ്ങള്‍ അഫ്ഗാനിസ്ഥാൻ്റെ ആഭ്യന്തര കാര്യങ്ങളിൽ ഇടപെടില്ലെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു.

ഇന്ത്യൻ മാധ്യമങ്ങള്‍ തങ്ങളെപ്പറ്റി തെറ്റായ കാര്യങ്ങള്‍ എഴുതിപ്പിടിപ്പിക്കുകയാണെന്നും ഇത് അന്തരീക്ഷം മോശമാക്കുന്നുണ്ടെന്നും അനസ് ഹഖാനി പറഞ്ഞു. കശ്മീര്‍ വിഷയത്തിൽ താലിബാൻ പാകിസ്ഥാനെ പിന്തുണയ്ക്കില്ലെന്നും ഇതു സംബന്ധിച്ച പ്രസ്താവനകള്‍ രാഷ്ട്രീയലക്ഷ്യത്തോടെയുള്ളതാണെന്നും താലിബാൻ നേതാവ് വ്യക്തമാക്കി. “ഇന്ത്യ ഞങ്ങളുടെ ശത്രുവിനെ (യുഎസിനെ) 20 വര്‍ഷത്തോളം പിന്തുണച്ചു. പക്ഷെ ഞങ്ങള്‍ എല്ലാം മറക്കാൻ തയ്യാറാണ്.” അഫ്ഗാനിസ്ഥാനിൽ അവശേഷിക്കുന്ന ഇന്ത്യക്കാര്‍ സുരക്ഷിതരാണെന്നും എല്ലാവരെയും ചേര്‍ത്തു നിര്‍ത്തിയാണ് മുന്നോട്ടു പോകുന്നതെന്നും താലിബാൻ താലിബാൻ നേതാവ് പറഞ്ഞു. തുടക്കത്തിൽ ആശങ്കകള്‍ ഉണ്ടായിരുന്നെങ്കിലിലും ഇപ്പോള്‍ എല്ലാവരും സന്തുഷ്ടരാണെന്നും അദ്ദേഹം കൂട്ടിച്ചേര്‍ത്തു.

അതേസമയം, താലിബാനോടുള്ള സമീപനം മയപ്പെടുത്തേണ്ട കാര്യമില്ലെന്നാണ് ഇന്നലെ പ്രധാനമന്ത്രിയുടെ അധ്യക്ഷതയിൽ ചേര്‍ന്ന യോഗതത്തിലുള്ള തീരുമാനം. കേന്ദ്ര ആഭ്യന്തരമന്ത്രി അമിത് ഷായും ദേശീയ സുരക്ഷാ ഉപദേഷ്ടാവും ചര്‍ച്ചയിൽ പങ്കെടുത്തു. അഫ്ഗാനിസ്ഥാനിൽ നിന്ന് മടങ്ങാൻ ആഗ്രഹിക്കുന്ന ഇന്ത്യക്കാര്‍ക്ക് ഇതിനുള്ള സാഹചര്യം ഒരുക്കണമെന്ന് ആവശ്യപ്പെടാനും ഒഴിവാക്കാനാകാത്ത നയതന്ത്ര ചര്‍ച്ചകള്‍ മാത്രം താലിബാനുമായി നടത്തിയാൽ മതിയെന്നും യോഗത്തിൽ തീരുമാനമായതായി ഇന്ത്യ ടിവി റിപ്പോര്‍ട്ട് ചെയ്തു.

താലിബാൻ ഭീകരസംഘടനയാണോ അല്ലയോ എന്നു കേന്ദ്രസര്‍ക്കാര്‍ നയം വ്യക്തമാക്കണമെന്നും ഭീകരസംഘടനയാണെങ്കിൽ എന്തിനാണ് അവരുമായി ചര്‍ച്ചയ്ക്കു പോയതെന്നും ജമ്മു കശ്മീര്‍ മുൻ മുഖ്യമന്ത്രി ഒമര്‍ അബ്ദുള്ള ഇന്നലെ ചോദിച്ചിരുന്നു. എന്നാൽ ഈ ചോദ്യത്തിന് കേന്ദ്രം ഇതുവരെ നേരിട്ടുള്ള ഉത്തരം നല്‍കിയിട്ടില്ല.