കശ്മീര്‍ വിഘടനവാദി നേതാവ് സെയ്ദ് അലി ഷാ ഗീലാനി (92) അന്തരിച്ചു

ശ്രീനഗര്‍: ഹുറീയത്ത് സ്ഥാപകനും കശ്മീര്‍ വിഘടനവാദിയുമായ സെയ്ദ് അലി ഷാ ഗീലാനി (92) അന്തരിച്ചു. ബുധനാഴ്ച ശ്രീനഗറിലെ വീട്ടിൽ വെച്ചായിരുന്നു അന്ത്യം. വാര്‍ധക്യ സഹജമായ അസുഖങ്ങളെ തുടര്‍ന്ന് മാസങ്ങളായി വിശ്രമത്തിൽ കഴിയുകയായിരുന്നു. ജമ്മു കശ്മീരിൽ പാക് അനുകൂല നിലപാട് വ്യാപകമാക്കുന്നതിൽ ഗീലാനി സുപ്രധാന പങ്കാണ് വഹിച്ചത്.



സംഭവത്തിൻ്റെ പശ്ചാത്തലത്തിൽ മുൻകരുതൽ നടപടികളുടെ ഭാഗമായി കശ്മീര്‍ താഴ്‍‍വരയിൽ ഇൻ്റര്‍നെറ്റ് വിച്ഛേദിച്ചതായി കശ്മീര്‍ റേഞ്ച് ഐജി വിജയ് കുമാര്‍ വ്യക്തമാക്കി. ഗീലാനിയുടെ വീടിൻ്റെ പരിസരത്ത് പോലീസ് സുരക്ഷയും ശക്തമാക്കിയിട്ടുണ്ട്. അനിഷ്ട സംഭവങ്ങള്‍ ഒഴിവാക്കാനായി ചില ഹുറീയത്ത് നേതാക്കളെ പോലീസ് കസ്റ്റഡിയിലെടുത്തതായും റിപ്പോര്‍ട്ടുകളുണ്ട്.

ഗീലാനിയുടെ മരണത്തിൽ അനുശോചിച്ച് പാക്കിസ്ഥാനും രംഗത്തെത്തിയിട്ടുണ്ട്. കശ്മീര്‍ സ്വാതന്ത്ര്യ സമര സേനാനിയായിരുന്നു ഗീലാനിയെന്നു വിശേഷിപ്പിച്ച പാക് പ്രധാനമന്ത്രി ഇമ്രാൻ ഖാൻ അദ്ദേഹത്തിൻ്റെ മരണത്തിൽ ഔദ്യോഗികമായി ദുഃഖാചരണം നടത്തുമെന്നും പതാക പകുതി താഴ്ത്തിക്കെട്ടുമെന്നും പ്രഖ്യാപിച്ചു.

Also Read: ചവറയിലെ തോൽവി; നിയോജക മണ്ഡലം ചെയർമാനെ മാറ്റി കോൺഗ്രസ്

2018ലും ഗീലാനിയ്ക്ക് ഒരു തവണ ഹൃദയാഘാതമുണ്ടായിരുന്നു. ഗീലാനിയുടെ മൃതദേഹം ജന്മനാടായ സോപൂലിയേക്ക് കൊണ്ടുപോകുമെന്നും ഇവിടെ വെച്ചായിരിക്കും സംസ്കാരമെന്നും അടുത്ത വൃത്തങ്ങള്‍ വ്യക്തമാക്കിയിരുന്നു. ഇന്നു രാവിലെ മൃതസംസ്കാരം നടത്തിയതായാണ് എൻഡിടിവി റിപ്പോര്‍ട്ട്. ഹുറീയത്തിൻ്റെ രണ്ട് ഘടകങ്ങളെയും കേന്ദ്രസര്‍ക്കാര്‍ നിരോധിക്കാൻ ഒരുങ്ങുന്നുവെന്ന വാര്‍ത്തകള്‍ക്കു ദിവസങ്ങള്‍ക്കു ശേഷമാണ് സ്ഥാപക നേതാവിൻ്റെ അന്ത്യം. നിരോധന വാര്‍ത്തകള്‍ക്കു പിന്നാലെ തെഹ്റീക്കി ഹുറീയത്തിൻ്റെ ബോര്‍ഡ് ഗീലാനിയുടെ കുടുംബവീട്ടിൽ നിന്ന് മാറ്റിയതും വാര്‍ത്തയായിരുന്നു.

1972 മുതൽ 1987 വരെ കശ്മീരിലെ സോപോര്‍ മണ്ഡലത്തിൽ നിന്നുള്ള നിയമസഭാംഗമായിരുന്നു ഗീലാനി. മുൻപ് ജമ്മു കശ്മീര്‍ ജമാ-അത്തെ ഇസ്ലാമിയിൽ അംഗമായിരുന്ന ഗീലാനി പിന്നീട് തെഹ്രീക്കെ ഹുറീയത്ത് സ്ഥാപിക്കുകയായിരുന്നു. ജമ്മു കശ്മീര്‍ വിഘടനവാദ ആശയങ്ങളെ പിന്തുണയ്ക്കുന്ന ചെറിയ സംഘടനകളുടെ കൂട്ടായ്മയായ ഹുറീയത്ത് കൗൺസിലിലെ അംഗമാണ് തെഹ്റീക്കെ ഹുറീയത്തും. അലി ഷാ ഗീലാനി കഴിഞ്ഞ വര്‍ഷമാണ് സജീവ രാഷ്ട്രീയപ്രവര്‍ത്തനം ഉപേക്ഷിച്ചത്.

Also Read: കശ്മീർ വിഷയത്തിൽ ഇടപടില്ല, ‘പഴയതെല്ലാം മറക്കാം’; ഇന്ത്യയോടു നിലപാട് വ്യക്തമാക്കി താലിബാൻ

ജമ്മു കശ്മീര്‍ മുൻ മുഖ്യമന്ത്രിയും പിഡിപി നേതാവുമായ മെഹബൂബ മുഫ്തി ഗീലാനിയുടെ മരണത്തിൽ അനുശോചിച്ചു. പല കാര്യങ്ങളിലും വിയോജിപ്പുണ്ടായിരുന്നെങ്കിലും ഗീലാനിയുടെ നിശ്ചയദാര്‍ഢ്യത്തിലും അടിയുറച്ച വിശ്വാസത്തിലും താൻ ഒപ്പമായിരുന്നുവെന്ന് മെഹബൂബ മുഫ്തി ട്വീറ്റ് ചെയ്തു. കുടുംബത്തിൻ്റെ ദുഃഖത്തിൽ പങ്കുചേരുന്നുവെന്നും അവര്‍ കൂട്ടിച്ചേര്‍ത്തു.

ആദ്യ ഭാര്യ മരിച്ചതിനെ തുടർന്ന് 1968ൽ പുനർവിവാഹിതനായ ഗീലാനിയ്ക്ക് എട്ട് മക്കളാണ് ഉള്ളത്. വർഷങ്ങളായി വൃക്ക രോഗത്തിനു ചികിത്സയിലായിരുന്ന ഗീലാനിയ്ക്ക് വാർധ്യ സഹജമായ മറ്റു ബുദ്ധിമുട്ടുകളും ഉണ്ടായിരുന്നുവെന്നാണ് റിപ്പോർട്ടുകൾ. ബുധനാഴ്ച രാത്രി പത്തരയോടെയാണ് അന്ത്യം സംഭവിച്ചതെന്നാണ് അടുത്ത ബന്ധുക്കളെ ഉദ്ധരിച്ചുള്ള ദ വയർ റിപ്പോർട്ട്.