മൂന്ന് വയസ് കഴിഞ്ഞ കുട്ടികള്‍ക്കും കൊവിഡ് വാക്‌സിൻ; അനുമതി നൽകി ചൈന

ബീജിങ്: മൂന്ന് വയസ് കഴിഞ്ഞ കുട്ടികൾക്ക് കൊറോണവാക് കൊവിഡ് വാക്സിന്‍റെ അടിയന്തര ഉപയോഗത്തിന് അനുമതി നൽകി ചൈന. മൂന്ന് വയസിനും 17 വയസിനും ഇടയിൽ പ്രായമുള്ളവരിൽ അടിയന്തര ഉപയോഗത്തിനുള്ള അനുമതി വാക്‌സിന് ലഭിച്ചതായി മരുന്ന് നിർമ്മാണ കമ്പനിയായ സിനോവാക്കിന്‍റെ ചെയർമാൻ യിൻ വെയ്ഡോങ്ങാണ് അറിയിച്ചത്.

“എന്നാൽ വാക്സിൻ എപ്പോൾ അടിയന്തര ഉപയോഗത്തിന് എത്തുമെന്നും എത്ര പ്രായമുളള കുട്ടികളിലാണ് ആദ്യം കുത്തിവെക്കേണ്ടത് എന്നതിലും ഇതുവരെ തീരുമാനമെടുത്തിട്ടില്ലെന്ന്” സിനോവാക് ചെയർമാൻ പറഞ്ഞതായി ഗ്ലോബൽ ടൈംസ് റിപ്പോർട്ട് ചെയ്തു. കൊറോണവാക് വാക്‌സിന്‍റെ ആദ്യ രണ്ട് ഘട്ട പരീക്ഷണങ്ങള്‍ സിനോവാക് പൂര്‍ത്തിയാക്കിയിരുന്നു.

Also Read : ‘ഇറുകിയ പാന്‍റ്സ് ധരിച്ചു’; വനിതാ എംപിയോട് പുറത്തുപോകാൻ ആവശ്യപ്പെട്ട് ടാൻസാനിയ സ്പീക്കർ, വിവാദം



കൊറോണവാകിന്‍റെ ക്ലിനിക്കൽ പരീക്ഷണത്തിൽ മൂന്നിനും 17നും ഇടയിൽ പ്രായമുള്ള നൂറുകണക്കിനുപേര്‍ ഭാഗമായിരുന്നു. മുതിര്‍ന്നവര്‍ക്ക് എന്നതുപോലെ വാക്‌സിൻ കുട്ടികള്‍ക്കും സുരക്ഷിതവും കാര്യക്ഷവുമാണെന്ന് കണ്ടെത്തിയെന്നും സിനോവാക് ചെയര്‍മാന്‍ ചൈന സെൻട്രൽ ടെലിവിഷൻ (സിസിടിവി)യ്ക്ക് നൽകിയ അഭിമുഖത്തിൽ നേരത്തെ പറഞ്ഞു.

ചൈനയുടെ രണ്ടാമത്തെ കൊവിഡ് വാക്‌സിന് ജൂണ്‍ ഒന്നിന് ലോകാരോഗ്യ സംഘടന അനുമതി നല്‍കിയിരുന്നു. ഈ വാക്സിൻ ചൈനയുടെ വാക്‌സിന്‍ നയതന്ത്രം ശക്തിപ്പെടുത്തുമെന്നാണ് പ്രതീക്ഷിക്കുന്നത്. നേരത്തെ ചൈനയുടെ സിനോഫാം വാക്സിനും ലോകാരോഗ്യ സംഘടന അനുമതി നൽകിയിരുന്നു.

‘നമ്മുടെ സംസ്കാരത്തിനും ജനാധിപത്യത്തിനും നിരക്കാത്ത ഉത്തരവ്’; മലയാളം വിലക്കിയ സംഭവത്തിൽ പിണറായി വിജയൻ

രാജ്യത്തുടനീളമായി ഇതുവരെ 763 മില്യൺ ഡോസ് വാക്സിൻ കുത്തിവെച്ചെന്നാണ് ചൈനയിലെ നാഷണല്‍ ഹെല്‍ത്ത് കമ്മീഷൻ പറയുന്നത്. രാജ്യത്ത് അഞ്ച് വാക്സിനുകൾക്കാണ് ഇതുവരെ അടിയന്തര ഉപയോഗത്തിന് അനുമതി നല്‍കിയിട്ടുള്ളത്.