ഡൊഡോമ: ലോകം ഏറെ പുരോഗമിച്ചെന്ന് പറയുമ്പോഴും വസ്ത്ര ധാരണത്തെ ചൊല്ലിയുള്ള സദാചാര പ്രശ്നങ്ങൾ ഇന്നും പതിവ് കാഴ്ചയാണ്. സാധാരണക്കാരുടേത് മുതൽ സിനിമാ താരങ്ങളുടെ വരെ ചിത്രങ്ങൾക്ക് താഴെ മോശം കമന്‍റുമായെത്തുന്നവരെ സോഷ്യൽ മീഡിയയിലാണ് കൂടുതലും കാണുന്നത്. എന്നാൽ വസ്ത്ര ധാരണത്തെച്ചൊല്ലി ഒരു എംപിയ്ക്ക് സദാചാര പ്രശ്നങ്ങൾ നേരിടേണ്ടി വന്നിരിക്കുകയാണ്. അതും പാർലമെന്‍റിൽ. ‘ഇറുകിയ പാന്‍റ്സ് ധരിച്ചെന്ന്’ പറഞ്ഞ് വനിതാ പാർലമെന്‍റ് അംഗത്തിനോട് സ്പീക്കർ പുറത്തുപോകാൻ ആവശ്യപ്പെട്ടെന്ന വാർത്തയാണ് അന്താരാഷ്ട്ര തലത്തിൽ ചർച്ചയാകുന്നത്. ടാൻസാനിയയിലെ വനിതാ എംപിക്കാണ് ഇത്തരം ദുരനുഭവം ഉണ്ടായതെന്ന് ടൈംസ് നൗവാണ് റിപ്പോർട്ട് ചെയ്തത്.

​ദുരനുഭവം നേരിട്ടത് കണ്ടസ്റ്റർ സിക്വാലേയ്ക്ക്

ടാൻസാനിയൻ എംപിയായ കണ്ടസ്റ്റർ സിക്വാലേയ്ക്കാണ് ‘ഇറുകിയ വസ്ത്രം ധരിച്ച്’ പാർലെമന്‍റിലെത്തിയെന്നാരോപിച്ചുള്ള ദുരനുഭവം നേരിടേണ്ടി വന്നത്. എംപി ധരിച്ച ‘പാന്‍റ്സ് ഇറുകിയതാണെന്നാണ്’ സദാചാര പ്രശ്നമായി സഭയിലെ ചില അംഗങ്ങൾ ഉയർത്തിക്കാട്ടിയത്. ഒരു പുരുഷ എംപിയാണ് സിക്വാലേയുടെ വസ്ത്ര ധാരണം സഭയിൽ ഉയർത്തിയത്. തുടർന്ന് സ്പീക്കർ ഇടപെട്ടതോടെ സംഭവം വിവാദമാവുകയായിരുന്നു.

​മാന്യമല്ലാത്ത വസ്ത്രമെന്ന് വിമർശനം

ഭരണ കക്ഷി അംഗവും സിക്വാലേയുടെ സഹപ്രവർത്തകനുമായ ഹുസൈൻ അമറാണ് വനിതാ അംഗങ്ങളുടെ വസ്ത്ര ധാരണത്തെക്കുറിച്ച് പരാതിപ്പെട്ടത്. ചില എംപിമാർ മാന്യമല്ലാത്ത വസ്ത്രം ധരിക്കുന്നെന്ന് അദ്ദേഹം സ്പീക്കറോട് പറയുകയായിരുന്നു. പാർലമെന്‍റ് ടാൻസാനിയയുടെ കണ്ണാടിയാണെന്നും അതുകൊണ്ട് വനിതാ എംപിമാർ അവർ ധരിക്കുന്ന വസ്ത്രങ്ങളുടെ കാര്യത്തിൽ ശ്രദ്ധാലുവായിരിക്കണണെന്നും അമർ കൂട്ടിച്ചേർത്തു.

​മാന്യമായ വസ്ത്രം ധരിച്ച് വരണമെന്ന് സ്പീക്കർ

പാർലമെന്‍റിൽ വനിതാ അംഗത്തിന്‍റെ വസ്ത്ര ധാരണം ചർച്ചയായതിന് പിന്നാലെ വിഷയത്തിൽ ഇടപെട്ട സ്പീക്കർ സിക്വാലേയോട് പുറത്തുപോയി നല്ലരീതിയില്‍ വസ്ത്രം ധരിച്ച് തിരിച്ചുവരാൻ ആവശ്യപ്പെടുകയായിരുന്നു. ജൂൺ ഒന്നിനാണ് വിവാദമായ സംഭവം നടന്നതെന്നാണ് റിപ്പോർട്ടുകൾ വ്യക്തമാക്കുന്നത്. എന്നാൽ സ്പീക്കറുടെ ആവശ്യപ്രകാരം എംപി സഭ വിട്ട് പുറത്ത് പോയിരുന്നോ എന്ന് വ്യക്തമല്ല. അതേസമയം സംഭവത്തിനെതിരെ മറ്റു വനിതാ എംപിമാർ പ്രതിഷേധിക്കുകയായിരുന്നു.

​വസ്ത്ര ധാരണം മാന്യമായിരുന്നെന്ന് വനിതാ എംപിമാർ

കണ്ടസ്റ്റർ സിക്വാലേയോട് സ്പീക്കർ പുറത്ത് പോകാൻ ആവശ്യപ്പെട്ടതിന് പിന്നാലെ തന്നെ പ്രതിഷേധവുമായി മറ്റ് വനിതാ എംപിമാർ രംഗത്തെത്തുകയും ചെയ്തു. സിക്വാലേയ്ക്കെതിരായ നടപടി ശരിയായില്ലെന്നും അവർ നല്ല രീതിയിലാണ് വസ്ത്രം ധരിച്ചതെന്നും വിവാദ നടപടയിൽ ക്ഷമ ചോദിക്കണമെന്നുമാണ് സഹപ്രവർത്തകർ ആവശ്യപ്പെട്ടത്. സിക്വാലേയ്ക്കെതിരായ നടപടി അംഗീകരിക്കാനാകില്ലെന്നും ഇവർ ചൂണ്ടിക്കാട്ടി.

​പ്രതിഷേധവുമായി സോഷ്യൽ മീഡിയയും

എംപിമാരുടെ പ്രതിഷേധത്തിന് പിന്നാലെ സംഭവം സോഷ്യൽ മീഡിയയിലും ചർച്ചയായിരിക്കുകയാണ്. സിക്വേല ധരിച്ചിരുന്ന വസ്ത്രത്തിന് ഒരു കുഴപ്പവുമില്ലെന്ന് എംപിമാരായ ജാക്വിലിന്‍ എന്‍ഗൊന്യാനി, സ്റ്റെല്ല മന്യന്യ എന്നിവർ പറഞ്ഞതിന് പിന്നാലെയാണ് വനിതാ സംഘടനകളും സോഷ്യൽ മീഡിയയും സ്പീക്കറുടെ നടപടിക്കെതിരെ രംഗത്തെത്തിയത്.