‘കേരളം ഇനി പൂർണമായി അടച്ചിടില്ല’; ക്വാറൻ്റൈൻ ലംഘിച്ചാൽ കനത്ത പിഴ, നിർദേശവുമായി മുഖ്യമന്ത്രി

തിരുവനന്തപുരം: കേരളം ഇനിയും പൂർണമായി അടച്ചിടില്ലെന്ന് മുഖ്യമന്ത്രി പിണറായി വിജയൻ. പൂർണമായ അടച്ചിടൽ സംസ്ഥാനത്ത് ഇനിയും പ്രായോഗികമല്ല. വാർഡുതല സമിതികൾ ശക്തിപ്പെടുത്തിയുള്ള പ്രതിരോധ പ്രവർത്തനങ്ങളാണ് ആവശ്യം. കൊവിഡിൻ്റെ രണ്ടാം തരംഗത്തിൽ വാർഡുതല സമിതികളുടെ പ്രവർത്തനം പിന്നോട്ട് പോയെന്നും തദ്ദേശ പ്രതിനിധികളുടെ യോഗത്തിൽ മുഖ്യമന്ത്രി വ്യക്തമാക്കി.



കോൺഗ്രസിന് വീണ്ടും തിരിച്ചടി; പി എസ് പ്രശാന്ത് സിപിഎമ്മിൽ ചേർന്നു

ഒരു ഘട്ടത്തിൽ വാർഡുതല സമിതികൾ മികച്ച രീതിയിൽ മുന്നോട്ട് പോയെങ്കിലും കൊവിഡിൻ്റെ രണ്ടാം ഘട്ടത്തിൽ വാർഡുതല സമിതികൾ പിന്നോട്ട് പോകുകയും ജാഗ്രതയിൽ കുറവ് വരുകയും ചെയ്തു. വാർഡുതല സമിതികളിൽ പോലീസിൻ്റെ സാന്നിധ്യമുണ്ടാവണം. കൊവിഡ് കേസുകൾ രണ്ടാഴ്ചയ്ക്കുള്ളിൽ നിയന്ത്രണത്തിലാക്കണം. രോഗികളുടെ എണ്ണം കുറയ്ക്കാനും സാധിക്കണം. ഇതിനായി തദ്ദേശസ്ഥാപനങ്ങൾ സടകുടഞ്ഞ് എഴുന്നേൽക്കണമെന്നും മുഖ്യമന്ത്രി പിണറായി വിജയൻ പറഞ്ഞു.

നിരീക്ഷണങ്ങളിൽ കഴിയേണ്ടവർ പല സ്ഥലങ്ങളിലും പുറത്തിറങ്ങി നടക്കുകയാണ്. ഇത്തരക്കാരെ നിരീക്ഷിക്കാൻ അയൽപക്ക നിരീക്ഷണ സമിതികൾ രൂപീകരിക്കണം. ഇവരിൽ നിന്ന് പിഴ ഈടാക്കുകയും പ്രത്യേക ക്വാറൻ്റൈൻ കേന്ദ്രങ്ങളിലാക്കുകയും വേണം. ക്വാറൻ്റൈൻ ചെലവ് ഇവരിൽ നിന്ന് ചെലവാക്കണം. സിഎഫ്എൽടിസികൾ പലയിടത്തും നിർജീവമാണ്. തദ്ദേശ സ്ഥാപനങ്ങൾക്ക് അത് നടത്തിക്കാൻ സാമ്പത്തിക പ്രയാസമുണ്ടെങ്കിൽ സർക്കാർ സഹായം നൽകുമെന്നും കൊവിഡ് പ്രതിരോധം വിലയിരുത്താന്‍ വിളിച്ചു ചേര്‍ത്ത തദ്ദേശപ്രതിനിധികളുടെ യോഗത്തിൽ മുഖ്യമന്ത്രി വ്യക്തമാക്കി.

ഈ മാസം 18 വയസിന് മുകളിലുള്ള മുഴുവന്‍ പേര്‍ക്കും ആദ്യ ഡോസ് വാക്‌സിന്‍? വിവരങ്ങൾ പങ്കുവച്ച് ആരോഗ്യ മന്ത്രി

അതേസമയം, സംസ്ഥാനത്ത് 18 വയസിന് മുകളിലുള്ള 75 ശതമാനത്തിലധികം പേര്‍ക്ക് കൊവിഡ്-19 പ്രതിരോധ വാക്സിൻ്റെ ആദ്യ ഡോസ് നൽകിയതായി ആരോഗ്യ മന്ത്രി വിണാ ജോർജ് അറിയിച്ചു. പ്രായപൂർത്തിയായ 2,15,27,035 പേർക്ക് ആദ്യ ഡോസ് വാക്സിൻ നൽകി. ഈ വിഭാഗത്തില്‍ 27.74 ശതമാനം പേര്‍ക്ക് (79,60,935) രണ്ടാം ഡോസും നല്‍കി. വാക്‌സിനേഷന്‍ യജ്ഞത്തിന്റെ ഭാഗമായി സംസ്ഥാനം നടത്തിയ ഊര്‍ജിത ശ്രമങ്ങളാണ് ഇത്ര വേഗം ഈ ലക്ഷ്യം കൈവരിക്കാനായതെന്നും ഫേസ്ബുക്ക് പോസ്റ്റിലൂടെ മന്ത്രി വ്യക്തമാക്കി.

2021ലെ എസ്റ്റിമേറ്റ് ജനസംഖ്യ പ്രകാരം ഇത് യഥാക്രമം 60.81 ശതമാനവും 22.49 ശതമാനവുമാണ്. ഇതോടെ ഒന്നും രണ്ടും ഡോസ് ഉള്‍പ്പെടെ ആകെ 2,94,87,970 പേര്‍ക്കാണ് വാക്‌സിന്‍ നല്‍കിയത്. ഓഗസ്റ്റ് മാസത്തില്‍ മാത്രം 88 ലക്ഷത്തിലധികം ഡോസ് വാക്‌സിന്‍ നല്‍കാനായി. ഈ മാസത്തില്‍ തന്നെ 18 വയസിന് മുകളിലുള്ള മുഴുവന്‍ പേര്‍ക്കും ആദ്യ ഡോസ് വാക്‌സിന്‍ നല്‍കാനാണ് സംസ്ഥാനം സര്‍ക്കാര്‍ ലക്ഷ്യമിടുന്നത്. ഇതിന് കൂടുതല്‍ വാക്‌സിന്‍ ആവശ്യമാണ്. സംസ്ഥാനത്ത് വീണ്ടും വാക്‌സിന്‍ ക്ഷാമം നേരിടുകയാണ്. മിക്കവാറും ജില്ലകളില്‍ വാക്‌സിന്‍ ക്ഷാമമുണ്ട്. വാക്‌സിനേഷന്‍ സുഗമമായി നടത്താന്‍ കേന്ദ്രത്തോട് കൂടുതല്‍ വാക്‌സിന്‍ ആവശ്യപ്പെട്ടിട്ടുണ്ട്. സംസ്ഥാനത്ത് കോവിഡ് വ്യാപനം വര്‍ധിക്കുന്നതിനാല്‍ പരമാവധി പേര്‍ക്ക് വാക്‌സിന്‍ നല്‍കി സുരക്ഷിതമാക്കാനാണ് ശ്രമിക്കുന്നതെന്നും മന്ത്രി വ്യക്തമാക്കി.

കേരളത്തിൽ വീണ്ടും വാക്സിൻ ക്ഷാമമുണ്ടെന്ന് മന്ത്രി പറഞ്ഞിരുന്നു. സംസ്ഥാനത്ത് 6 ജില്ലകളില്‍ കൊവിഷീല്‍ഡ് വാക്‌സിന്‍ പൂര്‍ണമായും തീര്‍ന്നു. കൊല്ലം, കോട്ടയം, എറണാകുളം, തൃശൂര്‍, കോഴിക്കോട്, കണ്ണൂര്‍ ജില്ലകളിലാണ് കൊവീഷില്‍ഡ് വാക്‌സിന്‍ തീര്‍ന്നത്.