സിന്ധുവിനെ കൊലപ്പെടുത്തിയത് ശ്വാസം മുട്ടിച്ച്; മർദ്ദനത്തിൽ വാരിയെല്ലുകൾ പൊട്ടി: പോസ്റ്റ്മോർട്ടം റിപ്പോർട്ട്

കൊച്ചി: പണിക്കൻകുടിയിലെ സിന്ധുവിനെ (45) കൊലപ്പെടുത്തിയത് ശ്വാസം മുട്ടിച്ചെന്ന് പോസ്റ്റ്മോർട്ടം റിപ്പോർട്ട്. ക്രൂരമർദ്ദനത്തിൽ സിന്ധുവിന്റെ വാരിയെല്ലുകൾ ഒടിഞ്ഞതായാണ് പോസ്റ്റ്മോർട്ടം റിപ്പോർട്ട് വ്യക്തമാക്കുന്നത്. ഇന്ന് രാവിലെയാണ് ഫോറൻസിക് വിദഗ്ദരെത്തി മൃതദേഹം പുറത്തെടുത്തത്. മകനും സഹോദരനും എത്തിയാണ് മൃതദേഹം കാമാക്ഷി താമഠത്തിൽ സിന്ധുവിന്റേതാണെന്ന് തിരിച്ചറിഞ്ഞത്.



പണിക്കൻകുടി മാണിക്കുന്നേൽ ബിനോയിയുടെ വീട്ടിലെ അടുപ്പിനു കീഴിൽ നിന്നുമാണ് സിന്ധുവിന്റെ മൃതദേഹം കണ്ടെത്തിയത്. വീടിന്റെ ഉടമ ബിനോയിയുടെ (56) പേരിൽ കൊലക്കുറ്റം ചുമത്തി പോലീസ് കേസ് രജിസ്റ്റർ ചെയ്തു. രണ്ടാഴ്ചയായി ബിനോയി ഒളിവിലാണ്. പ്രതിക്കായി പോലീസ് അന്വേഷണം ഊർജ്ജിതമാക്കി.

യൂബർ മോഡലിൽ ഓൺലൈൻ ഓട്ടോ ടാക്സി സർവ്വീസ് തുടങ്ങാൻ സർക്കാർ

ഇടുക്കി തഹസിൽദാരുടേയും ഉന്നത പോലീസ് ഉദ്യോഗസ്ഥരുടേയും സാന്നിധ്യത്തിലാണ് സിന്ധുവിന്റെ മൃതദേഹം പുറത്തെടുത്തത്. പ്ലാസ്റ്റിക്ക് ഉപയോഗിച്ച് മുഖം മറച്ചിരുന്നു. നഗ്നമായ നിലയിലായിരുന്നു മൃതദേഹം. തെളിവ് നശിപ്പിക്കുന്നതിനായി പ്രതി കുഴിയിൽ മുളക് പൊടി വിതറിയിരുന്നു. മൂക്കുത്തി ഒഴികെയുള്ള ആഭരണങ്ങൾ പ്രതി അഴിച്ചെടുത്തിട്ടുണ്ട്. അഴുകിയ നിലയിലാണ് മൃതദേഹം കണ്ടെത്തിയത്. കോട്ടയം മെഡിക്കൽ കോളേജിൽ വെച്ചായിരുന്നു പോസ്റ്റ്മോർട്ടം.

ശ്വാസം മുട്ടിക്കുന്നതിനിടെ സിന്ധുവിന് മർദ്ദനമേറ്റെന്നാണ് പോസ്റ്റ്മോർട്ടത്തിൽ വ്യക്തമായിരിക്കുന്നത്. വാരിയെല്ലുകൾ ഒടിഞ്ഞ് അകന്ന നിലയിലാണ്.

കഴിഞ്ഞ 12 മുതലാണ് സിന്ധുവിനെ കാണാതായത്. പണിക്കൻ കുടിയിൽ വാടക വീടെടുത്ത് ഇളയ മകനോടൊപ്പമാണ് സിന്ധു താമസിച്ചിരുന്നത്. അന്വേഷണം നടക്കുന്നതിനിടെയാണ് അയൽവാസിയായ ബിനോയി ഒളിവിൽ പോയത്. ഇതോടെയാണ് സിന്ധുവിന്റെ തിരോധാനത്തിനു പിന്നിൽ ബിനോയിക്ക് പങ്കുണ്ടെന്ന സംശയം ഉയർന്നത്.

സിന്ധുവിനെ കാണാതായതിന്റെ തലേന്ന് വീട്ടിൽ വഴക്കുണ്ടായതായാണ് ബന്ധുക്കൾ പറയുന്നത്. സിന്ധുവിനെ കാണാതാകുമ്പോൾ പോലീസ് അന്വേഷണത്തിൽ അലംഭാവം കാണിച്ചെന്നാണ് ബന്ധുക്കൾ ആരോപിക്കുന്നത്.

അകന്നു കഴിയുന്ന ഭർത്താവിന് കാൻസർ ബാധിച്ചപ്പോൾ സിന്ധു കാണാൻ പോയതാണ് ബിനോയിയെ പ്രകോപിപ്പിച്ചതെന്നാണ് വിവരം. ഇതുമായി ബന്ധപ്പെട്ട തർക്കം കൊലപാതകത്തിൽ കലാശിക്കുകയായിരുന്നു. ഭർത്താവ് ബാബുവുമായി അകന്നു കഴിയുന്ന സിന്ധു അഞ്ച് വർഷമായി ബിനോയിയുടെ വീടിനു സമീപത്താണ് താമസിച്ചിരുന്നത്. ഇരുവരും അടുപ്പത്തിലായിരുന്നു. ബാബുവിന് ഈയിടെ കാൻസർ ബാധിക്കുകയും കോട്ടയം മെഡിക്കൽ കോളേജിൽ ചികിത്സ തേടുകയും ചെയ്തിരുന്നു. ഇതിനിടെയാണ് എതിർപ്പ് വകവെയ്ക്കാതെ സിന്ധു ബാബുവിനെ കാണാൻ പോയത്.

പോലീസുകാരെ കുടുക്കിയ ആ സുന്ദരി ആര്? ആലപ്പുഴയിലെ പോലീസുകാരന് നഷ്ടമായത് ലക്ഷങ്ങൾ

മകനെ സഹോദരിയുടെ വീട്ടിൽ കൂട്ടുകിടക്കാൻ പറഞ്ഞയച്ച ശേഷമാണ് ബിനോയി സിന്ധുവിനെ വകവരുത്തിയത്. മൃതദേഹം അടുക്കളയിൽ കുഴിച്ചിട്ട ശേഷം ചാണകം ഉപയോഗിച്ച് തറ മെഴുകി. മുകളിൽ അടുപ്പ് നിർമ്മിച്ചു. ഇതിനു മുകളിൽ ജാതിപത്രി ഉണങ്ങാനിടുകയും ചെയ്തു. തെളിവ് നശിപ്പിക്കാനായിരുന്നു പ്രതിയുടെ ശ്രമം. അടുക്കളയിൽ നാലടിയോളം ആഴമുള്ള കുഴിയിൽ ചമ്രംപടിഞ്ഞിരിക്കുന്ന നിലയിലായിരുന്നു മൃതദേഹം. തലയിൽ പ്ലാസ്റ്റിക്ക് കവർ ഇട്ടിരുന്നു. അടുക്കളയുടെ ഭിത്തി പൊളിച്ചു മാറ്റിയ ശേഷമാണ് മൃതദേഹം പുറത്തെടുത്തത്.

സിന്ധുവിന്റെ സഹോദരന്റെ കേസുമായി ബന്ധപ്പെട്ട് ആറ് വർഷം മുമ്പ് കോടതിയിൽ എത്തിയപ്പോഴാണ് സിന്ധുവും ബിനോയിയും പരിചയപ്പെട്ടത്. മറ്റൊരു ക്രിമിനൽ കേസിൽ കോടതിയിൽ എത്തിയതായിരുന്നു ബിനോയി. ബിനോയി മുൻകയ്യെടുത്താണ് സിന്ധുവിനെ വീടിനു സമീപത്ത് വാടകയ്ക്ക് താമസിപ്പിച്ചത്. 2013 ൽ ഭാര്യയുമായി ബിനോയി ബന്ധം വേർപെടുത്തിയിരുന്നു. നിരവധി ക്രമിനൽ കേസുകളിൽ ബിനോയി പ്രതിയാണ്. ബിനോയിക്ക് സംശയ രോഗം ഉണ്ടായിരുന്നതിനാൽ സിന്ധുവിനെ മറ്റെങ്ങും പോകാൻ അനുവദിച്ചിരുന്നില്ല.