പാർട്ടിയിൽ സൗഹാർദ അന്തരീക്ഷം ഉണ്ടാകണമെന്ന് തിരുവഞ്ചൂർ; സതീശനുമായി കൂടിക്കാഴ്ച നടത്തി

കോട്ടയം: ഡിസിസി അധ്യക്ഷന നിയമനവുമായി ബന്ധപ്പെട്ട് വിവാദങ്ങൾ തുടരുന്നതിനിടെ പ്രതിപക്ഷ നേതാവ് വി ഡി സതീശൻ തിരുവഞ്ചൂർ രാധാകൃഷ്ണനെ വീട്ടിലെത്തി കണ്ടു. എല്ലാവരെയും കാണുന്നതിൻ്റെ ഭാഗമായിട്ടാണ് പ്രതിപക്ഷനേതാവ് വീട്ടിൽ എത്തിയതെന്ന് തിരുവഞ്ചൂർ വ്യക്തമാക്കി.



സംസ്ഥാനത്ത് നിപ ഇത് മൂന്നാം വട്ടം, പ്രതിരോധം പ്രധാനം: നിപ വൈറസ് അറിയേണ്ടതെല്ലാം

എല്ലാവരെയും ഒന്നിച്ച് കൊണ്ട് പോകണമെന്നാണ് അവരുടെ ആഗ്രഹം. തൻ്റെ നിലപാടും അത് തന്നെയാണ്. എഐസിസിക്കും കെപിസിസിക്കും പിന്നിൽ എല്ലാവരും അണിനിരക്കണം. പാർട്ടിയിൽ സൗഹാർദ അന്തരീക്ഷം ഉണ്ടാകണമെന്നും സതീശനുമായി നടന്ന കൂടിക്കാഴ്ചയ്ക്ക് ശേഷം തിരുവഞ്ചൂർ വ്യക്തമാക്കി. നിർണായക യുഡിഎഫ് യോഗം ചേരാനിരിക്കെയാണ് സതീശൻ ഉമ്മൻ ചാണ്ടിയുമായും തിരുവഞ്ചൂരുമായും ചർച്ച നടത്തിയത്.

നേരത്തെ പുതുപ്പള്ളിയിലെത്തി വി ഡി സതീശൻ ഉമ്മൻ ചാണ്ടിയുമായി കൂടിക്കാഴ്ച നടത്തിയിരുന്നു. മുതിർന്ന നേതാക്കൾക്ക് എന്തെങ്കിലും തരത്തിലുള്ള അഭിപ്രായ വ്യത്യാസങ്ങൾ ഉണ്ടെങ്കിൽ അത് പരിഹരിച്ച് മുന്നോട്ട് പോകുമെന്ന് വി ഡി സതീശൻ മാധ്യമ പ്രവർത്തകരുമായി സംസാരിക്കുന്നതിനിടെ വ്യക്തമാക്കി. “മുതിർന്ന നേതാക്കൾക്ക് പ്രയാസമുണ്ടാക്കുന്ന ഒരു സാഹചര്യവും ഉണ്ടാകില്ല. കോൺഗ്രസ് ജനാധ്യപത്യ പാർട്ടിയാണ്. ചർച്ചകളിലൂടെ പ്രശ്നം പരിഹരിച്ച് മുന്നോട്ട് പോകും. പിണക്കങ്ങൾ ഉണ്ടാകുമ്പോൾ ഇണക്കത്തിൻ്റെ ശക്തി കൂടും. അതിൽ കീഴടങ്ങലോ വിധേയത്വമോ ഇല്ല. അനുവാദം ചോദിക്കാതെ പുതുപ്പള്ളിയിലേക്ക് വരാനുള്ള സ്വാതന്ത്ര്യം തനിക്കുണ്ട്. രമേശ് ചെന്നിത്തലയെയും നേരിൽ കാണും” – എന്നും അദ്ദേഹം വ്യക്തമാക്കി.

ഞായറാഴ്ചത്തെ ലോക്ക്ഡൗണും രാത്രികാല കര്‍ഫ്യൂവും തുടരും; നിർദേശം ലംഘിച്ചാൽ കർശന നടപടിയെന്ന് മുഖ്യമന്ത്രി

കോൺഗ്രസ് പാർട്ടിയിൽ മുൻപും പ്രശ്നങ്ങൾ ഉണ്ടായിട്ടുണ്ടെന്ന് വി ഡി സതീശൻ പറഞ്ഞു. പ്രശ്നങ്ങൾ പരിഹരിച്ച് മുന്നോട്ട് പോയ ചരിത്രമാണ് കോൺഗ്രസിനുള്ളത്. കോൺഗ്രസ് നേതാക്കൾക്ക് ഉരുളയ്ക്ക് ഉപ്പേരി പോലെ മറുപടി പറയുകയല്ല പ്രതിപക്ഷ നേതാവ് എന്ന നിലയിൽ തൻ്റെ ജോലി. മുഖ്യമന്ത്രിക്കും ബിജെപിക്കും മറുപടി നൽകുകയാണ് തൻ്റെ ദൗത്യം. എന്നാൽ കോൺഗ്രസിൽ പ്രശ്നങ്ങൾ ഇല്ലെന്ന് പറഞ്ഞ് കണ്ണടച്ച് ഇരുട്ടാക്കുന്നില്ലെന്നും അദ്ദേഹം കൂട്ടിച്ചേർത്തു.

വി ഡി സതീശനുമായി നടന്ന ചർച്ചകളോട് അനുഭാവപൂർവ്വം പ്രതികരിക്കുമെന്ന് ഉമ്മൻ ചാണ്ടി വ്യക്തമാക്കി. “പഴയ കാര്യങ്ങൾ പറയാനില്ല. ചർകളാണ് കോൺഗ്രസിൻ്റെ ശൈലി. കോൺഗ്രസാണ് വലുത്. കോൺഗ്രസ് ഫസ്റ്റും, ഗ്രൂപ്പ് സെക്കൻഡുമാണ്. കോൺഗ്രസിൽ ചില പ്രശ്നങ്ങളുണ്ട്. ബുദ്ധിമുട്ടേറിയ സാഹചര്യങ്ങൾ ഉണ്ടായതിൽ വേദനയുണ്ട്. ചർച്ചകളിലൂടെ ഈ പ്രശ്നങ്ങൾ പരിഹരിക്കും. പ്രതിപക്ഷ നേതാവിൻ്റെ അഭിപ്രായത്തോട് യോജിക്കുന്നുണ്ട്” – എന്നും കൂടിക്കാഴ്ചയ്ക്ക് ശേഷം ഉമ്മൻ ചാണ്ടി വ്യക്തമാക്കി.

‘സാറും മേഡവും വിളി വേണ്ട’; കോൺഗ്രസ് ഭരിക്കുന്ന പഞ്ചായത്തുകൾക്ക് നിർദ്ദേശവുമായി കെപിസിസി

പ്രശ്നങ്ങൾ പരിഹരിക്കാനുള്ള ശ്രമം തുടരുന്നതിനിടെ ഉമ്മൻ ചാണ്ടിക്കും രമേശ് ചെന്നിത്തലയ്ക്കുമെതിരെ ഒരു വിഭാഗം നേതാക്കൾ ഹൈക്കമാൻഡിൽ പരാതി നൽകി. കെപിസിസി പ്രസിഡൻ്റ് കെ സുധാകരനെയും വി ഡി സതീശനെയും പിന്തുണയ്ക്കുന്ന ഒരു വിഭാഗമാണ് ഹൈക്കമാൻഡിന് പരാതി നൽകിയത്. മുതിർന്ന നേതാക്കളായ ഉമ്മൻ ചാണ്ടിയും രമേശ് ചെന്നിത്തലയും പാർട്ടിയിൽ കലാപം ഉണ്ടാക്കാൻ ശ്രമിക്കുകാണ്. പുതിയ നേതൃത്വത്തെ അംഗീകരിക്കാൻ ഇവർ ശ്രമം നടത്തുന്നില്ല. ഈ സാഹചര്യം നേരിടാൻ ഹൈക്കമാൻഡിൻ്റെ ഇടപെടൽ ആവശ്യമാണെന്നും ആരോപിച്ചാണ് ഇവർ പരാതി നൽകിയത്.