ബീച്ചിൽ പോയി കുളിക്കണം; ഒൻപതുകാരി കാറെടുത്ത് ഇറങ്ങി, കൂടെ നാല് വയസുള്ള അനുജത്തിയും: വീഡിയോ

​കാർ എടുത്ത് യാത്രയ്ക്കിറങ്ങിയത് പുലർച്ചെ

രക്ഷിതാക്കൾ കിടന്നുറങ്ങവെ പുലർച്ചെ മൂന്ന് മണിക്കാണ് ഒൻപത് വയസുകാരി കാറിന്‍റെ താക്കോൽ കൈക്കലാക്കി നാല് വയസുള്ള അനുജത്തിയുമായി ബീച്ചിലേക്ക് യാത്ര പുറപ്പെട്ടത്. അമേരിക്കയിലെ യുട്ടയിൽ നിന്നാണ് അസാധാരണമായ സംഭവം റിപ്പോർട്ട് ചെയ്തിരിക്കുന്നത്. ബീച്ചിലെത്തി കടലിലിറങ്ങി കുളിക്കുക എന്ന ലക്ഷ്യത്തോടെയായിരുന്നു ഇവർ കാറുമായി പുറപ്പെട്ടത്. രക്ഷിതാക്കൾ അറിയാതെ കാറുമായി വീടിന് പുറത്ത് കടക്കാൻ കഴിഞ്ഞെങ്കിലും യാത്ര പൂർത്തിയാക്കാൻ കുട്ടികൾക്ക് കഴിഞ്ഞില്ല.

​യാത്രയ്ക്കിടെ അപകടം

ബീച്ച് ലക്ഷ്യമാക്കി ദീർഘ യാത്രയ്ക്ക് ഒരുങ്ങിയ സഹോദരിമാർക്ക് തങ്ങളുടെ ആഗ്രഹം നിറവേറ്റാൻ കഴിഞ്ഞില്ലെന്ന് മാത്രമല്ല, വാഹനം അപകടത്തിൽപ്പെടുകയും ചെയ്തു. വെസ്റ്റ് ജോർദാനിലെ വീട്ടിൽ നിന്ന് യാത്ര ആരംഭിച്ച ഇവർ ഏഴ് മൈൽ പിന്നിട്ടപ്പോഴാണ് ഒരു ട്രക്കുമായി കൂട്ടി ഇടിക്കുന്നതും അപകടത്തിൽപ്പെടുന്നതും. ഇതോടെ യാത്ര മുടങ്ങുകയും പോലീസിന്‍റെ പിടിയിലാവുകയുമായിരുന്നു.

​സീറ്റ് ബെൽറ്റ് ധരിച്ചതിനാൽ പരിക്കില്ല

വാഹനം അപകടത്തിൽപ്പെട്ടെങ്കിലും രണ്ട് കുട്ടികൾക്കും പരിക്കൊന്നും പറ്റിയിരുന്നില്ല. സീറ്റ് ബെൽറ്റ് ധരിച്ച് ‘സുരക്ഷിതമായിട്ടായിരുന്നു’ കുട്ടികളുടെ യാത്രയെന്നാണ് പോലീസ് പറയുന്നത്. വാഹനം ഇടിച്ചതിന് പിന്നാലെ ട്രക്ക് ഡ്രൈവർ കാറിനെ പിന്തുടർന്നതോടെയാണ് വാഹനത്തിനുള്ളിൽ ഉള്ളത് ചെറിയ കുട്ടികളാണെന്ന് വ്യക്തമാകുന്നത്. കുട്ടികളുടെ കാർ യാത്രയുടെ ദൃശ്യങ്ങൾ വെസ്റ്റ് വാലി സിറ്റി പോലീസ് പുറത്തുവിട്ടിട്ടുമുണ്ട്.

​യാത്ര കൃത്യമായ ആസൂത്രണത്തോടെ

കാലിഫോർണിയയിലേക്ക് യാത്ര ചെയ്യാനായിരുന്നു സഹോദരിമാരുടെ പദ്ധതിയെന്നാണ് പോലീസ് ഉദ്യോഗസ്ഥൻ പറയുന്നത്. ഇതിനായി പുലർച്ചെ മൂന്ന് മണിക്ക് എഴുന്നേറ്റാണ് ഇവർ കാറുമായി കടന്ന് കളഞ്ഞത്. കുട്ടികളെ കാണാനില്ലെന്ന് വ്യക്തമായതോടെ ഞെട്ടലിലായിരുന്നു കുടുംബമെന്നും ഉദ്യോഗസ്ഥൻ പറഞ്ഞതായി ടൈംസ് നൗ റിപ്പോർട്ട് ചെയ്യുന്നു.

PHOTO Courtesy: WVC Police

പോലീസ് പങ്കുവെച്ച വീഡിയോ