ക്രിസ്ത്യൻ പുരോഹിതനെ സ്റ്റേഷനിൽ കയറി മർദ്ദിച്ചു; ചെരിപ്പ് ഉപയോഗിച്ച് അടിച്ചു, ആക്രമണം മതപരിവര്‍ത്തനം ആരോപിച്ച്

ഭോപ്പാൽ: നിർബന്ധിത മതപരിവർത്തനം ആരോപിച്ച് ക്രിസ്ത്യൻ പുരോഹിതന് പോലീസ് സ്റ്റേഷനുള്ളിൽ മർദ്ദനം. ഛത്തീസ്ഗഢ് തലസ്ഥാനമായ റായ്പൂരിലെ പുരാനി ബസ്തി പോലീസ് സ്റ്റേഷനിലാണ് സംഭവം. പോലീസ് നിർദേശം അവഗണിച്ച് കൂട്ടമായി എത്തിയ ഒരു വിഭാഗം അളുകൾ സ്റ്റേഷനിൽ വെച്ച് പോലീസ് സാന്നിധ്യത്തിൽ വൈദികനെ ക്രൂരമായി മർദ്ദിക്കുകയായിരുന്നു. സംഭവത്തിൻ്റെ ദൃശ്യങ്ങൾ സമൂഹമാധ്യമങ്ങളിലൂടെ പുറത്തുവന്നു.

പോലീസ് ഉദ്യോഗസ്ഥയെ തോക്ക് ചൂണ്ടി തട്ടിക്കൊണ്ട് പോയി പീഡിപ്പിച്ചു; യുവാവ് അറസ്റ്റിൽ

വൈദികൻ്റെ നേതൃത്വത്തിൽ നിർബന്ധിത മതപരിവർത്തനം നടക്കുന്നുവെന്ന പ്രചാരണം ശക്തമായതോടെയാണ് പ്രശ്നങ്ങളുടെ തുടക്കം. പരാതി ലഭിച്ചതോടെ വൈദികനെ പോലീസ് സ്റ്റേഷനിൽ എത്തിച്ചു. വൈദികൻ സ്റ്റേഷനിൽ എത്തിയ വിവരമറിഞ്ഞതോടെ ഹിന്ദു സംഘടനകളുടെ നേതൃത്വത്തിൽ ഒരു വിഭാഗം ആളുകൾ പ്രതിഷേധവുമായി എത്തി. സ്റ്റേഷൻ പരിസരത്ത് ആളുകൾ തടിച്ച് കൂടിയതോടെ എല്ലാവരോടും പിരിഞ്ഞ് പോകാൻ പോലീസ് ആവശ്യപ്പെട്ടെങ്കിലും ഫലമുണ്ടായില്ല.

ഒരു വിഭാഗം ആളുകൾ സ്റ്റേഷനുള്ളിൽ പ്രവേശിക്കുകയും പോലീസ് നിർദേശം അവഗണിച്ച് വൈദികനെ കയ്യേറ്റം ചെയ്യുകയും ചെയ്തു. തർക്കം രൂക്ഷമായ സാഹചര്യം കണക്കിലെടുത്ത് വൈദികനെ മറ്റൊരു മുറിയിലേക്ക് പോലീസ് മാറ്റിയെങ്കിലും പ്രതിഷേധക്കാർ മുറിയിലെത്തി വൈദികനെ ആക്രമിക്കുകയായിരുന്നു. പോലീസ് നോക്കി നിൽക്കെയാണ് അക്രമികൾ വൈദികനെ ചെരിപ്പും ഷൂവും ഉപയോഗിച്ച് മർദ്ദിച്ചത്.

ബൈഡൻ അടക്കമുള്ളവരെ പിന്നിലാക്കി മോദി; 13 ലോക നേതാക്കളില്‍ മുന്നിലെത്തി ഇന്ത്യൻ പ്രധാനമന്ത്രി

പ്രതിഷേധക്കാരെ ചോദ്യം ചെയ്ത് ഒരു വിഭാഗം ക്രിസ്ത്യൻ വിഭാഗത്തിൽ നിന്നുള്ളവരും രംഗത്ത് എത്തിയതോടെയാണ് പ്രശ്നം ഗുരുതരമായതെന്നാണ് റിപ്പോർട്ട്. വൈദികൻ്റെ നേതൃത്വത്തിൽ മതപരിവർത്തനം നടന്നോ എന്ന കാര്യത്തിൽ അന്വേഷണം നടത്തുമെന്ന് അഡീഷണൽ പോലീസ് സൂപ്രണ്ട് താരകേശ്വർ പട്ടേൽ പറഞ്ഞു. “ഇരു വിഭാഗവും തമ്മിലുള്ള തർക്കത്തിൽ പോലീസ് സ്റ്റേഷന് കേടുപാടുകൾ സംഭവിച്ചിട്ടില്ല. മതപരിവർത്തനം സംബന്ധിച്ച് അന്വേഷണം തുടരുകയാണ്. അന്വേഷണ റിപ്പോർട്ട് പ്രകാരം നടപടി സ്വീകരിക്കും” – എന്നും അദ്ദേഹം പറഞ്ഞു.

പോലീസ് സ്റ്റേഷനിൽ നടന്ന സംഘർഷങ്ങളിൽ പങ്കാളികളായ ഏഴ് പേർക്കെതിരെ കേസെടുത്തുവെന്ന് പോലീസ് അറിയിച്ചു. അതിക്രമത്തിൽ വൈദികന് മർദ്ദനം ഏൽക്കേണ്ടി വന്നുവെന്ന് സൂപ്രണ്ട് താരകേശ്വർ പട്ടേൽ വ്യക്തമാക്കി. മതപരിവര്‍ത്തനം സംബന്ധിച്ച പരാതി ലഭിച്ചിരുന്നെന്നും ഇതില്‍ പരിശോധിച്ച് നടപടി സ്വീകരിക്കുമെന്നും അദ്ദേഹം കൂട്ടിച്ചേർത്തു. സംഭവത്തിൻ്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുകയാണ്.

ക്രിസ്ത്യൻ വൈദികർക്കും കന്യാസ്ത്രീകൾക്കും എതിരെ വിവിധ സംഘടനകളിൽ നിന്ന് ആക്രമണം ഉണ്ടാകുന്നത് തുടരുകയാണ്. ത്തര്‍പ്രദേശിലെ ഝാന്‍സിയില്‍ മലയാളികൾ അടക്കമുള്ള കന്യാസ്‌ത്രീകളെ ട്രെയിനിൽ കയ്യേറ്റം ചെയ്തിരുന്നു. കഴിഞ്ഞ മാര്‍ച്ച് 19ന് ഉത്തര്‍പ്രദേശിലെ ഝാന്‍സി റെയില്‍വേ സ്‌റ്റേഷനിൽ വെച്ചാണ് സംഭവമുണ്ടായത്.

യൂണിഫോമില്ല; പെൺകുട്ടികളോട് വസ്ത്രം അഴിച്ചു മാറ്റാൻ പറഞ്ഞ പ്രിൻസിപ്പാളിനെതിരെ കേസ്

തിരുഹൃദയ സന്യാസി സമൂഹത്തിൻ്റെ ഡല്‍ഹി പ്രൊവിന്‍സിലെ മലയാളി അടക്കമുള്ള നാല് കന്യാസ്ത്രീകളെ ഒരു സംഘമാളുകൾ കയ്യേറ്റം ചെയ്യുകയായിരുന്നു. ഇവർക്കൊപ്പം ഉണ്ടായിരുന്ന പെൺകുട്ടികളെ മതം മാറ്റാൻ കൊണ്ട് പോകുന്നുവെന്ന് ആരോപിച്ച് അക്രമികൾ കന്യാസ്ത്രീകളെ കയ്യേറ്റം ചെയ്യുകയും ട്രെയിനിൽ നിന്നും ബലമായി പുറത്തിറക്കുകയുമായിരുന്നു. രണ്ട് കന്യാസ്ത്രീകൾ സന്യാസ വേഷത്തിലും മറ്റുള്ളവര്‍ സാധാരണ വേഷത്തിലുമായിരുന്നു. സംഭവത്തിൻ്റെ വീഡിയോ പുറത്തുവന്നതോടെയാണ് വിഷയം ചർച്ചയായത്. സംഭവത്തിൽ അറസ്റ്റിലായവരിൽ വിഎച്ച്പി പ്രവർത്തകരും ഉൾപ്പെട്ടിരുന്നതായി റിപ്പോർട്ടുകൾ പുറത്തുവന്നിരുന്നു.