കൊച്ചിയിൽ സുരക്ഷാ ജീവനക്കാരിൽ നിന്ന് 18 തോക്കുകള്‍ പിടികൂടി; അന്വേഷണം കശ്മീരിലേക്കും

കൊച്ചി: കൊച്ചിയിൽ സുരക്ഷാ ജീവനക്കാരിൽ നിന്ന് തോക്കുകൾ പിടികൂടി. ഒരു സ്വകാര്യ ഏജൻസിയുടെ 18 തോക്കുകളാണ് പോലീസ് കസ്റ്റഡിയിലെടുത്തതെന്ന് വിവിധ മാധ്യമങ്ങൾ റിപ്പോർട്ട് ചെയ്തു. മുംബൈയിലെ സ്വകാര്യ ഏജൻസികളുടെ സുരക്ഷാ ജീവനക്കാരിൽ നിന്നാണ് തോക്ക് പിടിച്ചെടുത്തത്. തോക്കുകൾക്ക് ലൈസൻസ് ഉണ്ടോ എന്നതുൾപ്പെടെയുള്ള വിവരങ്ങൾ പോലീസ് പരിശോധിച്ച് വരികയാണ്.



എടിഎമ്മിൽ പണം നിറക്കുന്നതിന് സുരക്ഷ നൽകുന്നവരുടെ തോക്കുകളാണ് കൊച്ചി പോലീസ് പിടികൂടിയതെന്ന് മാതൃഭൂമി ന്യൂസ് റിപ്പോർട്ട് ചെയ്തു. തോക്കുകളുടെ രജിസ്ട്രേഷന്‍ കാണിച്ചിരിക്കുന്നത് കശ്മീരിലെ രജൗരി ജില്ലയിലാണ്. രജിസ്ട്രേഷന്‍റെ സാധുത രജൗരി കലക്ടറുകമായി ബന്ധപ്പെട്ട് പരിശോധിക്കാനാണ് അധികൃതരുടെ തീരുമാനം.

Also Read : ‘പാലായിലെ തോൽവിക്ക് പിന്നിൽ തങ്ങളുടെ വീഴ്ചയും, കേരള കോൺഗ്രസ് വന്നത് മുന്നണിക്ക് നേട്ടമായി’; സിപിഎം അവലോകന റിപ്പോർട്ട്



നേരത്തെ തിരുവനന്തപുരം കരമനയിൽ നിന്നും അഞ്ച് തോക്കുകൾ പോലീസ് പിടികൂടിയിരുന്നു. ഇതേ ഏജൻസിയുടെ കൈയ്യിൽ നിന്ന് തന്നെയാണ് കൊച്ചിയിൽ നിന്നും തോക്കുകൾ പിടികൂടിയതെന്നാണ് റിപ്പോർട്ട്. തിരുവനന്തപുരത്ത് പിടികൂടിയ തോക്കുകളുടെ പരിശോധനയിൽ വ്യാജ ലൈസൻസുകൾ ഉപയോഗിച്ചാണ് തോക്കുകൾ കൈവശം വെച്ചിരിക്കുന്നതെന്ന് കണ്ടെത്തിയിരുന്നു. ഇതേത്തുടർന്ന് സംസ്ഥാന പോലീസ് മേധാവിയാണ് വ്യാപക പരിശോധനയ്ക്ക് നിർദേശം നൽകിയത്.

എടിഎം, ധനകാര്യ സ്ഥാപനങ്ങള്‍ എന്നിവിടങ്ങളില്‍ ജോലി നോക്കുന്നതിനായി സ്വകാര്യ സുരക്ഷാ ഏജൻസികൾ നിയോഗിക്കുന്ന ഉദ്യോഗസ്ഥരുടെ കൈവശമുളള ആയുധങ്ങള്‍ പോലീസ് പരിശോധിച്ച് അവയുടെ ലൈസൻസ് വ്യാജമല്ലെന്ന് ഉറപ്പാക്കുമെന്ന് കേരളാ പോലീസ് കഴിഞ്ഞ ദിവസം വ്യക്തമാക്കിയിരുന്നു. മറ്റ് സംസ്ഥാനങ്ങളില്‍ നിന്ന് മതിയായ രേഖകളില്ലാത്ത തോക്കുകളുമായി എത്തുന്നവരെ ധനകാര്യ സ്ഥാപനങ്ങളില്‍ സുരക്ഷാ ഉദ്യോഗസ്ഥരായി നിയമിക്കുന്നത് ശ്രദ്ധയില്‍പ്പെട്ടതിനെ തുടര്‍ന്നാണ് നടപടി.

ലൈസൻസുകൾ വ്യാജമാണെങ്കിൽ ജീവനക്കാരെ അറസ്റ്റ് ചെയ്യുന്നതുൾപ്പെടെയുള്ള തുടർനടപടികളിലേക്ക് അധികൃതർ കടക്കും. സ്വകാര്യ ഏജൻസികളിൽ സുരക്ഷാ ജീവനക്കാരായി വരുന്നവർ സ്വന്തം നിലയിൽ തോക്കുകൾ കൊണ്ടുവരുന്നെന്നും കശ്മീരിൽ നിന്നാണ് ഇവ കൊണ്ടു വരുന്നതെന്നുമാണ് റിപ്പോർട്ടുകൾ. ജീവനക്കാരെ കൈമാറിയ ഏജൻസിക്കെതിരെയും അന്വേഷണം ഉണ്ടാകും.

Also Read : ഗ്രൂപ്പിസമല്ല എന്നെ തോൽപിച്ചത്, പാര വയ്ക്കലുകളും കാലുവാരലും; തുറന്ന് പറഞ്ഞ് ബിന്ദു കൃഷ്ണ



തിരുവനന്തപുരത്ത് വ്യാജ ലൈസൻസുള്ള തോക്കുകള്‍ പിടിച്ചെടുത്ത സംഭവത്തില്‍ അന്വേഷണം കാശ്മീരിലേക്കും വ്യാപിപ്പിക്കുകയാണ്. തോക്ക് കൈവശം വച്ചിരുന്ന കാശ്മീരി സ്വദേശികളുമായി കേരളാ പൊലീസ് തെളിവെടുപ്പ് നടത്താനാണ് തീരുമാനം. കരമന പോലീസായിരുന്നു എടിഎമ്മിലേക്ക് പണം കൊണ്ടുപോകുന്ന കമ്പനിയിലെ അഞ്ച് ജീവനക്കാരെ വ്യാജ ലൈസൻസുള്ള തോക്ക് കൈവശം വച്ചതിന് അറസ്റ്റ് ചെയ്തത്.

തോക്കിന് പുറമേ 25 വെടിയുണ്ടകളുമായി ആറ് മാസത്തിലേറെയായി ഇവര്‍ തിരുവനന്തപുരത്ത് താമസിക്കുകയായിരുന്നെന്നാണ് റിപ്പോർട്ട്. കരമന പോലീസ് ഇവരെ കസ്റ്റഡിയിലെടുത്തതിന് പിന്നാലെ കേന്ദ്രരഹസ്യാന്വേഷണ ഏജന്‍സികളും ഇവരെ ചോദ്യം ചെയ്തിരുന്നു. സംഘത്തിന് തോക്കുകൾ നൽകിയവരെക്കുറിച്ച് അന്വേഷിക്കുകയാണ് പോലീസ് ലക്ഷ്യമിടുന്നത് .

Also Read : ‘ പിണറായിയുമായി അകൽച്ചയില്ല , പരനാറി പ്രയോഗത്തെ രാഷ്ട്രീയമായാണ് കാണുന്നത് ‘; നാളെ എന്തെന്ന് ആർക്കും പറയാൻ കഴിയില്ലെന്ന് എൻ കെ പ്രേമചന്ദ്രൻ

തിരുവനന്തപുരത്തെ അറസ്റ്റിന് പിന്നാലെയാണ് സംസ്ഥാനത്ത് എടിഎം കൗണ്ടറിലുള്‍പ്പടെ ജോലി ചെയ്യുന്ന സ്വകാര്യ സുരക്ഷാ ഉദ്യോഗസ്ഥരുടെ ലൈസൻസ് പരിശോധിക്കാൻ പോലീസ് തീരുമാനിച്ചത് .