ആയുര്‍വേദ പ്രകാരം ശരീരത്തിലെ വാത, പിത്ത, കഫ ദോഷങ്ങളാണ് എല്ലാ പ്രശ്‌നങ്ങള്‍ക്കും കാരണമാകുന്നത്. ഈ പറഞ്ഞ ശരീര പ്രകൃതിയില്‍ ഏതെങ്കിലും വിധത്തില്‍ വരുന്നതാണ് എല്ലാവരും. കഫ ശല്യം പലരേയും അലട്ടുന്ന പ്രശ്‌നമാണ്. ചിലര്‍ക്കിത് നെഞ്ചില്‍ കെട്ടിക്കിടക്കും. ചിലര്‍ക്കാകട്ടെ, ഇത് ശിരസിലും. നെഞ്ചില്‍ കെട്ടിക്കിടക്കുന്ന കഫം നീക്കിയില്ലെങ്കില്‍ ശ്വാസ സംബന്ധമായ പ്രശ്‌നങ്ങളും കഫക്കെട്ടിലൂടെ അണുബാധ, ന്യൂമോണിയ പോലുള്ള പ്രശ്‌നങ്ങളും ഉണ്ടാകാന്‍ സാധ്യതയേറെയാണ്. ഇതു പോലെ ശിരസിലെ കഫക്കെട്ട് തലവേദന, മൂക്കടപ്പ്, സൈനസൈറ്റിസ് പോലുള്ള പല പ്രശ്‌നങ്ങള്‍ക്കും അസ്വസ്ഥതയ്ക്കും കാരണമാകുന്നു. തലയിലെ കഫക്കെട്ട് നീക്കാന്‍ സഹായിക്കുന്ന പല വീട്ടുമരുന്നുകളുമുണ്ട്. ഇത്തരത്തില്‍ ഒന്നിനെ കുറിച്ചറിയൂ. തലയിലെ കഫക്കെട്ട് നീക്കാന്‍ സഹായിക്കുന്ന ഒന്ന്.

ചെറിയുളളി

ഇതിനായി വേണ്ടത് ചെറിയുളളി അഥവാ സാമ്പാര്‍ ഉള്ളി, ചെറുനാരങ്ങ, വെളുത്തുള്ളി, ഇഞ്ചി, തുളസിയില എന്നീ ചേരുവകളാണ്. ചെറിയുള്ളി പല ആരോഗ്യ പ്രശ്‌നങ്ങള്‍ക്കുമുള്ള നല്ലൊരു മരുന്നാണ്. പ്രത്യേകിച്ച് കഫക്കെട്ട് പോലുള്ള പ്രശ്‌നങ്ങള്‍ക്ക് ഇത് ഏറെ നല്ലതാണ്. കല്‍ക്കണ്ടം, ചെറിയുള്ളി എന്നിവ ചതച്ച് നീരെടുത്തു കുടിയ്ക്കുന്നത് ചുമയ്ക്കും കഫക്കെട്ടിനുമെല്ലാം ഏറെ ഉത്തമമാണ്. ഇതു പോലെ തുളസിയിലയും പല രോഗങ്ങള്‍ക്കും മരുന്നാണ്. അണുബാധകളെ ചെറുക്കാന്‍, കഫക്കെട്ട് പോലുള്ള രോഗങ്ങള്‍ അകറ്റാന്‍ ഏറെ നല്ലതാണ് ഇത്.

ചെറുനാരങ്ങ

കാഴ്ചയില്‍ കുഞ്ഞനാണെങ്കിലും ആരോഗ്യപരമായ കാര്യങ്ങളില്‍ മിടുക്കനാണ് ചെറുനാരങ്ങ. ആരോഗ്യത്തിനു മാത്രല്ല, ചര്‍മത്തിനും മുടിയ്ക്കുമെല്ലാം ഇത് ഏറെ നല്ലതാണ്. വൈറ്റമിന്‍ സിയുടെ പ്രധാന ഉറവിടമാണിത്. സിട്രിക് ആസിഡിനാല്‍ സമ്പുഷ്ടവും. ദിവസവും നാരങ്ങാവെള്ളം കുടിയ്ക്കുന്നത് ആരോഗ്യപരമായ പല ഗുണങ്ങളും നല്‍കുക തന്നെ ചെയ്യും. പൊട്ടാസ്യം സമ്പുഷ്ടമാണ് നാരങ്ങ. ശരീരത്തിലെ കൊഴുപ്പും ടോക്‌സിനുകളും പുറന്തള്ളി വയറും തടിയുമൊതുക്കാന്‍ ഇത് ഏറെ പ്രധാനപ്പെട്ട ഒന്നു തന്നെയാണ്.കോള്‍ഡ്, അലര്‍ജി പ്രശ്‌നങ്ങള്‍ക്കുള്ള നല്ലൊരു മരുന്നാണ് നാരങ്ങാ. ഇത്തരം പ്രശ്‌നങ്ങള്‍ക്കു മരുന്നാണെന്നു മാത്രമല്ല, ഇത്തരം അവസ്ഥകള്‍ വരുന്നതു തടയാനും ഇതേറെ സഹായിക്കും. ഇത്തരം പ്രശ്‌നങ്ങളുള്ളവര്‍ ഇത് ശീലമാക്കുന്നത് ഏറെ സഹായിക്കും. ശരീരത്തിനു രോഗപ്രതിരോധ ശേഷി വര്‍ദ്ധിപ്പിയ്ക്കുന്നതിന് ഏറെ ഉത്തമമായ ഒന്നാണ് ചെറുചൂടുള്ള ചെറുനാരങ്ങ. നമ്മുടെ ഇമ്മ്യൂണ്‍ സിസ്റ്റത്തെ ശക്തിമാക്കുന്ന ഒന്നാണിത്. ബാക്ടീരിയ, വൈറല്‍ ഇന്‍ഫെക്ഷനുകളെ ചെറുക്കുവാന്‍ ശേഷിയുള്ള ഒന്നാണിത്.

വെളുത്തുള്ളി

പല കറികളിലും സ്ഥിരം ചേരുവയായ വെളുത്തുള്ളി ഏറെ ആരോഗ്യ ഗുണങ്ങള്‍ ചേര്‍ന്ന ഒന്നാണ്. വെളുത്തുള്ളിയിലെ അലിസിന്‍ എന്ന ഘടകമാണ് ഇതിനു പ്രധാനപ്പെട്ട ഗുണങ്ങള്‍ നല്‍കുന്നത്. ഇത് നല്ലൊരു ആന്റിഓക്‌സിഡന്റായി പ്രവര്‍ത്തിയ്ക്കുന്നതാണ് ആരോഗ്യപരമായ ഗുണങ്ങള്‍ നല്‍കുന്നത്. അലിസിനെ കൂടാതെ അജോയീന്‍, അലീന്‍ തുടങ്ങിയവയും ഇതില്‍ അടങ്ങിയിട്ടുണ്ട്‌. മഗ്നീഷ്യം, ഫോസ്ഫറസ്,വൈറ്റമിന്‍ ബി, കാത്സ്യം, പൊട്ടാസിയം. തുടങ്ങി ശരീരത്തിനാവശ്യമായ ഘടകങ്ങളെല്ലാം വെളുത്തുള്ളിയിലുണ്ട്. അണുബാധകള്‍ക്കെതിരെ നല്ലൊരു മരുന്നു കൂടിയാണ് ഇത്. ന്യൂമോണിയയ്ക്കെതിരെ നല്‍കാവുന്ന ഏറ്റവും നല്ല വീട്ടു മരുന്നാണ് വെളുത്തുള്ളി . കുട്ടികള്‍ക്കും മുതിര്‍ന്നവര്‍ക്കും ഇത് നല്‍കാം. സ്ഥിരമായി അലര്‍ജി പ്രശ്‌നങ്ങള്‍ അലട്ടുന്നവര്‍ ഈ വഴി പരീക്ഷിച്ചാല്‍ ഗുണമുണ്ടാകും .ആസ്തമയ്ക്കുള്ള നല്ലൊരു പരിഹാരമാണ് വെളുത്തുള്ളി. അലര്‍ജിയ്ക്കും ആസ്തമ പോലുള്ള പ്രശ്‌നങ്ങള്‍ക്കും കോള്‍ഡിനും പ്രതിവിധിയാണ്.

ഇഞ്ചി

ജലദോഷത്തിന് ഇഞ്ചി എല്ലായ്പ്പോഴും ഒന്നാം നമ്പർ വീട്ടുവൈദ്യമാണ്. ശുദ്ധമായ ഇഞ്ചി കഴിക്കുന്നത് ഒരു വ്യക്തിയുടെ ശ്വസനവ്യവസ്ഥയെ ശക്തിപ്പെടുത്തുമെന്നും ജലദോഷം പോലുള്ള ശ്വസന വൈറസുകളിൽ നിന്ന് സംരക്ഷിക്കുമെന്നും പഠനങ്ങളിൽ വ്യക്തമായിട്ടുണ്ട്. ഇഞ്ചി അതിന്റെ ആൻറി ഇൻഫ്ളമേറ്ററി ഗുണങ്ങളാൽ പേരുകേട്ടതാണ്. ശരീരത്തിൽ ഉണ്ടാകുന്ന പലതരം വേദനകൾ കുറയ്ക്കാന്‍ ഇഞ്ചി ഏറെ നല്ലതാണ്.ഇഞ്ചിയിൽ അടങ്ങിയിരിക്കുന്ന സജീവ സംയുക്തമായ ജിഞ്ചെറോൾസ് വായയെ സംരക്ഷിക്കുന്നതിനും വായിലെ ബാക്ടീരിയകളുടെ വളർച്ച തടയുന്നതിനും പേരുകേട്ടതാണ്. ഇഞ്ചി ഉപയോഗിച്ചുകൊണ്ട് നിങ്ങളുടെ മോശം കൊളസ്ട്രോളുകളുടെ അളവ് വേഗത്തിൽ കുറയ്ക്കാൻ സാധിക്കും. ഇതു വഴി ഹൃദയാരോഗ്യത്തിന് നല്ലതാണ്. രക്തക്കുഴലുകളിലെ തടസം നീക്കാനും രക്തപ്രവാഹത്തിനുമെല്ലാം ഇഞ്ചിനല്ലതാണ്.

​ഈ പ്രത്യേക മരുന്നുണ്ടാക്കുവാന്‍

ഈ പ്രത്യേക മരുന്നുണ്ടാക്കുവാന്‍ അല്‍പം ഇഞ്ചി, വെളുത്തുളളി എന്നിവ തൊലി കളയുക. ഇത് ചതയ്ക്കണം. ചെറുനാരങ്ങ പകുതി എടുത്ത് ചെറിയ കഷ്ണങ്ങളാക്കി മുറിയ്ക്കണം. രണ്ടോ മൂന്നോ ചെറിയുള്ളി തൊലി കളയുക. ഒരു പിടി തുളസിയിലയും വേണം. ഇതെല്ലാം ചേര്‍ത്ത് വെള്ളത്തില്‍ ചേര്‍ത്ത് തിളപ്പിയ്ക്കണം. വെള്ളം ചെറുതീയില്‍ തിളച്ച് പോഷകങ്ങള്‍ വെള്ളത്തിലേയ്ക്ക് ഇറങ്ങിക്കഴിയുമ്പോള്‍ വാങ്ങി വയ്ക്കാം. ഇത് അല്‍പം കഴിഞ്ഞ് ചെറുചൂടാകുമ്പോള്‍ ഊറ്റിയെടുത്ത് കുടിയ്ക്കാം. ദിവസം ഒന്നോ രണ്ടോ തവണ ഇത് കുടിയ്ക്കുന്നത് കഫക്കെട്ടിന് ഗുണം നല്‍കും.