മുഖ്യമന്ത്രി പിതൃതുല്ല്യൻ, അദ്ദേഹത്തിന് ശാസിക്കാം; കുഞ്ഞാലിക്കുട്ടിക്കെതിരായ പോരാട്ടം തുടരും: കെടി ജലീൽ

മലപ്പുറം: എആർ നഗർ സഹകരണ ബാങ്ക് അഴിമതി ആരോപണത്തിൽ ഇഡി അന്വേഷണത്തെ തള്ളിയ മുഖ്യമന്ത്രിയുടെ നിലപാടിന് പിന്നാലെ പ്രതികരണവുമായി കെടി ജലീൽ. മുഖ്യമന്ത്രിക്ക് തന്നെ ശാസിക്കാനും തിരുത്താനുമുള്ള അധികാരമുണ്ടെന്നും കുഞ്ഞാലിക്കുട്ടിക്കെതിരായ പോരാട്ടം തുടരുമെന്നും കെടി ജലീ പറഞ്ഞു. ഫേസ്ബുക്ക് പോസ്റ്റിലൂടെയാണ് കെടി ജലീൽ പ്രതികരണം രേഖപ്പെടുത്തിയത്.



‘ജീവിതത്തിൽ ഇന്നുവരെ ഒരു നയാപൈസയുടെ അഴിമതി നടത്തിയിട്ടില്ല. ഒരു രൂപയുടെ കള്ളപ്പണ ഇടപാടിലും പങ്കാളിയായിട്ടില്ല. കടം വാങ്ങിയ വകയിൽ പോലും ഒന്നും ആർക്കും കൊടുക്കാനില്ല. ലോകത്തെവിടെയും പത്തു രൂപയുടെ അവിഹിത സമ്പാദ്യവുമില്ല. അതുകൊണ്ടു തന്നെ ലീഗ് രാഷ്ട്രീയത്തെ ക്രിമിനൽ വൽകരിച്ച കുഞ്ഞാലിക്കുട്ടിക്കെതിരെയും അദ്ദേഹത്തിന്‍റെ കള്ളപ്പണ-ഹവാല ഇടപാടുകൾക്കെതിരെയും അനധികൃത സ്വത്തു സമ്പാദനത്തിനെതിരെയുമുള്ള പോരാട്ടം അവസാന ശ്വാസം വരെ തുടരും.

Also Read : സഹകരണ മേഖലയിൽ ഇഡി ഇടപെടേണ്ട; അന്വേഷിക്കാൻ സംവിധാനം ഇവിടെയുണ്ട്; കെ ടി ജലീലിനെ തള്ളി മുഖ്യമന്ത്രി



മുഖ്യമന്ത്രി എനിക്ക് പിതൃതുല്ല്യനാണ്. അദ്ദേഹത്തിന് എന്നെ ശാസിക്കാം, ഉപദേശിക്കാം, തിരുത്താം. അതിനുള്ള എല്ലാ അധികാരവും അവകാശവും പിണറായി വിജയനുണ്ട്. ട്രോളൻമാർക്കും വലതുപക്ഷ സൈബർ പോരാളികൾക്കും കഴുതക്കാമം കരഞ്ഞു തീർക്കാം’- കെടി ജലീൽ ഫേസ്ബുക്കിൽ കുറിച്ചു.

ഇന്നലെ കൊവിഡ് അവലോകന യോഗത്തിന് ശേഷം നടന്ന വാർത്താ സമ്മേളനത്തിൽ മാധ്യമ പ്രവർത്തകരുടെ ചോദ്യത്തിനോട് പ്രതികരിക്കവെയായിരുന്നു മുഖ്യമന്ത്രി നിലപാട് വ്യക്തമാക്കിയത്. കെ ടി ജലീൽ ഇഡി ചോദ്യം ചെയ്ത ആളാണല്ലോ. ആ ചോദ്യം ചെയ്യലോടെ ഇഡിയിൽ കൂടുതൽ വിശ്വാസം അദ്ദേഹത്തിനു വന്നിട്ടുണ്ടെന്നാണ് തോന്നുന്നതെന്ന് പറഞ്ഞുകൊണ്ടാണ് കേരളത്തിലെ സഹകരണ മേഖല ഇഡിയൊന്നും കൈകാര്യം ചെയ്യേണ്ട മേഖലകളല്ലെന്ന് മുഖ്യമന്ത്രി പറഞ്ഞത്.

Also Read : ‘പാലായിലെ തോൽവിക്ക് പിന്നിൽ തങ്ങളുടെ വീഴ്ചയും, കേരള കോൺഗ്രസ് വന്നത് മുന്നണിക്ക് നേട്ടമായി’; സിപിഎം അവലോകന റിപ്പോർട്ട്

“ഏതായാലും കേരളത്തിലെ സഹകരണ മേഖല ഇഡിയൊന്നും കൈകാര്യം ചെയ്യേണ്ട മേഖലകളല്ല. സാധാരണ ഗതിയിൽ സംസ്ഥാന സർക്കാർ നടപടിയെടുത്തുകൊണ്ടിരിക്കുന്നതാണ്. അദ്ദേഹം പരാമർശിച്ച ബാങ്കിന്‍റെ കാര്യത്തിൽ സഹകരണ വകുപ്പ് ശക്തമായ നടപടിയിലേക്ക് നീങ്ങിയതാണ്. ഇപ്പോൾ അതിൽ ഒരു ഹൈക്കോടതി വിധി ഉള്ളതിനാലാണ് നടപടിയിലേക്ക് നീങ്ങാത്തത്”- മുഖ്യമന്ത്രി പറഞ്ഞു.

Also Read : ‘ പിണറായിയുമായി അകൽച്ചയില്ല , പരനാറി പ്രയോഗത്തെ രാഷ്ട്രീയമായാണ് കാണുന്നത് ‘; നാളെ എന്തെന്ന് ആർക്കും പറയാൻ കഴിയില്ലെന്ന് എൻ കെ പ്രേമചന്ദ്രൻ



ഇഡി അന്വേഷിക്കണമെന്നാണല്ലോ കെ ടി ജലീൽ ആവശ്യപ്പെടുന്നതെന്ന ചോദ്യത്തിന് സാധാരണ ഗതിയിൽ ഉന്നയിക്കേണ്ട ഒരു ആവശ്യമല്ല അത്. അങ്ങനെ ഉന്നയിക്കുന്നത് ശരിയല്ല. ഇവിടെ അന്വേഷിക്കാനുള്ള സംവിധാനമുണ്ടെന്നും മുഖ്യമന്ത്രി പറഞ്ഞിരുന്നു. കുറ്റം ചെയ്തിട്ടുണ്ടെങ്കിൽ ശക്തമായ നടപടി അതിന്‍റെ ഭാഗമായി ഉണ്ടാകുമെന്നും മുഖ്യമന്ത്രി പറഞ്ഞിരുന്നു.