ഷോപ്പിംഗ് സെന്ററിലെ മൂന്ന് സെക്യൂരിറ്റിക്കാരെ കുത്തി പരിക്കേല്‍പ്പിച്ച സൗദി യുവാവ് അറസ്റ്റില്‍

Sumayya P | Lipi | Updated: 08 Jun 2021, 11:02:00 AM

ആക്രമണത്തില്‍ പരിക്കേറ്റ മൂന്നു പേരെയും ഉടന്‍ തന്നെ ആശുപത്രിയിലേക്ക് എത്തിച്ചെങ്കിലും ഒരാളുടെ നില ഗുരുതരമായി തുടരുകയാണെന്ന് പോലീസ് പറഞ്ഞു.

റിയാദ്: ഒരു ഷോപ്പിംഗ് സെന്ററിലെ മൂന്ന് സെക്യൂരിറ്റി ഉദ്യോഗസ്ഥരെ കുത്തിപ്പരിക്കേല്‍പ്പിച്ച സൗദി യുവാവ് അറസ്റ്റില്‍. ദമാമിലാണ് സംഭവം. ആക്രമണത്തിനിരയായ ഒരു സെക്യൂരിറ്റി ഗാര്‍ഡിന്റെ നില ഗുരുതരമാണെന്ന് പോലിസ് അറിയിച്ചു.ഷോപ്പിംഗ് സെന്ററിലെത്തിയ യുവാവ് ആദ്യം പ്രവേശന കവാടത്തിലുള്ള സെക്യൂരിറ്റി ഗാര്‍ഡുമാരെ അക്രമിക്കുകയായിരുന്നുവെന്ന് പോലിസ് അറിയിച്ചു. ഇതിനു ശേഷം ഷോപ്പിംഗ് സെന്ററിലെ ആളില്ലാത്ത സ്ഥലത്ത് കയറി യുവാവ് ഒളിക്കുകയായിരുന്നു. സിസിടിവി കാമറയുടെ സഹായത്തോടെ യുവാവ് ഒളിച്ചിരിക്കുന്ന സ്ഥലം കണ്ടെത്തിയ സുരക്ഷാ ഉദ്യോഗസ്ഥര്‍ ഇയാള പിടികൂടാന്‍ ശ്രമിക്കവെ കൈയിലുണ്ടായിരുന്ന കത്തി കൊണ്ട് മൂന്നു പേരെ കുത്തിപ്പരിക്കേല്‍പ്പിക്കുകയായിരുന്നു. സംഭവത്തിന് ശേഷം ഷോപ്പിംഗ് സെന്ററില്‍ നിന്ന് രക്ഷപ്പെട്ട ഇയാളെ പിന്നീട് പോലിസ് അറസ്റ്റ് ചെയ്തു.

Also Read: യോഗ്യതാ റൗണ്ടിലെ ഇന്ത്യയുടെ ആദ്യ വിജയം; ആര്‍പ്പുവിളിച്ച് മലയാളികള്‍ ഉള്‍പ്പെടെയുള്ള കാണികള്‍

ആക്രമണത്തില്‍ പരിക്കേറ്റ മൂന്നു പേരെയും ഉടന്‍ തന്നെ ആശുപത്രിയിലേക്ക് എത്തിച്ചെങ്കിലും ഒരാളുടെ നില ഗുരുതരമായി തുടരുകയാണെന്ന് പോലിസ് പറഞ്ഞു. പരിക്കേറ്റ സുരക്ഷാ ഉദ്യോഗസ്ഥര്‍ ഏത് നാട്ടുകാരാണെന്നോ ആക്രമണത്തിനു പിന്നിലെ കാരണം എന്തെന്നോ പോലിസ് വ്യക്തമാക്കിയിട്ടില്ല. ഇയാളെ തുടര്‍ നടപടികള്‍ക്കായി പബ്ലിക് പ്രൊസിക്യൂഷന് കൈമാറിയതായും പോലിസ് അറിയിച്ചു.