ഇന്തോനേഷ്യൻ ജയിലില്‍ വൻ തീപിടിത്തം; 41 തടവുകാര്‍ മരിച്ചു

ജക്കാര്‍ത്ത: ഇന്തോനേഷ്യൻ ജയിലിലുണ്ടായ വൻ തീപിടിത്തത്തിൽ 41 തടവുകാര്‍ മരിച്ചു. നിരവധിയാളുകൾക്ക് പൊള്ളലേറ്റിട്ടുമുണ്ട്. ഇന്തോനേഷ്യൻ തലസ്ഥാനമായ ജക്കാർത്തയ്ക്ക് സമീപത്തെ തന്‍ജെറാങ് ജയിലിലാണ് അപകടമുണ്ടായത്. ബുധനാഴ്ച പുലർച്ചെ 3 മണിയോടെയായിരുന്നു സംഭവം. തടവുകാരെല്ലാം ഉറങ്ങിക്കിടക്കുന്ന സമയത്തായിരുന്നു ദുരന്തമുണ്ടായതെന്ന് വാർത്താ ഏജൻസിയായ എ എഫ് പി റിപ്പോർട്ട് ചെയ്തത്.



തടവുകാര്‍ ഉറക്കത്തിലായിരുന്നതാണ് മരണസംഖ്യ ഉയരാന്‍ ഇടയാക്കിയതെന്ന് അധികൃതർ പറയുന്നത്. ഒരു ബ്ലോക്കിൽ നിന്ന് വലിയ രീതിയിൽ തീ ഉയരുന്ന ദൃശ്യങ്ങൾ പുറത്തുവന്നിട്ടുണ്ട്. മയക്കുമരുന്ന് കേസുകളില്‍ ജയിൽ ശിക്ഷ അനുഭവിക്കുന്നവരെ പാർപ്പിച്ചിരിക്കുന്ന ബ്ലോക്കാണ് ഇത്. അഗ്നിശമന സേനയെത്തിയാണ് തീ അണച്ചത്.

Also Read : ക്വാറന്‍റൈന്‍ ലംഘിച്ചു; കൊവിഡ് പടര്‍ത്തിയതിന് യുവാവിന് അഞ്ചു വര്‍ഷം തടവ് ശിക്ഷ വിധിച്ച് വിയറ്റ്‌നാം



തീ പടർന്നത് ശ്രദ്ധയിൽപ്പെട്ട ഉടൻ രക്ഷാപ്രവർത്തനം ആരംഭിക്കുകയായിരുന്നു. ’41 തടവുകാർ മരിച്ചു, 8 പേരുടെ നില ഗുരുതരമാണ്. മറ്റ് 72 പേര്‍ക്കും പൊള്ളലേറ്റിട്ടുണ്ട്’ ജക്കാർത്ത പോലീസ് ചീഫ് ഫാദിൽ ഇമ്രാൻ വാർത്താ സമ്മേളനത്തിൽ പറഞ്ഞു. തീപിടിത്തത്തിന്‍റെ കാരണം അധികൃതർ അന്വേഷിച്ച് വരികയാണ്.

“ഞാൻ സംഭവസ്ഥലം പരിശോധിച്ചു. പ്രാഥമിക നിരീക്ഷണത്തിന്‍റെ അടിസ്ഥാനത്തിൽ, ഷോർട്ട് സർക്യൂട്ട് മൂലമാണ് തീപിടിത്തം ഉണ്ടായതെന്ന് സംശയിക്കുന്നു,” ഇമ്രാൻ പറഞ്ഞു.

Also Read : ‘പാലായിലെ തോൽവിക്ക് പിന്നിൽ തങ്ങളുടെ വീഴ്ചയും, കേരള കോൺഗ്രസ് വന്നത് മുന്നണിക്ക് നേട്ടമായി’; സിപിഎം അവലോകന റിപ്പോർട്ട്

ഉൾക്കൊള്ളാൻ കഴിയുന്നതിലും കൂടുതൽ തടവുകാരെയാണ് ഈ ജയിലിൽ പാർപ്പിച്ചിരിക്കുന്നതെന്നാണ് റിപ്പോർട്ട്. തീപിടിത്തം ഉണ്ടായ ബ്ലോക്കിൽ 40 പേരെയാണ് ഉൾക്കൊള്ളാൻ കഴിയുന്നത്. പക്ഷേ 120 പേർ ഇവിടെ ഉണ്ടായിരുന്നതെന്നാണ് റിപ്പോർട്ട്. ഇന്തോനേഷ്യയിലെ ജയിലുകളിലെല്ലാം പാർപ്പിക്കാൻ കഴിയുന്നതിലും കൂടുതൽ ആളുകൾ ഉണ്ടെന്നാണ് റിപ്പോർട്ടുകൾ പറയുന്നത്.

Also Read : ‘ പിണറായിയുമായി അകൽച്ചയില്ല , പരനാറി പ്രയോഗത്തെ രാഷ്ട്രീയമായാണ് കാണുന്നത് ‘; നാളെ എന്തെന്ന് ആർക്കും പറയാൻ കഴിയില്ലെന്ന് എൻ കെ പ്രേമചന്ദ്രൻ