താലിബാൻ സര്‍ക്കാരിന്റെ സത്യപ്രതിജ്ഞ ലോകവ്യാപാര കേന്ദ്രം തകര്‍ത്തതിന്റെ ഇരുപതാം വാര്‍ഷികത്തിന്: റിപ്പോര്‍ട്ട്

കാബൂൾ: ഇസ്ലാമിക് എമിറേറ്റ് ഓഫ് അഫ്ഗാനിസ്ഥാന്റെ സത്യപ്രതിജ്ഞ ചടങ്ങുകള്‍ സെപ്റ്റംബര്‍ 11 ശനിയാഴ്ച നടക്കുമെന്ന് റിപ്പോര്‍ട്ട്. അമേരിക്കയിലെ ലോക വ്യാപാര കേന്ദ്രം (വേൾഡ് ട്രേഡ് സെന്റര്‍) തകര്‍ത്തതിന്റെ 20ാം വാര്‍ഷികത്തിന് സത്യപ്രതിജ്ഞ നടത്തുന്നതിനാണ് താലിബാൻ തയ്യാറെടുക്കുന്നത് എന്നാണ് റിപ്പോര്‍ട്ടുകള്‍.



2001ലാണ് 9/11 എന്ന പേരിൽ പ്രസിദ്ധമായ ഭീകരാക്രമണം അമേരിക്കയിൽ നടക്കുന്നത്. ഇതിന് പിന്നാലെയാണ് താലിബാനുമായി അമേരിക്ക യുദ്ധം തുടങ്ങിയത്.

Also Read : അധികമുള്ള 4000 ജീവനക്കാരെ മാറ്റി നിര്‍ത്തണം; വരുമാനമില്ലാത്ത സര്‍വ്വീസുകള്‍ ഒഴിവാക്കും; കെഎസ്ആർടിസി എംഡി

റിപ്പോര്‍ട്ടുകള്‍ അനുസരിച്ച് പുതിയതായി അധികാരത്തിൽ എത്തുന്ന താലിബാൻ ഭരണകൂടം ഇന്ത്യ അടക്കമുള്ള അയൽ രാജ്യങ്ങളെ സത്യപ്രതിജ്ഞ ചടങ്ങുകള്‍ക്ക് ക്ഷണിച്ചിട്ടുണ്ട്. ചൈന, തുര്‍ക്കി, പാകിസ്ഥാന്‍, ഇറാൻ, ഖത്തര്‍ എന്നീ രാജ്യങ്ങളേയും കൗതുകകരമായി അമേരിക്കയേയും ക്ഷണിച്ചുവെന്നാണ് അന്തര്‍ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്.

അതേസമയം, ചരിത്രത്തിലെ തന്നെ ഏറ്റവും വലിയ ഭീകരാക്രമണം നടന്ന ദിവസത്തിന്റെ വാര്‍ഷികത്തിന് സത്യപ്രതിജ്ഞ ചെയ്ത് അധികാരത്തിൽ എത്തുന്നതിനോട് അമേരിക്കയുടെ പ്രതികരണം എങ്ങിനെയാണെന്ന് പുറത്ത് വന്നിട്ടില്ല.

ഓഗസ്റ്റ് 31 ന് അവസാന യുഎസ് സൈനീകനും അഫ്ഗാന്‍ വിട്ട് പോയ ശേഷമാണ് താലിബാന്‍ അഫ്ഗാന്റെ സ്വാതന്ത്രം പ്രഖ്യാപിച്ചത്. അതിന് പിന്നാലെ താലിബാൻ ഭീകരരും ഹഖാനി ശൃംഖലയിലെ ഭീകരരും തമ്മിൽ അധികാരത്തര്‍ക്കം ഉണ്ടായിരുന്നതായും അധികാരത്തിൽ എത്തുമെന്ന് കരുതിയ മുല്ല ബരാദറിന് വെടിയേറ്റതായുമുള്ള വാര്‍ത്തകള്‍ പുറത്തുവന്നിരുന്നു. ഈ വിവാദങ്ങള്‍ക്ക് ഒടുവിൽ കഴിഞ്ഞ ദിവസമാണ് താലിബാൻ രണ്ടാം സര്‍ക്കാരിനെ പ്രഖ്യാപിച്ചത്.

പ്രഖ്യാപനം വന്നതിന് പിന്നാലെ സര്‍ക്കാറിന്‍റെ ഭാഗമായ 33 മന്ത്രിമാരില്‍ 14 പേര്‍ ഐക്യരാഷ്ട്ര സഭയുടെ ഭീകരപ്പട്ടികയില്‍ ഉള്‍പ്പെട്ടവരാണെന്ന റിപ്പോര്‍ട്ടുകളും വന്നു. മുല്ല മുഹമ്മദ് ഹസ്സന്‍ അഖുണ്ടിന്റെ നേതൃത്വത്തിലാണ് അഫ്ഗാനിസ്ഥാനിൽ പുതിയ ഭരണകൂടം രൂപീകരിക്കപ്പെടുന്നത്.

താലിബാന്‍ സ്ഥാപകനായ മുല്ല ഒമറിന്റെ അടുത്ത സഹായിയായിരുന്നു മുല്ല മുഹമ്മദ് ഹസ്സൻ അഖുംദ്. ഇയാള്‍ ഐക്യരാഷ്ട്രസഭയുടെ ഉപരോധ പട്ടികയിൽ ഇടം നേടിയ ഭീകരനാണ്. 1996 മുതൽ 2001 വരെയുള്ള താലിബാന്‍ ഭരണകാലത്ത് ഇയാള്‍ വിദേശകാര്യമന്ത്രിയും പിന്നീട് ഉപപ്രധാനമന്ത്രിയുമായിരുന്നു.

അമേരിക്ക തലയ്ക്ക് ഒരു കോടി യുഎസ് ഡോളർ ഇനാമായി പ്രഖ്യാപിച്ച ഭീകര നേതാവാണ് താലിബാൻ നിയന്ത്രണത്തിലുള്ള അഫ്ഗാന്റെ പുതിയ ആഭ്യന്തരമന്ത്രി. പാകിസ്ഥാന്‍ രഹസ്യാന്വേഷണ സംഘടനയായ ഐഎസ്ഐയുടെ സംരക്ഷണത്തിലായിരുന്നു ഇയാള്‍ എന്നാണ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.

Also Read : ‘കേരള കോൺഗ്രസ് എം മുന്നണിക്ക് നേട്ടമുണ്ടാക്കിയില്ല, ഒന്നാം എൽഡിഎഫ് സര്‍ക്കാരിന്റെ വിജയം’; സിപിഐ റിപ്പോര്‍ട്ട്

അതേസമയം, ‘അമേരിക്കൻ സ്റ്റേറ്റ് ഡിപ്പാര്‍ട്ട്മെന്റ് ഞങ്ങളെ കൈകാര്യം ചെയ്യുന്ന രീതി സംബന്ധിച്ച് ഞങ്ങള്‍ക്ക് ആശങ്കയുണ്ട്. അമേരിക്കയെ മുറിപ്പെടുത്താനോ നാണംകെടുത്താനോ ഞങ്ങള്‍ ആഗ്രഹിക്കുന്നില്ല. പക്ഷെ ഞങ്ങള്‍ക്കിത് ഒരു വലിയ ദിവസമാണ്. ഞങ്ങളുടെ ആഭ്യന്തര മന്ത്രി അവരുടെ ആഗോളഭീകര പട്ടികയിലുള്ളത് ഞങ്ങള്‍ക്ക് അപമാനകരമാണ്’ എന്നാണ് താലിബാൻ ഉദ്യോഗസ്ഥന്‍ മാധ്യമങ്ങളോട് പറഞ്ഞു.