കെ ജി ഒന്നു മുതൽ 12ാം ക്ലാസ് വരെ റെസിഡൻറ് കാർഡ് നിര്‍ബന്ധം
കെ.ജി ഒന്നു മുതൽ 12ാം ക്ലാസ് വരെയുള്ള എല്ലാ കുട്ടികളും നിർബന്ധമായും റെസിഡൻറ് കാർഡ് എടുക്കണം. ഒമാൻ വിദ്യാഭ്യാസ മന്ത്രാലയം ആണ് അറിയിപ്പ് നല്‍കിയിരിക്കുന്നത്. സ്ക്കൂളുകളില്‍ കുട്ടികളുടെ റെസിഡൻറ് കാർഡിന്‍റെ കോപ്പി പ്രത്യേകം രജിസ്റ്റർ ചെയ്ത് വെക്കണം എന്നും ഒമാൻ വിദ്യാഭ്യാസ മന്ത്രാലയം നിര്‍ദ്ദേശം നല്‍കിയിട്ടുണ്ട്. ചുരുങ്ങിയ സമയത്തിനുള്ളില്‍ കാര്‍ഡ് എടുക്കുന്നത് രക്ഷിതാക്കളെ സംബന്ധിച്ച് വലിയ പ്രശ്നമായിരുന്നു. ഇത് കണക്കിലെടുത്താണ് കാലാവധി നീട്ടിയത്. ഒമാന്‍ വിദ്യാഭ്യാസ മന്ത്രാലയത്തിന്‍റെ പെട്ടെന്നുള്ള തീരുമാനം ആയതിനാല്‍ സ്കൂൾ അധ്യാപകർക്കുപോലും കാര്യങ്ങളെ പറ്റി വലിയ ധാരണ ഇല്ലായിരുന്നു. നിരവധി പേർ സമൂഹമാധ്യമങ്ങള്‍ വഴിയാണ് വാര്‍ത്ത അറിഞ്ഞത്. പല രക്ഷിതാക്കളും കഴിഞ്ഞ ദിവസം ആണ് സംഭവം അറിയുന്നത്.
12 വയസ്സിന് മുകളിലുള്ള കുട്ടികൾ ഉടൻ വാക്സിൻ എടുക്കണം
ഒമാനില്‍ 12 വയസ്സിന് മുകളിലുള്ള കുട്ടികൾ ഉടൻ വാക്സിന്‍ എടുക്കണം. രണ്ട് ഡോഡ് വാക്സിന്‍ സ്വീകരിച്ച് കഴിഞ്ഞാല്‍ അതിന്‍റെ സർട്ടിഫിക്കറ്റും സ്ക്കൂളുകളില്‍ നല്‍കേണ്ടി വരും. ചില സ്കൂളുകൾ രക്ഷിതാക്കള്‍ക്ക് ഇതു സംബന്ധിച്ച വിവരങ്ങള്‍ കൈമാറിയിട്ടുണ്ട്. വാക്സിൻ സ്വീകരിച്ചതിന്‍റെ സർട്ടിഫിക്കറ്റുകൾ സ്കൂളില്‍ സമര്‍പ്പിക്കാത്തവര്‍ക്ക് സ്ക്കൂള്‍ തുറക്കുമ്പോള്‍ പ്രവേശനം അനുവദിക്കില്ലെന്ന് അധികൃതര്‍ മുന്നറിയിപ്പ് നല്‍കിയിട്ടുണ്ട്. നേരത്തേ 15 വയസ്സിന് മുകളിലുള്ള കുട്ടികൾക്ക് മാത്രം ആയിരുന്നു റെസിഡൻറ് കാർഡ് നിര്‍ബന്ധമാക്കിയിരുന്നത്. അതുകൊണ്ട് തന്നെ കാര്‍ഡ് എടുക്കാത്ത നിരവധി പേര്‍ ഉണ്ട്. വലിയ സാമ്പത്തിക ബാധ്യത ഉള്ളത് കൊണ്ടാണ് പലരും കാര്‍ഡ് എടുക്കാതെ ഇരുന്നിരുന്നത്. അപേക്ഷ പൂരിപ്പിച്ച് സമര്‍പ്പിക്കുന്നതിന് ഒരു കുട്ടിക്ക് 14 റിയാല്‍ വരും. എന്നാല്‍ കുട്ടികളുടെ കാര്‍ഡ് എടുക്കുന്നതിന് 11 റിയാല്‍ ആണ് ഒമാന്‍ റോയല്‍ പോലീസ് ഇടാക്കുന്നത്.
രക്ഷിതാക്കള്‍ക്ക് വലിയ സാമ്പത്തിക ബാധ്യത
കുട്ടികള്‍ക്ക് റെസിഡൻറ് കാർഡ് എടുക്കുന്നതിന് സ്പോൺസറുടെ ഒപ്പും സീലും അപേക്ഷയിൽ നിര്‍ബന്ധമാണ്. സ്പോൺസർ സ്ഥലത്തില്ലാത്തവർക്കും, ഒമാന്‍റെ ദൂരെ ദേശങ്ങളില്‍ കഴിയുന്നവരും സ്പോൺസർ എത്തുന്നതു വരെ കാത്തിരിക്കേണ്ടി വരും. റെസിഡൻറ് കാർഡ് ഓഫീസുകള്‍ ഇപ്പോള്‍ ഉച്ചവരെ മാത്രമാണ് പ്രവര്‍ത്തിക്കുന്നത്. നേരത്തെ ഇത് രാത്രിവരെ പ്രവര്‍ത്തിച്ചിരുന്നു. റെസിഡൻറ് കാർഡ് ഓഫീസുകളുടെ എണ്ണം കൂട്ടിയിട്ടുണ്ട്. മസ്കത്തില്‍ നേരത്തേ സീബിൽ മാത്രമാണ് ഓഫീസ് ഉണ്ടായിരുന്നത്. ഇപ്പോൾ അമിറാത്ത്, ഖുറം എന്നിവിടങ്ങളിലും ഓഫിസുകൾ തുറന്നിട്ടുണ്ട്. പുതിയ പാസ്പോർെട്ടടുത്തവരുടെ വിസ പഴയ പാസ്പോർട്ടിലാണെങ്കിൽ വിസ പുതിയ പാസ്പോർട്ടിലേക്ക് മാറ്റാന്‍ അധികൃതര്‍ ആവശ്യപ്പെടുന്നുണ്ട്. ഇവര്‍ വിസ പുതിയ പാസ്പോർട്ടിലേക്ക് മാറ്റിയ ശേഷം റെസിഡൻറ് കാർഡ് എടുക്കുന്നതായിരിക്കും നല്ലത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : resident card mandatory for admission to indian schools oman time extended
Malayalam News from malayalam.samayam.com, TIL Network
