Sumayya P | Samayam Malayalam | Updated: 08 Jun 2021, 02:59:52 PM
അപ്‌ലോഡ് ചെയ്യുന്ന വ്യക്തിക്ക് നാഷനല്‍ ഐഡിയോ റെസിഡന്‍സ് ഐഡിയോ ഉണ്ടായിരിക്കണമെന്നും നിബന്ധനയുണ്ട്.
റിയാദ്: സൗദി അറേബ്യയ്ക്ക് പുറത്തു നിന്ന് കൊവിഡ് പ്രതിരോധ വാക്‌സിന്‍ എടുത്ത സ്വദേശികള്‍ക്കും വിദേശികള്‍ക്കും അതുമായി ബന്ധപ്പെട്ട വിവരങ്ങള്‍ ആരോഗ്യ മന്ത്രാലയത്തിന്റെ തവക്കല്‍നാ ആപ്പില്‍ അപ് ലോഡ് ചെയ്യാന്‍ അവസരം. ആരോഗ്യ മന്ത്രാലയത്തിന്റെ വെബ്‌സൈറ്റ് വഴിയാണ് വാക്‌സിനേഷന്‍ വിവരങ്ങള്‍ അപ്‌ലോഡ് ചെയ്യേണ്ടതെന്ന് മന്ത്രാലയം ട്വിറ്റര്‍ സന്ദേശത്തില്‍ അറിയിച്ചു.
വാക്‌സിനേഷന്‍ വിവരങ്ങള്‍ എങ്ങനെ രജിസ്റ്റര്‍ ചെയ്യാം?
വെബ്‌സൈറ്റിലെ https://eservices.moh.gov.sa/CoronaVaccineRegistration/ എന്ന ലിങ്ക് വഴി വാക്‌സിനേഷന്റെ വിവരങ്ങള്‍ അപ്‌ലോഡ് ചെയ്താല്‍ അത് തവക്കല്‍ ആപ്പില്‍ പ്രതിഫലിക്കും. അതേസമയം, നല്‍കുന്ന വിവരം കൃത്യമാണെന്ന് ഓരോ ആളും ഉറപ്പു വരുത്തണം. അപ്‌ലോഡ് ചെയ്യുന്ന വ്യക്തിക്ക് നാഷനല്‍ ഐഡിയോ റെസിഡന്‍സ് ഐഡിയോ ഉണ്ടായിരിക്കണമെന്നും നിബന്ധനയുണ്ട്. ഒരു എംബിയില്‍ കൂടാത്ത വലിപ്പത്തില്‍ പിഡിഫ് ഫോര്‍മാറ്റിലാണ് വാക്‌സിനേഷന്‍ സര്‍ട്ടിഫിക്കറ്റ് അപ്‌ലോഡ് ചെയ്യേണ്ടതെന്നും മന്ത്രാലയം അറിയിച്ചു.
പ്രത്യേകം ശ്രദ്ധിക്കേണ്ട കാര്യങ്ങള്‍
വാക്‌സിനേഷന്‍ വിവരങ്ങള്‍ നല്‍കുന്നവര്‍ ചില കാര്യങ്ങള്‍ പ്രത്യേകം ശ്രദ്ധിക്കണം. അയക്കുന്ന ആളുടെ പേര്, അഡ്രസ് തുടങ്ങിയ വിവരങ്ങള്‍ സര്‍ട്ടിഫിക്കറ്റില്‍ ഉണ്ടായിരിക്കണമെന്നതാണ് അതിലൊന്ന്. സര്‍ട്ടിഫിക്കറ്റ് അറബിയിലോ ഇംഗ്ലീഷിലോ ഫ്രഞ്ചിലോ ഉള്ളതായിരിക്കണം. പ്രാദേശിക ഭാഷകളില്‍ നിന്ന് അറബിയിലേക്ക് പരിഭാഷപ്പെടുത്തിയത് ആയാലും മതി. സ്വീകരിച്ച വാക്‌സിന്റെ പേര്, വാക്‌സിന്റെ ഓരോ ഡോസും സ്വീകരിച്ച തീയതി, വാക്‌സിന്റെ ബാച്ച് നമ്പര്‍ എന്നിവയും സര്‍ട്ടിഫിക്കറ്റില്‍ ഉണ്ടായിരിക്കണം. വാക്‌സിനേഷന്‍ സര്‍ട്ടിഫിക്കറ്റിനോടൊപ്പം പാസ്‌പോര്‍ട്ട് കോപ്പിയും അപ്‌ലോഡ് ചെയ്യണം. വാക്‌സിന്‍ രജിസ്‌ട്രേഷനുള്ള ഒരു അപേക്ഷ അയച്ച ആള്‍ക്ക് അതിന്റെ നടപടിക്രമങ്ങള്‍ പൂര്‍ത്തിയാകുന്നതിനു മുമ്പ് രണ്ടാമത് അപേക്ഷിക്കാനാവില്ലെന്നും മന്ത്രാലയം വ്യക്തമാക്കി.
രജിസ്‌ട്രേഷന്‍ അംഗീകൃത വാക്‌സിന്‍ സ്വീകരിച്ചവര്‍ക്ക് മാത്രം
അതേസമയം, സൗദി ആരോഗ്യ മന്ത്രാലയം അംഗീകരിച്ച വാക്‌സിനുകളില്‍ ഏതെങ്കിലുമൊന്ന് സ്വീകരിച്ചവര്‍ക്കേ തവക്കല്‍നാ ആപ്പിലേക്ക് രജിസ്റ്റര്‍ ചെയ്യാനാകൂ. ഫൈസര്‍ ബയോണ്‍ടെക്, ഓക്‌സ്‌ഫോഡ് ആസ്ട്രസെനക്ക, മൊഡേണ, ജോണ്‍സണ്‍ ആന്റ് ജോണ്‍സണ്‍ എന്നീ വാക്‌സിനുകള്‍ക്കാണ് സൗദിയില്‍ അംഗീകാരമുള്ളത്. ഇന്ത്യയില്‍ വിതരണം ചെയ്യുന്ന കൊവിഷീല്‍ഡ് ആസ്ട്രാസെനക്ക വാക്‌സിന്‍ ഓക്‌സ്‌ഫോഡ് ആസ്ട്രസെനക്കയ്ക്ക് തുല്യമായി സൗദി ആരോഗ്യ മന്ത്രാലയം അംഗീകരിച്ചിരുന്നതിനാല്‍ അത് സ്വീകരിച്ചവര്‍ക്കും രജിസ്റ്റര്‍ ചെയ്യാം. അതേസമയം, സ്വദേശിയോ പ്രവാസിയോ അല്ലാത്ത, വിസിറ്റ് വിസയില്‍ വരുന്നവര്‍ https://muqeem.sa/#/vaccine-registration/home വഴിയാണ് വാക്‌സിനേഷന്‍ വിവരങ്ങള്‍ നല്‍കേണ്ടത്. വാക്‌സിന്‍ സ്വീകരിച്ചവര്‍ക്ക് ക്വാറന്റൈന്‍ ആവശ്യമില്ലെന്ന് കഴിഞ്ഞ ദിവസം സൗദി അധികൃതര്‍ തീരുമാനമെടുത്തിരുന്നു. ഈ ഇളവ് ലഭിക്കണമെങ്കില്‍ തവക്കല്‍നാ ആപ്പില്‍ വാക്‌സിനേഷന്‍ വിവരങ്ങള്‍ അപ്‌ലോഡ് ചെയ്തിരിക്കണമെന്നാണ് വ്യവസ്ഥ.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : saudi health ministry says covid-19 vaccine status can be registered tawakkalna app from outside saudi arabia
Malayalam News from malayalam.samayam.com, TIL Network
