ഇന്ത്യയില്‍ നിന്ന് യുഎഇയിലേക്കുള്ള യാത്രാ വിലക്ക് ജൂലായ് ആറു വരെ നീട്ടി

Sumayya P | Samayam Malayalam | Updated: 08 Jun 2021, 02:16:00 PM

ഇന്ത്യയില്‍ കൊവിഡ് വ്യാപനം രൂക്ഷമായതിനെ തുടര്‍ന്ന് ഏപ്രില്‍ 25 മുതലാണ് യാത്രാവിമാനങ്ങള്‍ക്ക് യുഎഇ നാഷനല്‍ എമര്‍ജന്‍സി ക്രൈസിസ് ആന്റ് ഡിസാസ്റ്റര്‍ മാനേജ്‌മെന്റ് വിലക്ക് ഏര്‍പ്പെടുത്തിയത്.

ഇന്ത്യയില്‍ നിന്ന് യുഎഇയിലേക്കുള്ള പ്രവേശന വിലക്ക് വീണ്ടും നീട്ടി. ജൂണ്‍ 14 വരെ നിലവിലുണ്ടായിരുന്ന യാത്രാ വിലക്ക് ജൂണ്‍ 30 വരെയാണ് നീട്ടിയിരുന്നു. അതാണ് ഇപ്പോള്‍ ജൂലായ് ആറ് വരെ നീട്ടിയിരിക്കുന്നത്. പതിനായിരക്കണക്കിന് പ്രവാസികള്‍ക്കാണ് യുഎഇയുടെ പുതിയ തീരുമാനം തിരിച്ചടിയായിരിക്കുന്നത്. ഇന്ത്യയില്‍ കൊവിഡ് വ്യാപനം രൂക്ഷമായതിനെ തുടര്‍ന്ന് ഏപ്രില്‍ 25 മുതലാണ് യാത്രാവിമാനങ്ങള്‍ക്ക് യുഎഇ നാഷനല്‍ എമര്‍ജന്‍സി ക്രൈസിസ് ആന്റ് ഡിസാസ്റ്റര്‍ മാനേജ്‌മെന്റ് വിലക്ക് ഏര്‍പ്പെടുത്തിയത്. പിന്നീട് നിരവധി തവണ ഇത് നീട്ടുകയായിരുന്നു. മൂന്നാമത്തെ തവണയാണ് യുഎഇ വിലക്ക് നീട്ടുന്നത്. ജൂലായ് ആറു വരെ ഇന്ത്യക്കാര്‍ക്ക് നേരിട്ട് പ്രവേശനം അനുവദിക്കേണ്ടതില്ല എന്ന് യുഎഇ ജനറല്‍ അതോറിറ്റി ഓഫ് സിവില്‍ ഏവിയേഷന്‍ തീരുമാനിക്കുകയായിരുന്നു.

Also Read: ഷോപ്പിംഗ് സെന്ററിലെ മൂന്ന് സെക്യൂരിറ്റിക്കാരെ കുത്തി പരിക്കേല്‍പ്പിച്ച സൗദി യുവാവ് അറസ്റ്റില്‍

ജൂലായ് ആദ്യ വാരത്തിലേക്ക് ടിക്കറ്റ് ബുക്ക് ചെയ്തവര്‍ ട്രാവല്‍ ഏജന്‍സികളെ ബന്ധപ്പെട്ട് യാത്ര പുനക്രമീകരിക്കണം എന്ന് എയര്‍ ഇന്ത്യ എക്‌സ്പ്രസ് അറിയിച്ചു. യു എഇക്ക് പുറമേ ഒമാന്‍, കുവൈത്ത്, സൗദി അറേബ്യ എന്നീ രാജ്യങ്ങളും ഇന്ത്യക്കാര്‍ക്ക് നേരിട്ട് പ്രവേശന വിലക്ക് ഏര്‍പ്പെടുത്തിയിരിക്കുകയാണ്. താമസ വിസക്കാര്‍ക്ക് ബഹ്‌റൈന്‍, ഖത്തര്‍ എന്നീ രാജ്യങ്ങള്‍ പ്രവേശനം അനുവദിക്കുന്നുണ്ട്. യുഎഇയിലേക്ക് മടങ്ങാന്‍ കഴിയാതെ നിരവധി പേരാണ് കേരളത്തില്‍ കഴിയുന്നത്.