9/11 ഭീകരാക്രമണ വാര്‍ഷികത്തിന് സത്യപ്രതിജ്ഞ ഇല്ല; സമ്മര്‍ദ്ദത്തിൽ സര്‍ക്കാര്‍ രൂപീകരണം മാറ്റി താലിബാൻ

കാബൂൾ: അഫ്ഗാനിസ്ഥാനിൽ പുതിയതായി രൂപീകരിച്ച ഇടക്കാല സര്‍ക്കാരിന്റെ സത്യപ്രതിജ്ഞാ ചടങ്ങ് റദ്ദാക്കി. സെപ്റ്റംബര്‍ 11 ഭീകരാക്രമണ വാര്‍ഷികമായ ഇന്നാണ് സത്യപ്രതിജ്ഞയ്ക്ക് താലിബാൻ തെരഞ്ഞെടുത്തിരുന്നത്. സഖ്യകക്ഷികളുടെ സമ്മര്‍ദ്ദത്തെ തുടര്‍ന്നാണ് തീരുമാനത്തിൽ നിന്നും പിന്മാറിയത് എന്നാണ് റഷ്യൻ വാര്‍ത്താ ഏജൻസിയായ ടാസ് വെള്ളിയാഴ്ച റിപ്പോര്‍ട്ട് ചെയ്യുന്നത്.



വേള്‍ഡ് ട്രേഡ് സെന്റര്‍ ഭീകരാക്രമണത്തിന്റെ ഇരുപതാം വാര്‍ഷികമായ സെപ്റ്റംബര്‍ 11ന് സത്യപ്രതിജ്ഞാ ചടങ്ങുകള്‍ നടക്കുമെന്ന് സ്ഥിരീകരിക്കാത്ത റിപ്പോര്‍ട്ടുകള്‍ കഴിഞ്ഞ ദിവസങ്ങളില്‍ പുറത്തുവന്നിരുന്നു.

Also Read : താലിബാൻ സര്‍ക്കാരിന്റെ സത്യപ്രതിജ്ഞ ലോകവ്യാപാര കേന്ദ്രം തകര്‍ത്തതിന്റെ ഇരുപതാം വാര്‍ഷികത്തിന്: റിപ്പോര്‍ട്ട്സത്യപ്രതിജ്ഞാ ചടങ്ങ് ഏതാനും ദിവസങ്ങള്‍ക്ക് മുൻപ് റദ്ദാക്കി. ജനങ്ങളെ കൂടുതൽ ആശയക്കുഴപ്പത്തിലാക്കാതിരിക്കാൻ, ഇസ്ലാമിക് എമിറേറ്റിന്റെ നേതൃത്വം മന്ത്രിസഭയുടെ ഭാഗം പ്രഖ്യാപിച്ചു, അത് ഇതിനകം പ്രവർത്തിക്കാൻ തുടങ്ങിയിരിക്കുന്നുവെന്നും അഫ്ഗാൻ സർക്കാരിന്റെ സാംസ്കാരിക കമ്മീഷൻ അംഗമായ ഇനാമുള്ള സമാംഗാനി ട്വീറ്റ് ചെയ്തു.

സത്യപ്രതിജ്ഞാ ചടങ്ങുകള്‍ക്ക് റഷ്യ, ഇറാൻ, ചൈന, ഖത്തര്‍, പാകിസ്ഥാന്‍ എന്നീ രാജ്യങ്ങളെ ക്ഷണിച്ചിരുന്നു. എന്നിരുന്നാലും, 9/11 വാർഷികത്തിൽ സത്യപ്രതിജ്ഞ നടന്നാൽ പാശ്ചാത്യ രാജ്യങ്ങളും പുതിയ സര്‍ക്കാരിനും ഇടയിൽ പ്രശ്നങ്ങള്‍ രൂപംകൊണ്ടേക്കാമെന്നും ചടങ്ങിൽ പങ്കെടുക്കില്ലെന്നും റഷ്യ ഖത്തറിനെ അറിയിച്ചിരുന്നുവെന്നും റിപ്പോര്‍ട്ടുണ്ട്.

അതിന് പുറമെ, താലിബാന്റെ സത്യപ്രതിജ്ഞാ ചടങ്ങിനെ സംബന്ധിച്ച യുഎസ്, നാറ്റോ സേനകള്‍ ഖത്തറിന് മേൽ സമ്മര്‍ദ്ദം ചെലുത്തുന്നതായും റിപ്പോര്‍ട്ടുണ്ട്. ചടങ്ങ് അഫ്ഗാനിസ്ഥാനിലെ താലിബാൻ ഭരണകൂടത്തിന്റെ ആഗോള അംഗീകാരത്തിന്റെ സാധ്യതകളെ കൂടുതൽ അപകടത്തിലാക്കിയേക്കാമെന്നുമാണ് വിലയിരുത്തൽ.

അവസാന യുഎസ് സൈനീകനും അഫ്ഗാന്‍ മണ്ണ് വിട്ട് പോയ ശേഷമാണ് താലിബാന്‍ അഫ്ഗാന്റെ സ്വാതന്ത്രം പ്രഖ്യാപിച്ചത്. അതിന് പിന്നാലെ താലിബാന്‍ ഭീകരരും ഹഖാനി ശൃംഖലയിലെ ഭീകരരും തമ്മിൽ അധികാരത്തര്‍ക്കം ഉണ്ടായിരുന്നതായും അധികാരത്തിൽ എത്തുമെന്ന് കരുതിയ മുല്ല ബരാദറിന് വെടിയേറ്റതായുമുള്ള വാര്‍ത്തകള്‍ പുറത്തുവന്നിരുന്നു. ഈ വിവാദങ്ങള്‍ക്ക് ഒടുവിൽ കഴിഞ്ഞ ദിവസമാണ് താലിബാൻ രണ്ടാം സര്‍ക്കാരിനെ പ്രഖ്യാപിച്ചത്. ശരിയത്ത് നിയമങ്ങളുടെ അടിസ്ഥാനത്തിലാകും ഭരണമെന്നാണ് താലിബാൻ പ്രഖ്യാപിച്ചത്.

ചൊവ്വാഴ്ച പ്രഖ്യാപിച്ച പുതിയ സര്‍ക്കാറിന്റെ ഭാഗമായ 33 മന്ത്രിമാരില്‍ 14 പേര്‍ ഐക്യരാഷ്ട്ര സഭയുടെ ഭീകരപ്പട്ടികയില്‍ ഉള്‍പ്പെട്ടവരാണെന്ന റിപ്പോര്‍ട്ടുകളും വന്നു. മുല്ല മുഹമ്മദ് ഹസ്സന്‍ അഖുണ്ടിന്റെ നേതൃത്വത്തിലാണ് അഫ്ഗാനിസ്ഥാനിൽ പുതിയ ഭരണകൂടം രൂപീകരിക്കപ്പെടുന്നത്.

താലിബാന്‍ സ്ഥാപകനായ മുല്ല ഒമറിന്റെ അടുത്ത സഹായിയായിരുന്നു മുല്ല മുഹമ്മദ് ഹസ്സൻ അഖുംദ്. ഇയാള്‍ ഐക്യരാഷ്ട്രസഭയുടെ ഉപരോധ പട്ടികയിൽ ഇടം നേടിയ ഭീകരനാണ്. 1996 മുതൽ 2001 വരെയുള്ള താലിബാന്‍ ഭരണകാലത്ത് ഇയാള്‍ വിദേശകാര്യമന്ത്രിയും പിന്നീട് ഉപപ്രധാനമന്ത്രിയുമായിരുന്നു.

അമേരിക്ക തലയ്ക്ക് ഒരു കോടി യുഎസ് ഡോളർ ഇനാമായി പ്രഖ്യാപിച്ച ഭീകര നേതാവാണ് താലിബാൻ നിയന്ത്രണത്തിലുള്ള അഫ്ഗാന്റെ പുതിയ ആഭ്യന്തരമന്ത്രി. പാകിസ്ഥാന്‍ രഹസ്യാന്വേഷണ സംഘടനയായ ഐഎസ്ഐയുടെ സംരക്ഷണത്തിലായിരുന്നു ഇയാള്‍ എന്നാണ് മാധ്യമങ്ങള്‍ റിപ്പോര്‍ട്ട് ചെയ്യുന്നത്.