വെറുപ്പിന്‍റെ രാഷ്ട്രീയം പ്രസംഗിക്കുവാനും പ്രചരിപ്പിക്കുവാനും അൾത്താര ഉപയോഗിക്കരുത്: ഗീവർഗീസ് മാർ കൂറിലോസ്

തിരുവല്ല: അൾത്താരയും ആരാധനയും വെറുപ്പിന്‍റെ രാഷ്ട്രീയം പ്രസംഗിക്കുവാനും പ്രചരിപ്പിക്കുവാനും ആരും ഉപയോഗിക്കരുതെന്ന് യാക്കോബായ സഭാ നിരണം ഭദ്രാസനാധിപൻ ബിഷപ്പ് ഗീവർഗീസ് മാർ കൂറിലോസ്. സുവിശേഷം സ്നേഹത്തിന്‍റേതാണ്, വിദ്വേഷത്തിന്‍റേതല്ലെന്നും അദ്ദേഹം പറഞ്ഞു.



മതേതരത്വം അതിവേഗം തകർക്കപ്പെടുന്ന ഒരുകാലത്ത് അതിന് ആക്കം കൂട്ടുന്ന പ്രസ്താവനകൾ ഉത്തരവാദിത്തപ്പെട്ടവർ ഒഴിവാക്കണമെന്നും ഗീവർഗീസ് മാർ കൂറിലോസ് ഫേസ്ബുക്ക് പോസ്റ്റിലൂടെ ആവശ്യപ്പെട്ടു. പാലാ ബിഷപ്പ് മാർ ജോസഫ് കല്ലറങ്ങാട്ടിന്‍റെ വിവാദ പ്രസ്താവനയ്ക്കെതിരെ വിമർശനം ഉയരുന്ന അതേ സാഹചര്യത്തിൽ തന്നെയാണ് യാക്കോബായ സഭാ നിരണം ഭദ്രാസനാധിപന്‍റെ വാക്കുകൾ.

Also Read : ‘നാർക്കോട്ടിക് ജിഹാദ് എന്ന വാക്ക് കേൾക്കുന്നത് ആദ്യമായിട്ട്’; പാലാ ബിഷപ്പിൻ്റെ നിലപാട് തള്ളി മുഖ്യമന്ത്രി



‘നാർക്കോട്ടിക് ജിഹാദ്’ പരാമർശത്തിനെതിരെ മുഖ്യമന്ത്രി വാർത്താ സമ്മേളനത്തിൽ നടത്തിയ പ്രതികരണവും ഗീവർഗീസ് മാർ കൂറിലോസ് ഫേസ്ബുക്കിൽ പങ്കുവെച്ചിരുന്നു. ഈ ഉറച്ച നിലപാടിന് അഭിവാദ്യങ്ങൾ എന്നു പറഞ്ഞുകൊണ്ട് മുഖ്യമന്ത്രിയുടെ വാക്കുകളും വാർത്താ സമ്മേളന ചിത്രങ്ങളും പങ്കുവെച്ചായിരുന്നു ഇത്.

“നാർക്കോട്ടിക് പ്രശ്നത്തിന് ഒരു മതത്തിന്‍റെയും നിറം കൊടുക്കരുത്. അതിന്‍റെ നിറം സാമൂഹ്യവിരുദ്ധതയുടേതാണ്. സാമുദായിക ചേരിതിരിവ് ഉണ്ടാക്കുന്ന പരാമർശങ്ങൾ ഉത്തരവാദിത്തപ്പെട്ടവർ നടത്തരുത്” എന്ന മുഖ്യമന്ത്രിയുടെ പ്രതികരണമാണ് ഗീവർഗീസ് മാർ കൂറിലോസ് പങ്കുവെച്ചത്.

ലൗ ജിഹാദിനൊപ്പം നാർക്കോട്ടിക് ജിഹാദും കേരളത്തിൽ നടക്കുന്നുണ്ടെന്ന പാലാ ബിഷപ്പ് മാർ ജോസഫ് കല്ലറങ്ങാട്ടിന്‍റെ പ്രസ്താവനയെ മുഖ്യമന്ത്രി പിണറായി വിജയൻ തള്ളിയിരുന്നു. ഉത്തരവാദിത്തപ്പെട്ട സ്ഥാനത്ത് ഇരിക്കുന്നവർ ഇത്തരം പ്രശ്നം കൈകാര്യം ചെയ്യുമ്പോൾ ശ്രദ്ധിക്കണം. ഏതെങ്കിലും തരത്തിലുള്ള മതപരമായ വേർതിരിവ് ഉണ്ടാകാതിരിക്കാനും അനാവശ്യമായി ചേരികൾ സൃഷ്ടിക്കാതിരിക്കാനും ശ്രദ്ധിക്കണമെന്നായിരുന്നു മുഖ്യമന്ത്രി പറഞ്ഞത്.

Also Read : മതമേലധ്യക്ഷന്‍മാര്‍ സംയമനവും ആത്മനിയന്ത്രണവും പാലിക്കണം; ചെളിവാരിയെറിഞ്ഞ് സാമൂഹിക അന്തരീക്ഷം കലുഷിതമാക്കരുതെന്ന് വിഡി സതീശൻ



നാർക്കോട്ടിക് എന്ന വാക്കിന് എന്തെലുമൊരു മതത്തിന്‍റെ നിറം ചർത്തിക്കൊണ്ടുക്കേണ്ട കാര്യമില്ല. അതിന്‍റെ നിറം സാമൂഹിക വിരുദ്ധതയാണ്. നാർക്കോട്ടിക്കുമായി ബന്ധപ്പെട്ട പ്രശ്നങ്ങൾ ഒരു പ്രത്യേക സമുദായത്തെ മാത്രം ബാധിക്കുന്നതല്ല. ഒരു മതവും മയക്കുമരുന്നിനെ പ്രോത്സാഹിപ്പിക്കുന്നില്ല. സാധാരണഗതിയിൽ ആ ഒരു നിലപാടാണ് നാം എടുക്കേണ്ടത്. നാർക്കോട്ടിക് സമൂഹത്തെയാകെ ബാധിക്കുന്ന പ്രശ്നം എന്ന നിലയിൽ എല്ലാവരും അതിൽ ഉത്കണ്ഠാകുലരാണ്. കഴിയാവുന്ന രീതിയിൽ അതിനെ തടയാനുള്ള നടപടികൾ സ്വീകരിച്ച് കൊണ്ടിരിക്കുമെന്നും വാർത്താസമ്മേളനത്തിൽ മുഖ്യമന്ത്രി പറഞ്ഞിരുന്നു.

കേരളത്തിലെ കത്തോലിക്ക പെൺകുട്ടികളെയും യുവാക്കളെയും ലക്ഷ്യമാക്കി ലൗ ജിഹാദിനൊപ്പം നാർക്കോട്ടിക് ജിഹാദും നടക്കുന്നുണ്ടെന്നായിരുന്നു പാലാ ബിഷപ്പ് മാർ ജോസഫ് കല്ലറങ്ങാട്ടിൽ കഴിഞ്ഞദിവസം പറഞ്ഞത്. ഇതാദ്യമായാണ് കത്തോലിക്കാ സഭയിലെ ഒരു ബിഷപ്പ് നാര്‍ക്കോട്ടിക് ജിഹാദ് എന്ന പദം ഉപയോഗിക്കുന്നത്. ലൗ ജിഹാദിനു പുറമെ നാര്‍ക്കോട്ടിക് ജിഹാദും ഉണ്ടെന്ന് ആരോപിച്ച ബിഷപ്പ് സഭയിലെ പെൺകുട്ടികളെ തട്ടിയെടുക്കാൻ ‘ചില കേന്ദ്രങ്ങള്‍’ പ്രവര്‍ത്തിക്കുന്നുണ്ടെന്ന് മുൻപ് ഒരു സര്‍ക്കുലറിലും ആരോപിച്ചിരുന്നു.

Also Read : ഇറോട്ടിക് നോവലിസ്റ്റുമായി പ്രണയം; സ്പെയിനിൽ യുവ ബിഷപ്പ് രാജിവെച്ചു



പ്രണയത്തെ സഭ എതിര്‍ക്കുന്നില്ല. എന്നാൽ ഇവിടെ പ്രണയമല്ല സംഭവിക്കുന്നതെന്നും ജിഹാദികളുടെ ലക്ഷ്യം പൂര്‍ണമായി നശിപ്പിക്കുക എന്നതണെന്നും ബിഷപ്പ് പറഞ്ഞിരുന്നു. അമുസ്ലീങ്ങളായ എല്ലാവരെയും നശിപ്പിക്കണം എന്നതാണ് ജിഹാദ് കൊണ്ട് ലക്ഷ്യം വെക്കുന്നതെന്നും ആയുധം ഉപയോഗിക്കാൻ സാധിക്കാത്ത സാഹചര്യങ്ങളിലാണ് ഇത്തരം മാര്‍ഗങ്ങള്‍ ഉപയോഗിക്കുന്നതെന്നും ബിഷപ്പ് പറഞ്ഞിരുന്നു. ബിഷപ്പിന്‍റെ പ്രതികരണത്തിനെതിരെ വലിയ പ്രതിഷേധമാണ് വിവിധ കോണുകളിൽ നിന്ന് ഉയർന്നത്.