ക്നാനായ സഭാവിശ്വാസികളെ വിവാഹത്തിൻ്റെ പേരിൽ പുറത്താക്കരുത്; സബ് കോടതി വിധി ശരിവെച്ച് ഹൈക്കോടതി

കൊച്ചി: ക്നാനായ സഭയുടെ പുറത്തു നിന്നുള്ള ക്രിസ്ത്യൻ വിശ്വാസികളെ വിവാഹം ചെയ്യുന്നതിൻ്റെ പേരിൽ സഭയിൽ നിന്നു പുറത്താക്കുന്നത് വിലക്കി കേരള ഹൈക്കോടതിയും. ഇതു സംബന്ധിച്ച കോട്ടയം ജില്ലാ അഡീഷണൽ സെഷൻസ് കോടതി ഹൈക്കോടതി ഒരു മാസത്തേയ്ക്ക് സ്റ്റേ ചെയ്തു. വിവാഹത്തിൻ്റെ പേരിൽ സഭയിൽ നിന്ന് വിശ്വാസികളെ പുറത്താക്കരുതെന്ന സബ് കോടതിയുടെ വിധിയാണ് കേരള ഹൈക്കോടതി ശരിവെച്ചത്.



വിവാഹത്തിൻ്റെ പേരിൽ ക്നാനായ വിശ്വാസികളെ സഭയിൽ നിന്ന് പുറത്താക്കുന്നതിൽ നിന്ന് കോട്ടയം അതിരൂപത ആര്‍ച്ച് ബിഷപ്പിനെ തടഞ്ഞു കൊണ്ടായിരുന്നു മുൻപ് സബ് കോടതി ഉത്തരവിട്ടത്. ക്നാനായ അതിരൂപതയുടെ ഈ നടപടി ഭരണഘടനാ വിരുദ്ധമാണെന്നും കോടതി ചൂണ്ടിക്കാട്ടി. എന്നാൽ ഇതിനെതിരെ സഭ നല്‍കിയ ഹര്‍ജി പരിഗണിച്ച ജില്ലാ അഡീഷണൽ കോടതി ഈ വര്‍ഷം മെയ് 18ന് ഈ ഉത്തരവ് സ്റ്റേ ചെയ്യുകയായിരുന്നു. ഈ വിധി ചോദ്യം ചെയ്ത് ക്നാനായ കത്തോലിക്കാ നവീകരണ സമിതിയും രണ്ട് വ്യക്തികളും ഹൈക്കോടതിയിൽ ഹര്‍ജി നല്‍കുകയായിരുന്നു. ഈ ഹര്‍ജി പരിഗണിക്കവേയാണ് കേരള ഹൈക്കോടതിയുടെ സുപ്രധാന ഉത്തരവ്.

Also Read: മുഖ്യമന്ത്രിയുടെ പ്രതികരണം മുസ്ലീം തീവ്രവാദികളെ ഭയന്നാണോ എന്ന് ദീപിക; ബിഷപ്പിനെ വിമർശിച്ച് സമസ്ത

ജീവിത പങ്കാളിയും കോട്ടയം അതിരൂപതയിലെ അംഗമായിരിക്കണമെന്ന വ്യവസ്ഥ സ്വന്തം ഇഷ്ടപ്രകാരം വിവാഹം കഴിക്കാനുള്ള പൗരൻ്റെ ആഗ്രഹത്തിന് എതിരാണെന്നും ഇത് വ്യക്തിയുടെ മൗലികാവകാശങ്ങളെ ചുരുക്കുന്നതാണെന്നും ഹൈക്കോടതി വ്യക്തമാക്കി. വിചാരണ കോടതിയുടെ ഉത്തരവ് സ്റ്റേ ചെയ്യാൻ ജില്ലാ കോടതിയ്ക്ക് മതിയായ കാരണങ്ങള്‍ ഉണ്ടായിരിക്കണമെന്നും ഹൈക്കോടതി പറഞ്ഞു. സ്വന്തം ഇഷ്ടപ്രകാരം വിവാഹം കഴിക്കാനുള്ള പൗരൻ്റെ അവകാശമാണ് റദ്ദാക്കപ്പെടുന്നതെന്ന് ഹർജി പരിഗണിച്ച ജസ്റ്റിസ് വി ജി അരുൺ വ്യക്തമാക്കിയതായി ജനയുഗം റിപ്പോര്‍ട്ട് ചെയ്തു. തുടര്‍ന്നായിരുന്നു ഹര്‍ജിക്കാര്‍ക്ക് അനുകൂലമായ വിധി പുറപ്പെടുവിച്ചത്. സബ് കോടതി ഉത്തരവ് നടപ്പാക്കുന്നത് തടയാൻ കഴിയില്ലെന്നും ഹൈക്കോടതി വ്യക്തമാക്കി.

രക്തശുദ്ധിയും വംശീയസത്വവും നിലനിര്‍ത്താനായാണ് സമുദായത്തിനുള്ളിൽ നിന്നു മാത്രം വിവാഹം കഴിക്കണമെന്ന നിബന്ധന കൊണ്ടുവന്നതെന്നണ് ക്നാനായ സഭ വിശദീകരിക്കുന്നത്. വിവാഹച്ചടങ്ങുകള്‍ക്ക് ഉള്‍പ്പെടെ ഇവരുടെ ആചാരങ്ങളിലും വ്യത്യാസമുണ്ട്. മറ്റു കത്തോലിക്കാ സഭകള്‍ തമ്മിൽ പരസ്പരമുള്ള വിവാഹബന്ധം സാധാരണമാണെങ്കിലും ക്നാനായ സഭയുടെ നേതൃത്വത്തിലുള്ള കോട്ടയം അതിരൂപതയിൽ മറ്റു ക്രിസ്ത്യൻ വിഭാഗങ്ങളുമായുള്ള വിവാഹബന്ധങ്ങള്‍ അപൂര്‍വമാണ്. ക്നാനായ സഭയ്ക്കു പുറത്തു നിന്നുള്ള വ്യക്തിയെ വിവാഹം ചെയ്ത സഭാവിശ്വാസിയെ പുറത്താക്കുയാണ് ക്നാനായ സഭ പിന്തുടരുന്ന രീതി. എന്നാൽ അടുത്ത കാലത്തായി ഈ രീതിയോടു സഭയ്ക്കുള്ളിൽ തന്നെ എതിര്‍പ്പുയരുന്നുണ്ട്. 2015ലാണ് വിഷയം കോടതിയിലെത്തുന്നത്.

Also Read: പാര്‍ട്ടിയെ ശക്തിപ്പെടുത്താൻ കോൺഗ്രസിന് ‘സിപിഎം മോഡൽ’; റിപ്പോര്‍ട്ടിങ് നടപ്പാക്കാൻ കെപിസിസി അധ്യക്ഷൻ

46 വര്‍ഷം മുൻപാണ് ചുങ്കം സ്വദേശി സിറിയക് സീറോ മലബാര്‍ സഭാ വിശ്വാസിയെ വിവാഹം ചെയ്തതിൻ്റെ പേരിൽ ക്നാനായ സഭയിൽ നിന്ന് പുറത്താകുന്നത്. തുടര്‍ന്ന് ഇദ്ദേഹത്തെ സഭയിൽ നിന്ന് പുറത്താക്കുകയായിരുന്നു. നിലവിൽ സിറിയക്കും ഭാര്യയും മൂന്നു മക്കളും അടങ്ങുന്ന കുടുംബം ക്നാനായ സഭയിൽ നിന്നു പുറത്താണ്. ഇത്തരത്തിൽ ഒരു ലക്ഷം പേരെങ്കിലും സഭയിൽ നിന്നു പുറത്തായിട്ടുണ്ടെന്നു ഏഷ്യാനെറ്റ് റിപ്പോര്‍ട്ടിൽ പറയുന്നു. ഇത്തരത്തിൽ പുറത്തായവര്‍ ചേര്‍ന്നു രൂപീകരിച്ച സംഘടനയാണ് ക്നാനായ കത്തോലിക്കാ നവീകരണ സമിതി.

ഈ വര്‍ഷം ഏപ്രിലിൽ 30നാണ് കോട്ടയം അഡീഷണൽ സബ് കോടതി സഭയുടെ വിവാദമായ രീതി വിലക്കി ഉത്തരവിട്ടത്. ഏതെങ്കലും കത്തോലിക്കാ രൂപതയിൽപ്പെടുന്ന ആളെ വിവാഹം ചെയ്തതു കൊണ്ട് ക്നാനായ സമുദായാംഗത്തെ സഭയിൽ നിന്ന് പുറത്താക്കരുതെന്ന് കോട്ടയം അതിരൂപത മെത്രാപ്പോലീത്ത, സീറോമലബാര്‍ സഭ മേജര്‍ ആര്‍ച്ച് ബിഷപ്പ് എന്നിവരെ വിലക്കണമെന്നായിരുന്നു കോടതി വിധി. ഈ വിധിയാണ് ഹൈക്കോടതി ശരിവെച്ചിരിക്കുന്നത്.