പത്തുവയസുകാരനെ കൊന്ന് അച്ഛൻ; മൃതദേഹം ഒളിപ്പിക്കാൻ സഹായിച്ചത് ഭാര്യയും കാമുകിയും

ബെംഗളൂരു: കര്‍ണാടകയിൽ യുവാവ് 10 വയസുള്ള മകനെ തല്ലിക്കൊന്ന ശേഷം മൃതദേഹം ഉപേക്ഷിച്ചതായി കേസ്. ബെംഗളൂരുവിലാണ് സംഭവം നടന്നത്. കുട്ടിയുടെ മൃതദേഹം നശിപ്പിക്കാൻ ഇയാളുടെ ഭാര്യയും കാമുകിയുമാണ് സഹായിച്ചതെന്നാണ് പോലീസ് പറയുന്നത്. ഫെബ്രുവരി ഏഴിനു നടന്ന സംഭവം അടുത്തിടെ മാത്രമാണ് പുറത്തു വരുന്നത്.



30 വയസുള്ള യുവാവാണ് കേസിലെ പ്രധാന പ്രതി. ബെംഗളൂരു ഗരുപ്പൻപല്യ സ്വദേശികളായ മൂന്ന് പ്രതികളെയും പോലീസ് അറസ്റ്റ് ചെയ്തിട്ടുണ്ട്. സുനിൽ കുമാര്‍ (30), ഭാര്യ സിന്ധു (26), സച്ചിൻ്റെ കാമുകി നാദിയ എന്നിവരാണ് അറസ്റ്റിലായത്. ഒരു സ്വകാര്യ കമ്പനിയിലെ ജീവനക്കാരനാണ് സുനിൽ. ഭാര്യ സിന്ധുവും കാമുകി നാദിയയും ഒരു വസ്ത്രനിര്‍മാണകേന്ദരത്തിലെ ജോലിക്കാരാണ്.

Also Read: ലീഗ് നേതാക്കളെ തുറന്നുകാട്ടി ഫേസ്ബുക്ക് പോസ്റ്റ്; മിനാ ജലീലിനെതിരെ സൈബർ അധിക്ഷേപം

ഓഗസ്റ്റ് 26ന് സുനിൽ മകനെ കാണാനില്ലെന്നു കാണിച്ചു നല്‍കിയ പരാതിയാണ് സംഭവത്തിൽ വഴിത്തിരിവുണ്ടാക്കിയത്. കുട്ടിയെ ഫെബ്രുവരി ഏഴു മുതൽ കാണാനില്ലെന്നായിരുന്നു പരാതി. എന്നാൽ ഏതെങ്കിലും രക്ഷിതാക്കള്‍ മക്കളെ കാണാതായാൽ പരാതി നല്‍കാൻ ഇത്രയും മാസം കാത്തിരിക്കുമോ എന്നു ചിന്തിച്ച പോലീസ് ഞെട്ടി. തുടര്‍ന്ന് കേസിൽ പോലീസ് ശക്തമായ അന്വേഷണം നടത്തുകയായിരുന്നു.

പരാതിക്കാരായ ദമ്പതികളുടെ അയൽക്കാരെയും ബന്ധുക്കളെയും സുഹൃത്തുക്കളെയും പോലീസ് ചോദ്യം ചെയ്തു. അന്വേഷണത്തിനിടയിലാണ് വിവാഹിതനായ സുനിൽ നാദിയ എന്ന യുവതിയുമായി പ്രണയബന്ധമുണ്ടെന്നു പോലീസ് കണ്ടെത്തുന്നത്. കൂടാതെ മകനെ കാണാതായതു സംബന്ധിച്ച് സുനിൽ കുമാര്‍ നല്‍കുന്ന വിവരങ്ങളും പരസ്പര വിരുദ്ധമായിരുന്നുവെന്നാണ് പോലീസ് രേഖകളെ ഉദ്ധരിച്ചുള്ള ടൈംസ് ഓഫ് ഇന്ത്യ റിപ്പോര്‍ട്ട്.

Also Read: ‘ജോസ് പക്ഷത്തിന് ശക്തി തെളിയിക്കാനായില്ല, സിപിഎമ്മിന് വീഴ്ച സംഭവിച്ചു’; സിപിഐ അവലോകന റിപ്പോർട്ട്

സുഹൃത്തുക്കളിൽ ഒരാളുടെ വീട്ടിൽ വെച്ചാണ് കുട്ടിയെ കാണാതായതെന്നാണ് ഇയാള്‍ പോലീസിനെ അറിയിച്ചത്. എന്നാൽ ഈ സുഹൃത്തിനെ കണ്ടെത്തി പോലീസ് ചോദ്യം ചെയ്തപ്പോള്‍ കുട്ടി തന്‍റെ വീട്ടിൽ വന്നിട്ടു പോലുമില്ലെന്ന് ഇയാള്‍ ഉദ്യോഗസ്ഥരെ അറിയിച്ചു. തുടര്‍ന്ന് സുനിലിനെയും നാദിയയെയും വിശദമായി ചോദ്യം ചെയ്തതോടെയാണ് സംഭവത്തിൻ്റെ ചുരുളഴിഞ്ഞത്. സംഭവിച്ച കാര്യങ്ങള്‍ ഇരുവരും പോലീസിനോട് ഏറ്റുപറഞ്ഞു.

ഫെബ്രുവരി ഏഴിനു മകൻ അവിഹിതബന്ധത്തെപ്പറ്റി നടത്തിയ പരാമര്‍ശമാണ് കൊലയിലേയ്ക്ക് നയിച്ചതെന്നാണ് പോലീസ് പറയുന്നത്. ഈ സമയത്ത് നാദിയയും വീട്ടിലണ്ടായിരുന്നു. കുട്ടി നടത്തിയ പരാമര്‍ശത്തിൽ രോഷം പൂണ്ട സുനിൽ പത്ത് വയസുകാരനെ കമ്പി വടി കൊണ്ട് തലയ്ക്കടിച്ചു കൊലപ്പെടുത്തുകയായരുന്നു. കുട്ടി ക്രൂരമര്‍ദ്ദനമേറ്റിരുന്നുവെന്നാണ് ഇതു സംബന്ധിച്ച റിപ്പോര്‍ട്ടുകള്‍. തുടര്‍ന്ന് സിന്ധു ജോലിയ്ക്കു ശേഷം തിരിച്ചു വീട്ടിലെത്തിയപ്പോഴാണ് ഈ കാഴ്ച കണ്ടത്. സംഭവിച്ച കാര്യം സിന്ധുവിനോടു ഏറ്റു പറഞ്ഞ ഇരുവരും ഇത് രഹസ്യമാക്കി വെക്കണമെന്ന് ആവശ്യപ്പെടുകയായിരുന്നു. തുടര്‍ന്ന് മൂന്നു പേരും ചേര്‍ന്ന് കുട്ടിയുടെ മൃതദേഹം ബെഡ്ഷീറ്റിൽ പൊതിഞ്ഞ് ഉപേക്ഷിക്കാനായി കൊണ്ടുപോകുകയായിരുന്നു. സുഹൃത്തിൽ നിന്നു കടം വാങ്ങിയ കാര്‍ ഉപയോഗിച്ച് തമിഴ്നാട്ടിലെ ബാര്‍ഗൂരിനു സമീപത്തെ വനപ്രദേശത്ത് മൃതദേഹം ഉപേക്ഷിക്കുകയായിരുന്നുവെന്നാണ് പോലീസ് ഉദ്യോഗസ്ഥനെ ഉദ്ധരിച്ചുള്ള ടൈംസ് ഓഫ് ഇന്ത്യ റിപ്പോര്‍ട്ട്.

എന്നാൽ ദിവസങ്ങള്‍ കഴിഞ്ഞിട്ടും കുട്ടിയുടെ തിരോധാനത്തിൽ എന്തുകൊണ്ടാണ് ഇവര്‍ പോലീസിനെ സമീപിക്കാത്തതെന്ന് സിന്ധുവിൻ്റെ വീട്ടുകാര്‍ക്ക് സംശയമുണ്ടായിരുന്നു. തുടര്‍ന്ന് ഇവര്‍ നിര്‍ബന്ധിച്ചതോടെ സുനിൽ കുമാര്‍ കുട്ടിയെ കാണാനില്ലെന്നു കാണിച്ച് പരാതി നല്‍കുകയായിരുന്നു. ഇതാണ് കൊലപാതകത്തിൻ്റെ ചുരുളഴിച്ചത്.

കുട്ടിയെ ഉപേക്ഷിക്കാനായി ഉപയോഗിച്ച കാറും കൊലയ്ക്കുപയോഗിച്ച ആയുധവും പോലീസ് കണ്ടെത്തിയിട്ടുണ്ട്. കാമുകിയുമായുള്ള ബന്ധം ഉപേക്ഷിക്കാൻ തയ്യാറാണെന്നും തന്നെ രക്ഷിക്കണമെന്നും അപേക്ഷിച്ചതോടെ ഭാര്യ സിന്ധു സുനിലിനോടൊപ്പം കുട്ടിയുടെ മൃതദേഹം ഉപേക്ഷിക്കാൻ സഹകരിച്ചെന്നും ഇതാണ് ഇവരെ അറസ്റ്റ് ചെയ്യാൻ കാരണമെന്നും പോലീസ് അറിയിച്ചു.