പാെഗാസസ് ഉപയോഗിച്ച് ഫോൺ ചോർത്തിയോ? സത്യവാങ്മൂലം നൽകാനാകില്ലെന്ന് കേന്ദ്രം

ന്യൂഡൽഹി: ഇസ്രയേലി ചാര സോഫ്റ്റ്‍‍വെയറായ പെഗാസസ് ഉപയോഗിച്ച് ഫോൺ ചോര്‍ത്തിയോ എന്ന് കോടതിയിൽ വ്യക്തമാക്കാൻ കഴിയില്ലെന്ന് കേന്ദ്രസര്‍ക്കാര്‍ സുപ്രീം കോടതിയെ അറിയിച്ചു. പെഗാസസ് ഉപയോഗം സംബന്ധിച്ച് വിശദമായ മത്യവാങ്മൂലം സമര്‍പ്പിക്കാൻ കഴിയില്ലെന്നാണ് സുപ്രീം കോടതിയിൽ ഇന്ന് കേന്ദ്രം സ്വീകരിച്ച നിലപാട്. മുൻപ് സത്യവാങ്മൂലം സമര്‍പ്പിക്കാൻ സര്‍ക്കാര്‍ രണ്ട് തവണ സമയം നീട്ടി ചോദിച്ചിരുന്നു.



ഒരു പ്രത്യേക സോഫ്റ്റ്‍‍വെയര്‍ ഉപയോഗിച്ചോ ഇല്ലയോ എന്നത് പൊതുജനങ്ങള്‍ അറിയേണ്ട കാര്യമല്ലെന്ന് സോളിസിറ്റര്‍ ജനറൽ തുഷാര്‍ മേത്ത കോടതിയിൽ വ്യക്തമാക്കി. വിഷയത്തിൽ സ്വതന്ത്ര സമിതി അന്വേഷിച്ച ശേഷം റിപ്പോര്‍ട്ട് കോടതിയിൽ സമര്‍പ്പിക്കാമെന്നും അദ്ദേഹം അറിയിച്ചു. ഫോൺ ഹാക്ക് ചെയ്തിട്ടുണ്ടോ എന്നു ഉറപ്പിക്കാനായി സാങ്കേതിക വിദഗ്ധര്‍ അടങ്ങുന്ന സമിതിയുടെ സഹായത്തോടെ പ്രസ്തുത വ്യക്തികളുടെ ഫോണുകള്‍ പരിശോധിക്കാമെന്നും തുഷാര്‍ മേത്ത പറഞ്ഞു.

Also Read: ജോസ് കെ മാണിയ്ക്ക് പിന്നാലെ ബിഷപ്പിനെ പിന്തുണച്ച് പിജെ ജോസഫ്; ബിഷപ്പ് സംസാരിച്ചത് മദ്യത്തിനും മയക്കുമരുന്നിനുമെതിരെ

എന്നാൽ ഇതിനു വിരുദ്ധമായിരുന്നു സുപ്രീം കോടതിയുടെ മറുപടി. ഹര്‍ജിക്കാര്‍ ഉന്നയിച്ച ഗുരുതരമായ വിഷയത്തിൽ കേന്ദ്രസര്‍ക്കാരിന് സത്യവാങ്മൂലം സമര്‍പ്പിച്ചാൻ ആവശ്യത്തിനു സമയം അനുവദിച്ചിരുന്നുവെന്നും ഇക്കാര്യത്തിൽ കേന്ദ്രം നിലപാട് വ്യക്തമാക്കണമെന്നും സുപ്രീം കോടതി ആവശ്യപ്പെട്ടു. കേന്ദ്രസര്‍ക്കാര്‍ ഇതിനു തയ്യാറായില്ലെങ്കിൽ സുപ്രീം കോടതി ഹര്‍ജിക്കാരുടെ വാദം കേട്ട് ആവശ്യമായ ഉത്തരവ് പുറപ്പെടുവിക്കുമെന്നും കോടതി മുന്നറിയിപ്പ് നല്‍കി. ചീഫ് ജസ്റ്റിസ് എൻ വി രമണ, ജസ്റ്റിസുമാരായ സൂര്യകാന്ത്, ഹിമാ കോഹ്ലി എന്നിവര്‍ അടങ്ങിയ ബെഞ്ചാണ് ഹര്‍ജി പരിഗണിച്ചത്.

വിദേശ ചാര സോഫ്റ്റ്‍‍വെയര്‍ ഉപയോഗിച്ച് കേന്ദ്രസര്‍ക്കാര്‍ രാജ്യത്തെ പ്രതിപക്ഷ നേതാക്കളുടെയും ഉന്നത ഉദ്യോഗസ്ഥരുടെയും മാധ്യമപ്രവര്‍ത്തകരുടെയും ഫോണുകള്‍ ചോര്‍ത്തിയെന്നാണ് ആരോപണം. ഇതുസംബന്ധിച്ച് അന്താരാഷ്ട്രതലത്തിൽ ഒരു സംഘം മാധ്യമങ്ങളുടെ കൂട്ടായ്മയാണ് നിര്‍ണായകമായ വിവരങ്ങള്‍ റിപ്പോര്‍ട്ട് ചെയ്തത്. കേന്ദ്രസര്‍ക്കാരിനെ പ്രതിക്കൂട്ടിലാക്കിയ ആരോപണത്തിൽ പ്രതിപക്ഷം മൺസൂൺ കാല പാര്‍ലമെൻ്റ് സമ്മേളനവും സ്തംഭിപ്പിച്ചിരുന്നു.

Also Read: ചെന്നിത്തലയെ തോൽപ്പിക്കണമെന്ന് ആവശ്യപ്പെട്ട് ‘ഉമ്മൻചാണ്ടിയുടെ’ ദൂതൻ വന്നു; വെളിപ്പെടുത്തലുമായി വെള്ളാപ്പള്ളി

സെപ്റ്റംബര്‍ ഏഴിനു കേസ് പരിഗണിച്ച കോടതി വിശദമായ സത്യവാങ്മൂലം സമര്‍പ്പിക്കാൻ സര്‍ക്കാരിനു കൂടുതൽ സമയം അനുവദിച്ചിരുന്നു. ഏതാനും മാധ്യമ റിപ്പോര്‍ട്ടുകളുടെ അടിസ്ഥാനത്തിൽ ഉയരുന്ന ആരോപണം മാത്രമാണെന്നും വിഷയത്തിൽ സ്വതന്ത്ര സമിതിയെ അന്വേഷണത്തിനായി നിയോഗിക്കാൻ തയ്യാറാണെന്നും മുൻപ് കേന്ദ്രം സമര്‍പ്പിച്ച ഹ്രസ്വമായ സത്യവാങ്മൂലത്തിൽ വ്യക്തമാക്കിയിരുന്നു. എന്നാൽ ഇക്കാര്യത്തിൽ വിശദമായ മറുപടി വേണമെന്ന് കേന്ദ്രത്തോടു കോടതി ആവശ്യപ്പെടുകയായിരുന്നു. തന്ത്രപ്രധാനമായ വിവരങ്ങള്‍ വെളിപ്പെടുത്താൻ കഴിയില്ലെന്നായിരുന്നു കേന്ദ്രത്തിൻ്റെ മറുപടി. എന്നാൽ അത്തരം കാര്യങ്ങള്‍ വെളിപ്പെടുത്തേണ്ടെന്നും എന്നാൽ പെഗാസസ് സോഫ്റ്റ്‍‍വെയര്‍ ഉപയോഗിച്ചോ എന്ന കാര്യത്തിൽ സത്യവാങ്മൂലം സമര്‍പ്പിച്ചാൽ എന്താണ് കുഴപ്പം എന്നും സര്‍ക്കാരിനോടു കോടതി ചോദിച്ചു.