മുതിർന്ന കോൺഗ്രസ് നേതാവ് ഓസ്കാർ ഫെർണാണ്ടസ് അന്തരിച്ചു

ബെംഗളുരു: മുതിർന്ന കോൺഗ്രസ് നേതാവും മുൻ മന്ത്രിയുമായ ഓസ്കാർ ഫെർണാണ്ടസ് (80) അന്തരിച്ചു. മംഗളുരുവിലെ ആശുപത്രിയിൽ വെച്ചായിരുന്നു അന്ത്യം. ഒന്നര മാസം മുമ്പ് വീട്ടിൽ യോഗ ചെയ്യുന്നതിനിടെ വീണ് പരിക്കേറ്റ ഓസ്കാർ ഫെർണാണ്ടസിനെ ഗുരുതരാവസ്ഥയിൽ മംഗളുരുവിലെ ആശുപത്രിയിൽ പ്രവേശിപ്പിക്കുകയായിരുന്നു. ചികിത്സയിൽ കഴിയവെയാണ് മരണം. തിങ്കളാഴ്ച ഉച്ചയോടെയാണ് അദ്ദേഹം വിടവാങ്ങിയത്.



പാെഗാസസ് ഉപയോഗിച്ച് ഫോൺ ചോർത്തിയോ? സത്യവാങ്മൂലം നൽകാനാകില്ലെന്ന് കേന്ദ്രം

1941 മാർച്ച് 27 നായിരുന്നു ഓസ്കാർ ഫെർണാണ്ടസിന്റെ ജനനം. എൽഐസിയിൽ ക്ലാർക്ക് ആയിട്ടാണ് ഔദ്യോഗിക ജീവിതം ആരംഭിച്ചത്. ഉഡുപ്പി നഗര സഭാംഗമായിട്ടായിരുന്നു രാഷ്ട്രീയ ജീവിതത്തിന്റെ തുടക്കം. 1980 ൽ ലോക്സഭയിലേക്ക് ആദ്യമായി ജയിച്ചെത്തി. ഉടുപ്പിയിൽ നിന്നായിരുന്നു ജയം. നാല് തവണ ഉഡുപ്പിയിലെ എംപിയായിരുുന്നു ഫെർണാണ്ടസ്. രാജീവ് ഗാന്ധിയുടെ പാർലമെന്ററി സെക്രട്ടറിയായി പ്രവർത്തിച്ചിട്ടുണ്ട്.

മൻമോഹൻ സിങ് മന്ത്രിസഭയിലെ ഉപരിതല ഗതാഗതം, തൊഴിൽ വകുപ്പ് മന്ത്രിയായിരുന്നു. എഐസിസി ജനറൽ സെക്രട്ടറിയായും പ്രവർത്തിച്ചിട്ടുണ്ട്. കൂടാതെ കർണ്ണാടക പിസിസി അധ്യക്ഷ സ്ഥാനവും വഹിച്ചിട്ടുണ്ട്. ഗാന്ധി കുടുംബത്തിന്റെ വിശ്വസ്തനായിരുന്നു. 2004 മുതൽ 2009 വരെയാണ് കേന്ദ്ര മന്ത്രിയായി പ്രവർത്തിച്ചത്.

യുപി തെരഞ്ഞെടുപ്പ്: യോഗിയെ നേരിടാന്‍ പ്രിയങ്ക ഗാന്ധി വരുമ്പോൾ

നാഷ്ണൽ ഹെറാൾഡ് പത്രത്തിന്റെ മാതൃസ്ഥാപനമായ ദി അസോസിയേറ്റ് ജേണൽസ് പ്രൈവറ്റ് ലിമിറ്റഡിന്റെ ഡയറക്ടറായും പ്രവർത്തിച്ചിട്ടുണ്ട്. രണ്ട് തവണ ബെംഗളൂരു ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് കൗൺസിൽ അംഗവുമായും പ്രവർത്തിച്ചു. ബ്ലോസം ഫെർണാണ്ടസാണ് ഭാര്യ. മക്കൾ: ഓഷൻ, ഓഷാനി. മരുമക്കൾ: പ്രസിൽ ക്വാഡ്രസ്, മാർക് സൽദാന.