ഭക്ഷ്യവിഷബാധയേറ്റാൽ ഉടൻ ഈ വീട്ടുവൈദ്യങ്ങൾ ഉപയോഗിക്കുക

​ഭക്ഷ്യവിഷബാധയേറ്റാൽ

നമ്മൾ പതിവായി ഉപയോഗിക്കുന്ന പഴങ്ങൾ, പച്ചക്കറികൾ, മാംസം, സമുദ്രവിഭവങ്ങൾ, പാൽ ഉൽപന്നങ്ങൾ എന്നിവയിലൂടെയെല്ലാം രോഗങ്ങൾ ഉണ്ടാക്കുന്ന ബാക്ടീരിയകൾ ശരീരത്തിൽ കടന്നു വരാനുള്ള സാധ്യതയുണ്ട്. ഏതൊരു ഭക്ഷ്യ ഉൽപ്പന്നങ്ങളിൽ നിന്നും രോഗം ഉണ്ടാക്കുന്ന ബാക്ടീരിയകളെ പൂർണമായും ഇല്ലാതാക്കാൻ കഴിയില്ലെന്ന് ആരോഗ്യ വിദഗ്ദ്ധർ ചൂണ്ടിക്കാണിക്കുന്നു. ഭക്ഷ്യ മലിനീകരണം വർദ്ധിച്ചുവരുന്ന പൊതുവായ സാഹചര്യത്തിൽ അതിൽ ഇത് എല്ലാവരുടെയും ആരോഗ്യത്തിന് വലിയൊരു ഭീഷണിയാണ്.

ഒരാളുടെ ശരീരത്തിൽ ഭക്ഷ്യവിഷബാധയുടെ ലക്ഷണങ്ങൾ നേരിടേണ്ടി വരുമ്പോൾ ശരീരത്തിന് സാധാരണയേക്കാൾ അധികം ജലാംശം നഷ്ടപ്പെടാനുള്ള സാധ്യതയുണ്ട്. അതിനാൽ തന്നെ ഇത്തരം സന്ദർഭങ്ങളിൽ ദ്രാവകങ്ങൾ നന്നായി കഴിക്കുന്നത് പരിഗണിക്കണം. അതോടൊപ്പം കട്ടിയുള്ള ഭക്ഷണങ്ങൾ കഴിവതും കുറച്ചു സമയത്തേക്ക് ഒഴിവാക്കുകയും വേണം. ഇതാണ് രോഗശമനത്തിനായി പിന്തുടരേണ്ട ആദ്യ നടപടി. അതിനുശേഷം നിങ്ങളുടെ വീട്ടിലെ അടുക്കളയിൽ തന്നെ കണ്ടെത്താൻ കഴിയുന്ന ചില ചേരുവകൾ ഉപയോഗിച്ച് ഇതിനുവേണ്ട ചികിത്സ ആരംഭിക്കാം. ഭക്ഷ്യവിഷബാധയെ വളരെ എളുപ്പത്തിൽ വീട്ടിൽ തന്നെ നേരിടാൻ സഹായകമായ ചില വീട്ടുവൈദ്യങ്ങൾ കണ്ടെത്തിയാലോ ?

​ഇഞ്ചി

ആയിരക്കണക്കിന് വർഷങ്ങളായി എണ്ണമറ്റ രോഗങ്ങളുടെ ചികിത്സയ്ക്കായി ഇഞ്ചി ഉപയോഗിച്ചു വരുന്നു. ഇഞ്ചിയിലെ അതിശക്തമായ പ്രതിരോധ ഫലങ്ങൾ അവശ്യ പോഷകങ്ങളുടെ ആഗിരണം മെച്ചപ്പെടുത്തുകയും ദഹനത്തെ സഹായിക്കുകയും ചെയ്യുന്നു. അതിനാൽ, ഇത് ഓക്കാനം, ഛർദ്ദി എന്നിവയ്ക്കുള്ള ഒരു ദ്രുത പരിഹാരമായി പ്രവർത്തിക്കും. ഭക്ഷ്യവിഷബാധയുടെ സന്ദർഭങ്ങളിൽ നിങ്ങൾക്ക് തൽക്ഷണ ആശ്വാസം നൽകാൻ ഇഞ്ചി കഴിക്കുന്നത് നല്ലതാണ്. ഈ പ്രതിവിധി ഉപയോഗിക്കുന്നതിനായി ഒരു ടീസ്പൂൺ ഇഞ്ചി ചെറുതായി അരിഞ്ഞെടുത്ത് ഒരു കപ്പ് വെള്ളത്തിലിട്ട് കുറച്ച് മിനിറ്റ് തിളപ്പിച്ച് കുറച്ച് ഇഞ്ചി ചായ തയ്യാറാക്കാം. മധുരത്തിനായി കുറച്ച് പഞ്ചസാരയോ തേനോ ചേർത്തു കുടിക്കുക. ഒരു ടീസ്പൂൺ തേനിൽ കുറച്ച് തുള്ളി ഇഞ്ചി ജ്യൂസ് ചേർത്ത് ദിവസത്തിൽ പലതവണയായി ഉള്ളിൽ കഴിക്കുന്നത് വയറു വീക്കം, വേദന എന്നിവ കുറയ്ക്കാനും സഹായിക്കും.

​നാരങ്ങ

നാരങ്ങയിലെ ആന്റി-ഇൻഫ്ലമേറ്ററി, ആൻറിവൈറൽ, ആൻറി ബാക്ടീരിയൽ ഗുണങ്ങൾ ഭക്ഷ്യവിഷബാധയുടെ ലക്ഷണങ്ങളിൽ നിന്ന് വളരെ പെട്ടെന്ന് ആശ്വാസം നൽകുന്നതാണ്. നാരങ്ങയിലെ ആസിഡ് ഭക്ഷ്യവിഷബാധയ്ക്ക് കാരണമാകുന്ന ബാക്ടീരിയകളെ വേഗത്തിൽ നിർവീര്യമാക്കാൻ സഹായിക്കുന്നു. ഒരു ടീസ്പൂൺ നാരങ്ങ നീരിൽ ഒരു നുള്ള് പഞ്ചസാര ചേർത്ത് ദിവസത്തിൽ രണ്ട് മൂന്ന് തവണ കുടിക്കുന്നത് ദഹനം മെച്ചപ്പെടുത്താൻ ഏറ്റവും ഗുണം ചെയ്യുന്ന പ്രവർത്തിയാണ്. നിങ്ങളുടെ ശരീരം വിഷ വിമുക്തമാക്കാനും ശുദ്ധീകരിക്കാനുമായി ചെറുനാരങ്ങാ നീരോടൊപ്പം ചൂടുവെള്ളം കലർത്തി ഉപ്പിട്ട് കുടിക്കുന്നതും നല്ലതാണ്.

​തുളസി ഇലകൾ

ഭക്ഷ്യവിഷബാധ മൂലമുണ്ടാകുന്ന വയറുവേദനയെ ശമിപ്പിക്കുന്നതിനുള്ള മികച്ചൊരു ഔഷധസസ്യമാണ് തുളസി. ദഹനപ്രശ്നങ്ങൾ ഉണ്ടാക്കുന്ന സൂക്ഷ്മാണുക്കളോട് പോരാടാൻ സഹായിക്കുന്ന ആന്റിമൈക്രോബയൽ ഗുണങ്ങൾ പലതും ഇതിലുണ്ട്. തുളസി ഉള്ളിൽ കഴിക്കുന്നതുവഴി നിങ്ങൾക്ക് പല വിധത്തിൽ പ്രയോജനങ്ങൾ ലഭിക്കും. തുളസി ഇലകൾ ഇടിച്ചുപിഴിഞ്ഞ നീര് ദിവസത്തിൽ പല തവണ ഒരു ടേബിൾ സ്പൂൺ തേനിനോടൊപ്പം ചേർത്ത് കുടിക്കുന്നത് രോഗശമനത്തിനും ദഹനത്തിനും ഏറ്റവും നല്ലതാണ്. അതുപോലെതന്നെ വയറുവേദന കൂടുതൽ ഉള്ളപ്പോൾ കഴിക്കാൻ കഴിയുന്ന ഒരു മികച്ച പാനീയം ഉണ്ട്. കുറച്ച് മല്ലി ഇലകൾ അരച്ചെടുത്ത് നാല് കപ്പ് വെള്ളത്തോടൊപ്പം ചേർക്കാം. ഇതിലേക്ക് കുറച്ച് തുള്ളി തുളസി എണ്ണ ചേർത്ത് മിക്സ് ചെയ്തു കുടിക്കാം. വയറുവേദനയും മറ്റ് പ്രശ്നങ്ങളും ഉണ്ടാക്കുന്ന ബാക്ടീരിയകളെ നിർവീര്യമാക്കാനായി ദിവസം മുഴുവൻ പലതവണയായി ഈ പാനീയം കുടിക്കുക. മൂന്ന് ടേബിൾസ്പൂൺ പ്ലെയിൻ തൈരിൽ തുളസി ഇല, കുറച്ച് ഉപ്പ്, ഒരു നുള്ള് കുരുമുളക് എന്നിവ ചേർത്ത് കഴിക്കുന്നതും മികച്ച പരിഹാര വിധികളിൽ ഒന്നാണ്. നിങ്ങളുടെ രോഗലക്ഷണങ്ങൾ അപ്രത്യക്ഷമാകുന്നതു വരെ ഇത് ദിവസത്തിൽ മൂന്ന് നാല് തവണ കഴിക്കുക.

​വെളുത്തുള്ളി

ശക്തമായ ആൻറിവൈറൽ, ആൻറി ബാക്ടീരിയൽ, ആന്റിഫംഗൽ ഗുണങ്ങൾ ഉള്ളതാണ് വെളുത്തുള്ളി. ഇത് ഭക്ഷ്യവിഷബാധയെ ചെറുത്തു നിർത്താൻ വളരെ ഫലപ്രദമാണ്. വയറിളക്കം, വയറുവേദന തുടങ്ങിയ ലക്ഷണങ്ങൾ ഉള്ളപ്പോൾ ഇത് കഴിക്കാൻ ശ്രമിക്കുക. ഇത്തരം പ്രശ്നങ്ങൾ വേഗത്തിൽ ഒഴിവാക്കാൻ ഇത് സഹായിക്കും. ഒരു വെളുത്തുള്ളി അല്ലി തൊലി കളഞ്ഞെടുത്ത് വെറുതെ കഴിക്കുകയോ അല്ലെങ്കിൽ വെള്ളത്തോടൊപ്പം ചേർത്ത് വിഴുങ്ങുകയോ ചെയ്യുക. വെളുത്തുള്ളിയുടെ രൂക്ഷഗന്ധം പ്രശ്നമല്ലെങ്കിൽ വെളുത്തുള്ളി ഇട്ടു തയ്യാറാക്കുന്ന ജ്യൂസും പരീക്ഷിക്കാം. വയറു വേദന കുറയ്ക്കാനായി വെളുത്തുള്ളി അവശ്യ എണ്ണയും സോയാബീൻ അവശ്യ എണ്ണയും കൂട്ടിക്കലർത്തി നിങ്ങളുടെ വയറിനു മുകളിലായി തടവുക.

​ജീരകം

ജീരകത്തിന് ഭക്ഷ്യവിഷബാധ മൂലം ഉണ്ടാവുന്ന വയറുവേദനയും വയറിലെ വീക്കവും എളുപ്പത്തിൽ കുറയ്ക്കാനാകും. തൽക്ഷണ ആശ്വാസത്തിനായി ഒരു കപ്പ് വെള്ളത്തിൽ ഒരു ടീസ്പൂൺ ജീരകം ഇട്ട് തിളപ്പിച്ച് കുടിക്കാം. ഒരു ടീസ്പൂൺ മല്ലിയിലയും അല്പം ഉപ്പും ചേർത്ത് ദിവസത്തിൽ രണ്ടുതവണ ഇത് കുടിക്കുന്നത് നല്ലതാണ്. ജീരകം ഇട്ട വെള്ളം പതിവായി കുടിക്കുന്നത് ദഹനസംബന്ധമായ പ്രശ്നങ്ങളിൽ നിന്ന് നിങ്ങളുടെ ശരീരത്തിന് സംരക്ഷണം നൽകുന്നു. ഒരു ഹെർബൽ ഡ്രിങ്ക് കണക്കേ ഇത് തയ്യാറാക്കി ദിവസത്തിൽ രണ്ട് മൂന്ന് തവണ ഇത് കുടിക്കുക. ഇത് ശരീരത്തെ ശുദ്ധീകരിക്കുകയും നിങ്ങളുടെ ലക്ഷണങ്ങളെ ഒഴിവാക്കുകയും ചെയ്യും.

Also read: ടൊമാറ്റോ കെച്ചപ്പ് മധുരം കലര്‍ന്ന വിഷമോ? കെച്ചപ്പ് പ്രേമികള്‍ അറിയാന്‍

​തേൻ

ആന്റിഫംഗൽ, ആൻറി ബാക്ടീരിയൽ ഗുണങ്ങളുള്ള തേൻ ദഹനക്കേട്, മറ്റ് ഭക്ഷ്യവിഷബാധ ലക്ഷണങ്ങൾ എന്നിവയ്ക്ക് ഫലപ്രദമായ പരിഹാരമാണ്. തേൻ ഒരു പ്രകൃതിദത്ത പരിഹാരമായി ശുദ്ധമായ രൂപത്തിൽ നിങ്ങൾക്ക് ചായയിൽ ചേർത്ത് കഴിക്കാം. ഒരു ടീസ്പൂൺ തേൻ ദിവസത്തിൽ മൂന്നു പ്രാവശ്യം കഴിക്കുന്നതുവഴി വയറിളക്ക ലക്ഷണങ്ങളെ സുഖപ്പെടുത്താൻ കഴിയുമെന്ന് കണ്ടെത്തിയിട്ടുണ്ട്. ഇത് ആമാശയത്തിലെ അധിക ആസിഡിന്റെ രൂപവത്കരണത്തെ നിയന്ത്രിക്കുന്നു.

Also read: ഭക്ഷണശേഷം 10 മിനിറ്റ് നടത്തം ശരീരത്തിന് ഗുണം ചെയ്യുന്നത് എങ്ങനെ?

​ഉലുവയും തൈരും

തൈരിൽ ആൻറി ബാക്ടീരിയൽ, ആന്റിമൈക്രോബയൽ ഗുണങ്ങളുണ്ട് എന്നറിയാമല്ലോ. ഇത് ഭക്ഷ്യവിഷബാധയ്ക്ക് കാരണമാകുന്ന ബാക്ടീരിയയെ ചെറുക്കാൻ സഹായിക്കുന്നു. കൂടാതെ, ഉലുവ വിത്തുകൾ വയറിലെ അസ്വസ്ഥതയെ ചികിത്സിക്കാനും സഹായിക്കുന്നു. ഒരു ടേബിൾ സ്പൂൺ തൈരിനൊപ്പം ഒരു ടീസ്പൂൺ ഉലുവയും ചേർത്ത് കഴിക്കാം. ഈ പ്രതിവിധി കഴിക്കുമ്പോൾ ഇത് ചവയ്ക്കേണ്ടതില്ല, നേരിട്ട് വിഴുങ്ങിയാൽ മതിയാവും. ഉലുവയും തൈരും നിങ്ങളുടെ ആമാശയത്തിൽ എത്തിച്ചേർന്ന് കഴിയുമ്പോൾ ഉണ്ടാക്കുന്ന പ്രഭാവം വയറുവേദന ഛർദ്ദി തുടങ്ങിയ ലക്ഷങ്ങൾക്ക് ഉടനടി ആശ്വാസം നൽകും.