‘മാലിന്യം ഏറ്റെടുക്കാൻ തയ്യാറാകുന്നത് നല്ലകാര്യം’; കെ പി അനിൽകുമാറിന്റെ സിപിഎം പ്രവേശനത്തെ പരിഹസിച്ച് ടി സിദ്ദിഖ്

കൊച്ചി: കെപിസിസി സംഘടനാ സെക്രട്ടറിയായിരുന്ന കെ പി അനിൽ കുമാറിന്റെ സിപിഎം പ്രവേശനത്തെ പരിഹസിച്ച് ടി സിദ്ദിഖ് രംഗത്ത്. ചില നിർബദ്ധിത സാഹചര്യങ്ങളിൽ ശുദ്ധീകരണത്തിനായി മാലിന്യങ്ങൾ പുറംതള്ളേണ്ടി വരുമെന്ന് സിദ്ദിഖ് പറഞ്ഞു. അനിൽ കുമാറിനെ സ്വീകരിച്ച സിപിഎമ്മിനെതിരെ രൂക്ഷ പരിഹാസമാണ് പോസ്റ്റിലുള്ളത്. മാലിന്യം പുറംതള്ളുമ്പോൾ അത് ഏറ്റെടുക്കാൻ ചലർ തയ്യാറാകുന്നത് നല്ലകാര്യമാണെന്ന് സിദ്ദിഖ് പറഞ്ഞു.



സിദ്ദിഖിന്റെ പോസ്റ്റ് ഇങ്ങനെ- “ഇപ്പോൾ പുഴകൾ നേരിടുന്ന ഏററവുംവലിയ പ്രശ്നം മലിനീകരണമാണ്. പലതരം മലിനീകരണങ്ങൾ… പെരിയാറിന്റെയും ചാലിയാറിന്റേതുമൊക്കെ നമുക്കറിയാം. കീടനാശിനി പ്രയോഗങ്ങൾ, രാസവസ്തുക്കൾ ഒഴുക്കിവിടൽ, പ്ലാസ്റ്റിക്കും സർവമാലിന്യങ്ങളും ഒഴുക്കിവിടുന്നു. എങ്ങോട്ടാണ് നമ്മൾ? പ്രകൃതിയുടെ മരണം സംസ്കാരത്തിന്റെ മരണമാണ്. നമ്മുടെതന്നെ മരണമാണ്. ജലമില്ലാഞ്ഞാൽ എന്തു സംസ്കാരവും എന്തു ജീവിതവും എന്തു ജീവനും?”

Also Read: ‘കുറേ മറ്റേ സാധനങ്ങൾ; ജോലി എന്തെന്നൊക്കെ എല്ലാവർക്കും അറിയാം’; കന്യാസ്ത്രീകൾക്കെതിരെ പിസി ജോർജ്

“എന്നാൽ, ചില നിർബന്ധിത സാഹചര്യങ്ങളിൽ ശുദ്ധീകരണത്തിനായി മാലിന്യങ്ങൾ പുറം തള്ളേണ്ടി വരിക സ്വാഭാവികമാണ്. മുന്നോട്ടുള്ള പോക്കിന് അങ്ങനെ ചെയ്യാൻ നിർബന്ധിതമാകും. എന്നാൽ ആ മാലിന്യം ഏറ്റെടുക്കാൻ ആരെങ്കിലും തയ്യാറാവുന്നുവെങ്കിൽ അത്‌ നല്ല കാര്യമായി കരുതണം. അവരെ നമ്മൾ അഭിനന്ദിക്കേണ്ടിയിരിക്കുന്നു, ആ നല്ല മനസ് ആരും കാണാതെ പോകരുത്‌.” സിദ്ദിഖ് പറഞ്ഞു.

അതേസമയം, കോൺഗ്രസിൽ നിന്നും കൂടുതൽ നേതാക്കൾ സിപിഎമ്മിലെത്തുമെന്ന് സംസ്ഥാന സെക്രട്ടറിയുടെ ചുമതല വഹിക്കുന്ന എ വിജയരാഘവൻ പറഞ്ഞു. കോൺഗ്രസും യുഡിഎഫും തകർച്ചയുടെ വക്കിലാണ്. നിലപാടുള്ള ആളുകൾക്ക് നിലനിൽപില്ലാത്ത ഒരു സാഹചര്യമാണ് കോൺഗ്രസിലുള്ളത്. സാധാരണ പ്രവർത്തകർ പറയുന്ന കാര്യങ്ങൾക്ക് അവിടെ ഒരു വിലയുമില്ല. ഇക്കാര്യങ്ങളെല്ലാം കൊണ്ടാണ് കോൺഗ്രസിലെ നല്ല വ്യക്തികൾ ഇടതുപക്ഷത്തോട് അടുക്കുന്നത്. യുഡിഎഫ് ഇനി വലിയ പ്രതിസന്ധിയിലേക്കാണ് നീങ്ങുന്നതെന്നും വിജയരാഘവൻ പറഞ്ഞു.

Also Read: ബിഷപ്പ് സഹായം തേടിയാൽ മാത്രം ഇടപെടും; അങ്ങനെ ഓടിച്ചെല്ലുന്ന ആളല്ല ഞാൻ: സുരേഷ് ഗോപി

കെപിസിസി ഓഫീസിന്റെ താക്കോൽ വരെ സൂക്ഷിച്ച സംഘടനാ സെക്രട്ടറിയും സിപിഎമ്മിലെത്തിയെന്ന് കെ പി അനിൽ കുമാറിനെ സ്വീകരിച്ചുകൊണ്ട് സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണൻ പറഞ്ഞു. കോൺഗ്രസ് പാർട്ടിയിലുള്ള പ്രതീക്ഷ പ്രവർത്തകർക്ക് നഷ്ടപ്പെട്ടു. കോൺഗ്രസിനെ രക്ഷിക്കാൻ ഇനി ആർക്കെങ്കിലും കഴിയുമോ എന്നറിയില്ലെന്നും കോടിയേരി പറഞ്ഞു.

സംഘടനാ പ്രശ്നങ്ങൾ കൊണ്ട് മാത്രമല്ല അനിൽകുമാർ കോൺഗ്രസ് വിട്ടത്. കോൺഗ്രസിന്‍റെ രാഷ്ട്രീയ സമീപനത്തിലെ പ്രശ്നങ്ങൾ കൊണ്ട് കൂടിയാണ് അനിൽകുമാർ കോൺഗ്രസ് വിട്ടത്. ദേശീയ തലത്തിലും കോൺഗ്രസിൽ തമ്മിലടിയും പ്രശ്നങ്ങളുമുണ്ട്. സംസ്ഥാന കോൺഗ്രസിൽ ഗുരുതരമായ പ്രശ്നങ്ങളാണ് സംഭവിക്കുന്നത്. സിപിഎമ്മിനെ അംഗീകരിക്കാൻ തയ്യാറുള്ളവർക്ക് പാർട്ടി എല്ലാവിധ പിന്തുണയും നൽകുമെന്നും അനിൽ കുമാറിനെ സ്വീകരിച്ചുകൊണ്ട് കോടിയേരി പറഞ്ഞു.