മനാമ: സൗദിയില്‍ വിദേശ തൊഴിലാളികള്‍ക്കായി ഏര്‍പ്പെടുത്തിയ ലെവി സമ്പ്രദായം പുനപ്പരിശോധിക്കണമെന്ന ആവശ്യവുമായി ശൂറാ കൗണ്‍സില്‍ രംഗത്തെത്തി. വന്‍ തുക ലെവിയായി ഈടാക്കുന്നത് ചെറുകിട, ഇടത്തരം സ്ഥാപനങ്ങളെ സാമ്പത്തിക പ്രതിസന്ധിയിലാക്കിയതായി ചൂണ്ടിക്കാണിച്ച ശൂറാ കൗണ്‍സില്‍ സമ്പ്രദായം പുനപരിശോധിക്കണമെന്ന് സര്‍ക്കാരിനോട് ആവശ്യപ്പെട്ടു.
ലെവി സ്ഥാപനങ്ങളെ പ്രതിസന്ധിയിലാക്കി
കൊവിഡ് മഹാമാരിയെ തുടര്‍ന്ന് വലിയ പ്രതിസന്ധി നേരിടുന്ന വ്യാപാര സ്ഥാപനങ്ങളുടെ നില നില്‍പ്പിനെയും വളര്‍ച്ചയെയും ലെവി സാരമായി ബാധിച്ചതായി കൗണ്‍സില്‍ അംഗങ്ങള്‍ ചൂണ്ടാക്കാട്ടി. ഇതുമൂലം ചെറുകിട, ഇടത്തരം സ്ഥാപനങ്ങള്‍ സാമ്പത്തിക പ്രതിസന്ധിയിലാണ്. ലെവി അടക്കമുള്ള ഭരണപരമായ നയങ്ങള്‍ ഇവരുടെ പ്രതിസന്ധി കൂടുതല്‍ രൂക്ഷമാക്കുകയാണ്. ഇത്തരം ഭരണപരമായ നടപടികളില്‍ പുനരാലോചന വേണം. സ്ഥാപനങ്ങളുടെ വളര്‍ച്ചയെ സഹായിക്കുന്ന നയങ്ങള്‍ ഉണ്ടാകണമെന്നും അംഗങ്ങള്‍ യോഗത്തില്‍ ആവശ്യപ്പെട്ടു.
ലെവി സമ്പ്രദായം ആരംഭിച്ചത് 2017ല്‍
കൂടുതല്‍ സൗദി ജീവനക്കാരെ ജോലിക്കു വെക്കുന്നതു പ്രോത്സാഹിപ്പിക്കുകയെന്ന ലക്ഷ്യത്തോടെ 2017 ജൂലായ് ഒന്നു മുതലാണ് വിദേശ തൊഴിലാളികള്‍ക്ക് ലെവി സമ്പ്രദായം ഏര്‍പ്പെടുത്തിയത്. ആദ്യ വര്‍ഷം 100 റിയാലായിരുന്ന ലെവി പിന്നീട് സൗദി ജീവനക്കാരുടെ കുറവിനസൃതമായി ഉയര്‍ത്തി. ഇന്‍ഷൂറന്‍സും അനുബന്ധ ഫീസുകളുമടക്കം ലെവി തുകയായി ഒരു വിദേശ തൊഴിലാളിക്ക് എതാണ്ട് പന്ത്രണ്ടായിരത്തോളം റിയാലാണ് നിലവില്‍ ചെലവ് വരുന്നത്. ഇത് രണ്ടു ലക്ഷത്തിലേറെ ഇന്ത്യന്‍ രൂപ വരും. ചെറു സ്ഥാപനങ്ങളിലുള്ള ലെവി വ്യക്തികള്‍ തന്നെ വഹിക്കേണ്ടി വരുന്നുണ്ട്. ഭൂരിഭാഗം പേര്‍ക്കും അവരുടെ സ്ഥാപനം ഈ തുകയടക്കാറാണ് രീതി. ഫലത്തില്‍ കൂടുതല്‍ വിദേശികളുള്ള സ്ഥാപനങ്ങള്‍ക്ക് വന്‍തുക ലെവി ഇനത്തില്‍ അടക്കേണ്ടി വരുന്നു. ഇത് ചെറുകിട, ഇടത്തരം സ്ഥാപനങ്ങളെ സാമ്പത്തിക പ്രതിസന്ധിയില്‍ ആക്കിയിട്ടുണ്ട്. ഇക്കാര്യത്തില്‍ ഫലപ്രദമായ ഇടപെടല്‍ നടത്താനാണ് ബന്ധപ്പെട്ട വകുപ്പുകളോട് ശൂറാ കൗണ്‍സില്‍ ആവശ്യപ്പെട്ടത്.
ആശ്രിതര്‍ക്കും ലെവി അടക്കണം
സ്വകാര്യ കമ്പനികളില്‍ ജോലി ചെയ്യുന്ന വിദേശികളുടെ ആശ്രിത വിസയില്‍ കഴിയുന്ന കുടുംബാംഗങ്ങള്‍ക്കും ലെവിയുണ്ട്. ഇഖാമ പുതുക്കണമെങ്കില്‍ ഒരു വര്‍ഷത്തെ മുഴുവന്‍ ആശ്രിത ലെവിയും അടക്കണം. ലെവി ഉയര്‍ത്തിയത് സ്ഥാപനങ്ങളെ സാമ്പത്തിക പ്രയാസത്തിലാക്കിയെന്നാണ് ശൂറാ കൗണ്‍സിലിന്റെ വിലയിരുത്തല്‍. വന്‍ തോതില്‍ വിദേശികള്‍ക്ക് തൊഴില്‍ നഷ്ടപ്പെടാനും ലെവി തീരുമാനം വഴിവെച്ചതായും കൗണ്‍സില്‍ കണ്ടെത്തി. ആശ്രിത ലെവി കാരണം പ്രവാസികള്‍ കുടുംബത്തെ നാട്ടിലയക്കുന്നതും സാധാരണയായി. കൊവിഡ് വന്നതോടെ പ്രതിസന്ധി രൂക്ഷമായി. ഈ സാഹചര്യത്തില്‍ ലെവിയുടെ കാര്യത്തില്‍ പുനരാലോചന വേണമെന്നാണ് കൗണ്‍സിലിന്റെ ആവശ്യം.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : saudi shoura council levy system for expatriates
Malayalam News from malayalam.samayam.com, TIL Network
