എന്നാല്‍, റാലി മാറ്റിവെക്കണമെന്ന പോലീസിന്റെ നിര്‍ദേശത്തിന് പിന്നില്‍ ബി.ജെ.പിയുടെ ഇടപെടല്‍ ഉണ്ടെന്നാണ് കുനാല്‍ ഘോഷ് മാധ്യമങ്ങളോട് പറഞ്ഞത്. ‘ജനപ്രിയ നേതാവായ അഭിഷേക് ബാനര്‍ജിയുടെ നേതൃത്വത്തിലുള്ള പദയാത്ര, ജനസമുദ്രമായി മാറുമെന്ന ഭയത്താലാണ് പാദയാത്ര തടയാന്‍ ബി.ജെ.പി ഈ തന്ത്രം മെനഞ്ഞത്.’ — ഘോഷ് കൂട്ടിച്ചേര്‍ത്തു.
അതേസമയം, അന്ത്യം അടുത്തെന്ന ഭയമാണ് ബി.ജെ.പിക്ക് ഉള്ളതെന്നും അതിനാലാണ് ത്രിപുര മുഖ്യമന്ത്രിയും ബി.ജെ.പി നേതാവുമായ ബിപ്ലബ് കുമാര്‍ ദേബ് ത്രിപുരയിലേക്കുള്ള തന്റെ വരവിനെ തടയാന്‍ പരമാവധി ശ്രമിക്കുന്നതെന്നും അഭിഷേക് ബാനര്‍ജി ട്വീറ്റ് ചെയ്തു. കൂടാതെ, ബി.ജെ.പിയുടെ ശ്രമങ്ങള്‍ തുടരാനും നിങ്ങള്‍ എത്ര ശ്രമിച്ചാലും തന്നെ തടയാനാകില്ലെന്നും ട്വീറ്റിലൂടെ അദ്ദേഹം അറിയിച്ചു.
ബി.ജെ.പിക്കെതിരെ നേരത്തെയും തൃണമൂല്‍ കോണ്‍ഗ്രസ് ആരോപണങ്ങള്‍ ഉന്നയിച്ചിരുന്നു. ഓഗസ്റ്റില്‍ ത്രിപുരയിലെ അഗര്‍ത്തലയിലെത്തിയ അഭിഷേക് ബാനര്‍ജിയുടെ വാഹനവ്യൂഹം ആക്രമിക്കപ്പെട്ടിരുന്നു. എന്നാല്‍, ബി.ജെ.പിയാണ് ആക്രമണത്തിന് പിന്നില്‍ എന്ന് വീഡിയോ പങ്കുവെച്ചുകൊണ്ട്, അദ്ദേഹം ആരോപിക്കുകയും ചെയ്തു. ബി.ജെ.പിയുടെ പതാകകള്‍ വഹിച്ച ചിലര്‍ അഭിഷേക് ബാനര്‍ജിയുടെ വാഹനവ്യൂഹത്തെ വടികളാല്‍ ആക്രമിക്കുന്നതും അദ്ദേഹം പങ്കുവെച്ച വീഡിയോയില്‍ ഉണ്ടായിരുന്നു.
ബംഗാള്‍ കൈയ്യില്‍, ഇനി ലക്ഷ്യം ത്രിപുര
ബി.ജെ.പി സര്‍ക്കാരിനെ വേരോടെ പിഴുതെറിയുക എന്നതാണ് തൃണമൂല്‍ കോണ്‍ഗ്രസിന്റെ ഇപ്പോഴത്തെ ലക്ഷ്യം. അതിനായി ഖേല ഹോബ് (കളി തുടരുന്നു) എന്ന തൃണമൂല്‍ കോണ്‍ഗ്രസിന്റെ ജനപ്രിയ മുദ്രാവാക്യം ഉച്ചത്തില്‍ വിളിച്ചുകൊണ്ടും ബി.ജെ.പി അംഗങ്ങള്‍ക്കിടയിലെ പടലപ്പിണക്കങ്ങള്‍ ചൂണ്ടികാണിച്ചുകൊണ്ടുമാണ് തൃണമൂല്‍ കോണ്‍ഗ്രസിലെ മുതിര്‍ന്ന നേതാക്കളും പ്രാദേശിക നേതാക്കളും മുന്നേറുന്നത്.
2024ലെ ലോക്‌സഭാ തെരഞ്ഞെടുപ്പില്‍, കേന്ദ്ര സര്‍ക്കാരിനെ താഴെയിറക്കാനുള്ള ശ്രമത്തിലാണ് മമത ബാനര്‍ജിയെങ്കില്‍ 2023ല്‍ ത്രിപുരയില്‍ നടക്കാനിരിക്കുന്ന നിയമസഭാ തെരഞ്ഞെടുപ്പില്‍ ബിപ്ലബ് ദേബിന്റെ ഭരണം കയ്യാളി, ബി.ജെ.പി അകൗണ്ട് പൂട്ടിക്കുകയാണ് മമതയുടെ അനന്തരവന്‍ കൂടിയായ അഭിഷേക് ബാനര്‍ജിയുടെ ലക്ഷ്യം.
ഇരു നേതാക്കളുടേയും ലക്ഷ്യങ്ങള്‍ നിറവേറ്റുന്നത് ഏറെ ശ്രമകരമാണെങ്കിലും രണ്ടും തമ്മില്‍ നല്ല വ്യത്യാസമുണ്ട്. കാരണം, പശ്ചിമ ബംഗാളിലെ തങ്ങളുടെ കോട്ട തകരാതെ അതീവ ജാഗ്രതയോടെ വേണം മമതയക്ക് ബി.ജി.പിയുമായുള്ള പോര് മുറുക്കാന്‍. അതേസമയം, അഭിഷേക് ബാനര്‍ജിക്കാകട്ടെ നിലവിലുള്ള ബി.ജെ.പി സര്‍ക്കാരിന്റെ പ്രതിരോധങ്ങള്‍ താണ്ടിവേണം ലക്ഷ്യത്തിലെത്താന്‍.
എന്നിരുന്നാലും, തൃണമൂല്‍ കോണ്‍ഗ്രസ് തികഞ്ഞ ആത്മവിശ്വാസത്തിലാണ്. ആഗസ്റ്റ് 17 -ന് അഭിഷേക് ബാനര്‍ജി അഗര്‍ത്തലയില്‍ മാധ്യമപ്രവര്‍ത്തകരോട് നടത്തിയ വിശദീകരണം അതിന് തെളിവാണ്. ത്രിപുരയില്‍ 2023ല്‍, തൃണമൂല്‍ കോണ്‍ഗ്രസ് സര്‍ക്കാര്‍ രൂപീകരിക്കുമെന്നും ബംഗാളിന്റെ വിജയത്തിനുശേഷം, തങ്ങളുടെ നേതാവ് മമത ബാനര്‍ജി ഇത് ഒരു വെല്ലുവിളിയായി ഏറ്റെടുത്തിരിക്കുകയാണെന്നുമായിരുന്നു അദ്ദേഹം പറഞ്ഞത്.
മാത്രവുമല്ല, ത്രിപുരയിലെ ജനസംഖ്യയില്‍ 69 ശതമാനവും ബംഗാളികളും ബാക്കി 31 ശതമാനം ആദിവാസികളുമാണ്. കൂടാതെ, സംസ്ഥാനത്തെ ജനസംഖ്യയുടെ 8.6 ശതമാനം മുസ്ലീങ്ങളും. ഈ കണക്കുകള്‍ നിരത്തിയാണ് ത്രിപുര സ്വന്തമാക്കാന്‍ കഴിയുമെന്ന് തൃണമൂല്‍ അവകാശപ്പെടുന്നത്.
ത്രിപുരയെ ആകര്‍ഷിക്കാനുള്ള മറ്റൊരു ഘടകം ഭരണകക്ഷിയായ ബി.ജെ.പിയുടെ ബലഹീനതയാണ്. ബി.ജെ.പിക്കകത്ത് നടക്കുന്ന ആഭ്യന്തര കലഹം തന്നെയാണ് തൃണമൂലിന്റെ വിജയിക്കാനുള്ള ഊര്‍ജ്ജം. പല എം.എല്‍.എമാര്‍ക്കും മുഖ്യമന്ത്രി ബിപ്ലബ് ദേബുമായി അഭിപ്രായ വ്യത്യാസമുണ്ട്. കഴിഞ്ഞ വര്‍ഷം ഒക്ടോബറില്‍ സംസ്ഥാനത്തെ മുന്‍ ആരോഗ്യ മന്ത്രി സുദീപ് റോയ് ബാര്‍മാന്റെ നേതൃത്വത്തിലുള്ള എട്ട് എം.എല്‍.എമാര്‍ ബി.ജെ.പി കേന്ദ്ര നേതൃത്വത്തെ കാണുകയും ബിപ്ലബിനെ നീക്കണമെന്ന് ആവശ്യപ്പെടുകയും ചെയ്തിരുന്നു.
ഈ തര്‍ക്കങ്ങള്‍ക്ക് അല്‍പം ശമനം വന്നിരുന്നെങ്കിലും പിന്നീട്, ദേബിന്റെ ‘സ്വേച്ഛാധിപത്യ’ മനോഭാവത്തെക്കുറിച്ചുള്ള ആരോപണങ്ങള്‍ ഡിസംബറില്‍ വീണ്ടും ഉയര്‍ന്നുവരുകയും സംസ്ഥാനത്തെ പാര്‍ട്ടി കേന്ദ്ര നിരീക്ഷകനായ വിനോദ് സോങ്കറിന്റെ സാന്നിധ്യത്തില്‍ ഒരു വിഭാഗം ബി.ജെ.പി പ്രവര്‍ത്തകര്‍ അദ്ദേഹത്തിനെതിരെ മുദ്രാവാക്യങ്ങള്‍ ഉയര്‍ത്തുകയും ചെയ്തിരുന്നു.
നിലവില്‍ ഇടതുപക്ഷത്തോടും കോണ്‍ഗ്രസിനോടും ഉള്‍പ്പെടെ മറ്റ് എല്ലാ പ്രതിപക്ഷ പാര്‍ട്ടികളോടും ബി.ജെ.പിക്കെതിരായുള്ള പോരാട്ടത്തില്‍ തങ്ങളോടൊപ്പം ചേരാന്‍ തൃണമൂല്‍ കോണ്‍ഗ്രസ് അഭ്യര്‍ത്ഥിച്ചിരിക്കുകയാണ്. എന്നാല്‍, ഇതുവരെ പ്രതിപക്ഷ ശക്തികള്‍ ആരും തന്നെ സഖ്യം രൂപീകരിക്കാനുള്ള പ്രഖ്യാപനങ്ങള്‍ ഒന്നും നടത്തിയിട്ടില്ല.
****
(Compiled by ഭദ്ര ചന്ദ്രൻ)
