കോൺഗ്രസിൽ നിന്ന് വീണ്ടും രാജി; കെപിസിസി ജനറൽ സെക്രട്ടറി രതികുമാർ പാർട്ടി വിട്ടു; സിപിഎമ്മിലേക്ക്

തിരുവനന്തപുരം: കോൺഗ്രസിൽ നിന്ന് നേതാക്കളുടെ രാജി തുടരുന്നു. കെ പി സി സി ജനറല്‍ സെക്രട്ടറി ജി രതികുമാർ പാർട്ടി വിട്ടു. സംഘടനാപരമായ വിഷയങ്ങളുന്നയിച്ചാണ് രാജി. രതികുമാർ കെപിസിസി അധ്യക്ഷന് നൽകിയ രാജിക്കത്ത് പുറത്തുവന്നു. ഇദ്ദേഹം സിപിഎമ്മിനൊപ്പം ചേർന്ന് പ്രവർത്തിക്കുമെന്നാണ് റിപ്പോർട്ട്.



“കഴിഞ്ഞ 40 വർഷമായി കോണ്‍ഗ്രസ് പ്രവർത്തകനായി പ്രവർത്തിച്ചുവന്ന ഞാൻ പാർട്ടിയുടെ പ്രാഥമിക അംഗത്വം രാജിവെച്ചതായി ഔദ്യോഗികമായി അറിയിക്കുകയാണ്. സംഘടനാപരമായ പല വിഷയങ്ങളും താങ്കളെ നേരിട്ടറിയിക്കാന്‍ പലതവണ ശ്രമിച്ചിട്ടും നിർഭാഗ്യവശാൽ കഴിഞ്ഞിട്ടില്ല. ഇതുവരെയുള്ള സ്നേഹസഹകരണങ്ങൾക്ക് നന്ദി” കെപിസിസി അധ്യക്ഷന് അയച്ച രാജിക്കത്തില്‍ രതികുമാര്‍ പറയുന്നു.

Also Read : കോൺഗ്രസിന് പിന്നാലെ യൂത്ത് കോൺഗ്രസിലും തർക്കം; ഷാഫി പറമ്പിലിനെതിരെ ഹൈക്കമാന്‍റിന് പരാതി



കോൺഗ്രസിൽ നിന്ന് രാജിവെച്ചതിന് പിന്നാലെ സിപിഎമ്മിൽ ചേരുമെന്ന് രതികുമാർ വ്യക്തമാക്കിയതായി ഏഷ്യാനെറ്റ് ന്യൂസ് റിപ്പോർട്ട് ചെയ്തു. വർഷങ്ങൾക്ക് മുന്നേ തന്നെ കെ പി സി സി സെക്രട്ടറിയായി പ്രവർത്തനം ആരംഭിച്ച വ്യക്തിയാണ് രതികുമാറെന്നാണ് മാതൃഭൂമി ന്യൂസ് റിപ്പോർട്ട് ചെയ്യുന്നത്.

കോൺഗ്രസിൽ നേതൃമാറ്റത്തിന് പിന്നാലെ നടന്ന പുനഃസംഘടനയിൽ പ്രതിഷേധിച്ച് നേതാക്കൾ പാർട്ടി വിടുന്നത് തുടരുകയാണ്. മുതിർന്ന കോൺഗ്രസ് നേതാവായിരുന്ന കെപി അനിൽകുമാർ കോൺഗ്രസ് വിട്ട് സിപിഎമ്മിൽ ചേർന്നത് ഇന്നലെയായിരുന്നു. അച്ചടക്ക നടപടി പിൻവലിക്കാത്തതിൽ പ്രതിഷേധിച്ചായിരുന്നു കെ പി അനിൽകുമാർ പർട്ടി വിട്ടത്. സിപിഎമ്മിനൊപ്പം ചേർന്ന് പ്രവർത്തിക്കുമെന്ന് വ്യക്തമാക്കിയ ഇദ്ദേഹം ഇതിന് പിന്നാലെ എകെജി സെന്‍ററിലെത്തുകയും ചെയ്തിരുന്നു.

Also Read : താലിബാൻ അഫ്ഗാൻ പിടിച്ചത് പോലെ സുധാകരൻ കെപിസിസി പിടിച്ചെടുത്തു; കോൺഗ്രസ് വിട്ട് കെപി അനിൽകുമാർ സിപിഎമ്മിൽ



കെ പി സി സി അധ്യക്ഷൻ കെ സുധാകരനെതിരെ രൂക്ഷവിമർശനമായിരുന്നു പാർട്ടി വിടുന്നത് പ്രഖ്യാപിച്ചുള്ള വാർത്താ സമ്മേളനത്തിൽ അനിൽകുമാർ നടത്തിയത്. 43 വര്‍ഷത്തെ കോണ്‍ഗ്രസ് ബന്ധം അവസാനിപ്പിക്കുകയാണെന്നും പിന്നില്‍ നിന്ന് കുത്തേറ്റ് മരിക്കാന്‍ തയ്യാറല്ലെന്നും അദ്ദേഹം പറഞ്ഞിരുന്നു. അഞ്ചുവർഷം യൂത്ത് കോൺഗ്രസ് അധ്യക്ഷനായ തനിക്ക് ഒരു സ്ഥാനവും നല്‍കിയില്ല. 2016ലെയും 2021ലെ യും നിയമസഭ തെരഞ്ഞെടുപ്പിൽ സീറ്റ് നൽകിയില്ലെന്നും അദ്ദേഹം ആരോപിച്ചിരുന്നു.

Also Read : പെരുമ്പാവൂരിൽ തോൽക്കാൻ കാരണം സിപിഎം; ആരോപണവുമായി കേരളാ കോൺഗ്രസ് എം സ്ഥാനാർഥി ബാബു ജോസഫ്



താലിബാൻ തീവ്രവാദികൾ അഫ്ഗാൻ പിടിച്ചെടുത്തത് പോലെയല്ലേ കെ സുധാകരൻ കെപിസിസി പിടിച്ചെടുത്തത്. സംഘപരിവാർ മനസുള്ള ഒരാൾ കെപിസിസി പ്രസിഡന്‍റ് ആയിരിക്കുമ്പോൾ എങ്ങിനെയാണ് ഈ രാജ്യത്ത് കോൺഗ്രസിന് നീതിയുണ്ടാവുകയെന്നും അനിൽകുമാർ ചോദിച്ചിരുന്നു.