കെ എം ഷാജി എന്തുകൊണ്ട് തോറ്റു? ലീഗിന്റെ കണ്ടെത്തൽ ഇങ്ങനെ

കണ്ണൂർ: നിമയസഭാ തെരഞ്ഞെടുപ്പിൽ അഴീക്കോട് മണ്ഡലത്തിൽ മത്സരിച്ച കെ എം ഷാജിയുടെ തോൽവിക്ക് കാരണം കോൺഗ്രസെന്ന് മുസ്ലിം ലീഗ്. മുസ്ലിം ലീഗിന്റെ മണ്ഡലം കമ്മിറ്റി തയ്യാറാക്കിയ തെരഞ്ഞെടുപ്പ് അവലോകന റിപ്പോർട്ടിലാണ് കോൺഗ്രസിനെ കുറ്റപ്പെടുത്തുന്ന പരാമർശങ്ങളുള്ളത്.



കോൺഗ്രസ് കേന്ദ്രങ്ങളിൽ കെ എം ഷാജിക്ക് ഗണ്യമായ വോട്ട് കുറവ് ഉണ്ടായെന്നാണ് ലീഗ് വിലയിരുത്തുന്നത്. കോൺഗ്രസ് സംഘടനാ തലത്തിലുള്ള വീഴ്ച പരാജയത്തിന് ഇടയാക്കിയെന്നും മുസ്ലിം ലീഗ് കുറ്റപ്പെടുത്തുന്നു. ഷാജിക്കെതിരെ ഉയർന്ന ആരോപണങ്ങൾ ലീഗിന് പ്രതിരോധിക്കാനായില്ലെന്നും റിപ്പോർട്ടിൽ പറയുന്നു.

Also Read: ബിഷപ്പിനെതിരെ കേസെടുക്കില്ല; മാഫിയാ സംഘങ്ങൾക്ക് മത ചിഹ്നം നൽകാൻ പാടില്ല: മുഖ്യമന്ത്രി

മുസ്ലിം ലീഗ് സംസ്ഥാന കമ്മിറ്റിയിൽ നിന്നും തെരഞ്ഞെടുപ്പ് പ്രചാരണത്തിന് പണം ലഭിച്ചില്ല. സ്ഥാനാർത്ഥി നിർണ്ണയത്തിലെ അനിശ്ചിതത്വം അണികളിൽ ആശയക്കുഴപ്പം ഉണ്ടാക്കി. കൂടാതെ നേതാക്കളിലെ അധികാര മോഹം മടുപ്പുണ്ടാക്കി. വികസനകാര്യങ്ങളിൽ ഷാജി ശ്രദ്ധ കൊടുക്കാതിരുന്നത് തിരിച്ചടിയായെന്നും റിപ്പോർട്ടിൽ പറയുന്നു.

Also Read: പെരുമ്പാവൂരിൽ തോൽക്കാൻ കാരണം സിപിഎം; ആരോപണവുമായി കേരളാ കോൺഗ്രസ് എം സ്ഥാനാർഥി ബാബു ജോസഫ്

അതേസമയം, കണ്ണൂർ മണ്ഡലത്തിൽ തോൽക്കാനിടയായ സാഹചര്യം ചൂണ്ടിക്കാട്ടി കോൺഗ്രസിനെതിരെ മുസ്ലിം ലീഗ് രംഗത്തെത്തിയിരുന്നു. യൂത്ത് കോൺഗ്രസ് സംസ്ഥാന വൈസ് പ്രസിഡന്റ് റിജിൽ മാക്കുറ്റിയുടെ പ്രവർത്തനങ്ങളാണ് യുഡിഎഫ് ശക്തി കേന്ദ്രങ്ങളിലെ വോട്ട് ചോർച്ചയ്ക്ക് ഇടയാക്കിയതെന്ന് ലീഗ് മണ്ഡലം കമ്മിറ്റിയുടെ റിപ്പോർട്ടിൽ പറയുന്നു. കെ സുധാകരനും മേയർ ടി ഒ മോഹനനും ഉൾപ്പെടെയുള്ളവർ മണ്ഡലത്തിലെ പ്രചാരണത്തിൽ അലംഭാവം കാട്ടിയെന്നും റിപ്പോർട്ടിൽ കുറ്റപ്പെടുത്തുന്നുണ്ട്.

കണ്ണൂർ മണ്ഡലം പ്രതീക്ഷിച്ചിരുന്ന റിജിൽ മാക്കുറ്റി സതീശൻ പാച്ചേനിയുടെ തോൽവിക്കായി ചിലരുമായി ഗൂഢാലോചന നടത്തിയെന്ന് മുസ്ലിം ലീഗ് മണ്ഡലം കമ്മിറ്റി കുറ്റപ്പെടുത്തുന്നു. കണ്ണൂരിൽ കടന്നപ്പള്ളിക്ക് ഇക്കുറി കരകയറാൻ സാധിക്കില്ലെന്നാണ് സിപിഎം കരുതിയിരുന്നതെന്നും കോൺഗ്രസിന്റെ ശക്തി കേന്ദ്രമായ കണ്ണൂർ മണ്ഡലത്തിൽ പ്രവർത്തിക്കാൻ ആളില്ലായിരുന്നുവെന്നും വിമർശനമുണ്ട്. കടന്നപ്പള്ളിക്ക് 60,313 വോട്ടുകൾ ലഭിച്ചപ്പോൾ സതീശൻ പാച്ചേനിക്ക് 58,568 വോട്ടുകളാണ് ലഭിച്ചത്. 1,745 വോട്ടിനായിരുന്നു കടന്നപ്പള്ളി രാമചന്ദ്രന്റെ ജയം.