മൂന്ന് കാര്‍ഷിക നിയമങ്ങള്‍ക്കെതിരെ പിന്തുണ നല്‍കി ജാട്ട് കര്‍ഷകരും മുസ്ലീം കര്‍ഷകരും ഞായറാഴ്ച ഉത്തര്‍പ്രദേശില്‍ ഒത്തുകൂടിയിരുന്നു. ഇതിന് പിന്നാലെ നടന്ന ഒരു സ്വകാര്യ പരിപാടിയിലാണ് തികായത്, ഒവൈസിയെ ലക്ഷ്യമിട്ടത്.
‘ഒവൈസി ബി.ജെ.പിയെ കുറ്റം പറഞ്ഞാലും ഒന്നും സംഭവിക്കാന്‍ പോകുന്നില്ല, ബി.ജെ.പി സർക്കാർ അയാളെ അറസ്റ്റ് ചെയ്യില്ല. കാരണം അദ്ദേഹം ആളുകളെ മതത്തിന്റെ അടിസ്ഥാനത്തില്‍ വിഭജിക്കുന്നുണ്ട്, യഥാര്‍ത്ഥത്തില്‍ അതുതന്നെയാണ് ബി.ജെ.പിക്ക് വേണ്ടത്.’ — രാകേഷ് കൂട്ടിച്ചേര്‍ത്തു.
അതേസമയം, 2022ലെ യു.പി തെരഞ്ഞെടുപ്പിന് മുമ്പുള്ള ഈ മഹാ സഖ്യത്തെ ബി.ജെ.പി സര്‍ക്കാര്‍ അതീവഗൗരവത്തോടെയാണ് നോക്കിക്കാണുന്നത്. ഏകദേശം 4 ലക്ഷത്തോളം കര്‍ഷകര്‍ പങ്കെടുത്ത മഹാപഞ്ചായത്ത് ബി.ജെ.പി സര്‍ക്കാരിനെ സംബന്ധിച്ചിടത്തോളം നെഞ്ചിടിപ്പ് കൂട്ടുന്നതായിരുന്നു.
അതിന് ഒരു ഉദാഹരണമാണ്, മുതിര്‍ന്ന ബി.ജെ.പി നേതാവ് നടത്തിയ പ്രസ്താവന.
‘ 2016 ലെ സര്‍ജിക്കല്‍ സ്‌ട്രൈക്കിനും ബാലാകോട്ട് വ്യോമാക്രമണത്തിനും ശേഷം ദേശീയത തലത്തില്‍ അനുകൂലമായ തരംഗം സൃഷ്ടിക്കാന്‍ ബി.ജെ.പിക്ക് സാധിച്ചിരുന്നു. എന്നാല്‍, 2019 ലെ പൊതുതിരഞ്ഞെടുപ്പില്‍ പാര്‍ട്ടിക്ക് ആറ് ലോക്‌സഭാ സീറ്റുകള്‍ നഷ്ടപ്പെടുകയാണ് ഉണ്ടായത്. അതിന് കാരണം, മുസാഫര്‍നഗറില്‍ ഉണ്ടായ ആക്രമണമായിരിക്കാം. അന്നത്തെ തെരഞ്ഞെടുപ്പില്‍ മുസാഫറില്‍ നിന്നുള്ള ബി.ജെ.പി നേതാവായ സഞ്ജീവ് ബല്യാന് വെറും 5,000 വോട്ടുകള്‍ മാത്രമാണ് നേടാനായത്. ഇപ്പോള്‍ ജാട്ടുകളും മുസ്ലീങ്ങളും തമ്മിലുള്ള ഈ വളരുന്ന സൗഹൃദവും കര്‍ഷക അസംതൃപ്തിയും കാരണം പടിഞ്ഞാറന്‍ യു.പിയിലെ സ്ഥിതി എന്താകുമെന്നാണ് ആലോചിക്കുന്നത്.”– അദ്ദേഹം പറഞ്ഞിരുന്നു.
ഈ ആശങ്ക നിലനില്‍ക്കുന്നത് കൊണ്ട് തന്നെ, യു.പിയില്‍ ഒത്തുചേര്‍ന്ന 4 ലക്ഷം കര്‍ഷക വോട്ടുകളും തങ്ങുടെ വോട്ട് ബാങ്കിലാക്കാനുള്ള തന്ത്രം പയറ്റുക എന്നതാണ് ഇനി ബി.ജെ.പിയുടെ മുന്നിലുള്ള ഏക പോംവഴി.
കാര്‍ഷിക നിയമങ്ങള്‍ പിന്‍വലിക്കാതെ കര്‍ഷകരെ തങ്ങളുടെ പക്ഷത്താക്കാനുള്ള ശ്രമങ്ങളും ഇതിനകം തന്നെ ഒരു ഭാഗത്ത് ബി.ജെ.പി നടത്തുന്നുണ്ട്. ജാട്ട്-മുസ്ലീം ഐക്യ സൂചകമായി നടന്ന മഹാപഞ്ചായത്തിന് ശേഷം, തൊട്ടടുത്ത ദിവസം തന്നെ കര്‍ഷകരെ പുകഴ്ത്തികൊണ്ട് അവരുടെ ലക്ഷ്യത്തോട് അനുഭാവം പ്രകടിപ്പിച്ചുകൊണ്ട് ബി.ജെ.പി ഒരു പത്രസമ്മേളനം നടത്തിയിരുന്നു. കര്‍ഷകരെ ‘അന്നദാത’ (ഭക്ഷണം നല്‍കുന്നയാള്‍) എന്നാണ് പാര്‍ട്ടി വിശേഷിപ്പിച്ചത്. കൂടാതെ, പ്രധാനമന്ത്രി നരേന്ദ്ര മോദി പ്രഖ്യാപിച്ച കാര്‍ഷിക നിയമങ്ങളെ പാര്‍ട്ടി നേതാക്കള്‍ വീണ്ടും പ്രോത്സാഹിപ്പിക്കുകയും ചെയ്തു. കര്‍ഷക ക്ഷേമത്തിനായാണ് മോദി ഈ നിയമങ്ങള്‍ കൊണ്ടുവന്നത് എന്നായിരുന്നു നേതാക്കള്‍ ആവര്‍ത്തിച്ച് പറഞ്ഞത്.
മാത്രമല്ല, കരിമ്പിന് വില കൂട്ടുകയും കിസാന്‍ പഞ്ചായത്തുകള്‍ക്ക് അവസരം നല്‍കുകയും ചെയ്ത്, അതിലൂടെ കര്‍ഷകരെ ആകര്‍ഷിക്കുക എന്നതാണ് ബി.ജെ.പിയുടെ ലക്ഷ്യം എന്ന് പാര്‍ട്ടി വൃത്തങ്ങള്‍ കഴിഞ്ഞ ദിവസം പറഞ്ഞതായി ദ് പ്രിന്റ് ചൂണ്ടിക്കാട്ടി.
കാര്യങ്ങള്‍ ഇങ്ങനെ ആണെങ്കിലും തെരഞ്ഞടുപ്പിന് മാസങ്ങള്‍ മാത്രം ബാക്കി നില്‍ക്കെ, കര്‍ഷകരുടെ മഹാസഖ്യത്തിനുമുന്നില്‍ ബി.ജെ.പിക്ക് മുട്ടു വിറക്കുകയില്ലെ എന്ന ചോദ്യവും ഉയരുന്നുണ്ട്. എന്നാല്‍, അതിന് വളരെ വ്യക്തമായി തന്നെ പാര്‍ട്ടി ഉത്തരവും നല്‍കിക്കഴിഞ്ഞു. യു.പിയിലെ ദളിത് വിഭാഗക്കാര്‍, പിന്നോക്ക വിഭാഗക്കാര്‍, ബ്രാഹ്മണര്‍, രജപുത്, ബനിയാസ് എന്നിവരെ ഏകോപിപ്പിച്ച് തങ്ങള്‍ക്ക് അനുകൂലമാക്കി വിജയിക്കാനാണ് പാര്‍ട്ടിയുടെ ലക്ഷ്യം. അതായത്, ജാട്ട്-മുസ്ലീം ഐക്യത്തിലുള്ള വലിയ കര്‍ഷകര്‍ക്കെതിരെ വിവിധ ജാതി വിഭാഗങ്ങളെ അണി നിരത്തും.
യു.പിയിലെ ജാതവ് ഒഴികെയുള്ള മറ്റ് ദളിത് വിഭാഗങ്ങള്‍ കഴിഞ്ഞ കുറച്ച് തെരഞ്ഞെടുപ്പുകളില്‍ ബി.ജെ.പിയെ പിന്തുണച്ചിരുന്നു. എന്നാല്‍, ജാതവ് വിഭാഗത്തേയും തങ്ങളുടെ വരുതിയിലാക്കാനുള്ള ശ്രമമാണ് ബി.ജെ.പി നടത്തുന്നത്.
ഇതിനൊരു കാരണവുമുണ്ട്, കഴിഞ്ഞ നിയമസഭാ തെരഞ്ഞെടുപ്പില്‍ മായാവതിയുടെ ബഹുജന്‍ സമാജ് പാര്‍ട്ടിക്ക് (BSP) 19 ശതമാനം വോട്ട് ലഭിച്ചത് ജാതവ് വിഭാഗത്തില്‍ നിന്നായിരുന്നു. അതിനാല്‍ തന്നെ 2022ലും ജാതി സമവാക്യത്തിലൂടെ വോട്ട് ശേഖരിച്ച് ചരിത്രം ആവര്‍ത്തിക്കാനാണ് മായാവതി തന്ത്രം മെനയുന്നുത്. ഇത് മുന്നില്‍ കണ്ടുകൊണ്ടാണ് ബി.ജെ.പിയുടെ നീക്കം. എന്നാല്‍, ജാതി സമവാക്യം എന്നത് ബി.എസ്.പിയുടെ മാത്രം അജണ്ടയല്ല, മറിച്ച് യു.പി സര്‍ക്കാരിന്റെ പ്രധാന എതിരികളായ കോണ്‍ഗ്രസും അഖിലേഷ് യാദവിന്റെ സമാജ്വാദി പാര്‍ട്ടിയും ഈ തന്ത്രം പയറ്റാനുള്ള തയ്യാറെടുപ്പിലാണ്.
കര്‍ഷകര്‍ സമരം തുടങ്ങിയിട്ട് മാസങ്ങള്‍ ഏറെ കഴിഞ്ഞിച്ചും, ബി.ജെ.പി നേതാക്കളുടെ ഭാഗത്തു നിന്നും യാതൊരു അനുകൂല നടപടിയും ഉണ്ടാകുന്നില്ല. മാത്രവുമല്ല, കര്‍ഷകരെ അധിക്ഷേപിക്കുന്ന തരത്തിലാണ് പല നേതാക്കളുടേയും പ്രസ്താവനകള്‍.
പ്രധാനമന്ത്രി നരേന്ദ്ര മോദിയുടെ സ്ഥാനത്ത് താനായിരുന്നു ഉണ്ടായിരുന്നതെങ്കില്‍ മൂന്ന് കാര്‍ഷിക നിയമങ്ങള്‍ക്കെതിരെ പ്രതിഷേധിക്കുന്ന കര്‍ഷകരെ ‘തല്ലുകയും’ അവരെ ജയിലില്‍ അടയ്ക്കുകയും ചെയ്‌തേനെ എന്നായിരുന്നു പഞ്ചാബിലെ ബി.ജെ.പിയുടെ വക്താവ് ഹരീന്ദര്‍ സിംഗ് കഹ്ലോണ്‍ പറഞ്ഞത്. കൂടാതെ, ജാട്ട്-മുസ്ലീം കര്‍ഷകരുടെ മഹാപഞ്ചായത്തിനെ സി.എ.എ വിരുദ്ധ (പൗരത്വ ഭേദഗതി നിയമം) പ്രതിഷേധം എന്നാണ് ഉത്തര്‍പ്രദേശ് ഉപമുഖ്യമന്ത്രി കേശവ് മൗര്യ വിശേഷിപ്പച്ചത്. ഡല്‍ഹിയിലെ ഷഹീന്‍ ബാഗ് മോഡല്‍ പ്രിതിഷേധമാണ് യു.പിയില്‍ നടക്കുന്നതെന്നും കോണ്‍ഗ്രസിന്റേയും സമാജ്വാദി പാര്‍ട്ടിയുടേയും അനുഭാവികള്‍ ഇവിടെ ഒത്തുചേര്‍ന്നിരിക്കുകയാണെന്നും അദ്ദേഹം അഭിപ്രായപ്പെട്ടു.
****
Compiled by ഭദ്ര ചന്ദ്രൻ
