ബാലിക മരിച്ചത് പീഡനത്തിനിടെ ശ്വാസം മുട്ടി, മൃതദേഹം പ്രതികള്‍ കത്തിച്ചു; ഡൽഹി പീഡനത്തിൽ കുറ്റപത്രം

ന്യൂഡൽഹി: ഡൽഹിയിലെ ശ്മശാനത്തിൽ ദുരൂഹസാഹചര്യത്തിൽ മരിച്ച ശേഷം മൃതദേഹം കത്തിച്ച കേസിൽ കുറ്റപത്രം സമര്‍പ്പിച്ച് പോലീസ്. പ്രായപൂര്‍ത്തിയാകാത്ത പെൺകുട്ടിയെ ലൈംഗികമായി ദുരുപയോഗം ചെയ്ത ശേഷമാണ് പ്രതികള്‍ കൊലപ്പെടുത്തിയതെന്നാണ് കുറ്റപത്രത്തിൽ വ്യക്തമാക്കിയിട്ടുള്ളത്. ഓഗസ്റ്റ് ഒന്നിനായിരുന്നു ഏറെ വാര്‍ത്താപ്രാധാന്യം നേടിയ സംഭവം നടന്നത്.



ദളിത് വിഭാഗത്തിൽപ്പെട്ട 9 വയസുള്ള പെൺകുട്ടിയാണ് പീഡനത്തിന് ഇരയായി മരിച്ചത്. പെൺകുട്ടിയും കുടുംബവും ഡൽഹിയിലെ നംഗൽ സ്റ്റേഡിയത്തിനു സമീപമായിരുന്നു താമസിച്ചിരുന്നത്. കുട്ടിയെ പ്രതികള്‍ ലൈംഗികപീഡനത്തിന് ഇരയാക്കിയെന്നും ഇതിനിടയിൽ കുട്ടി ശ്വാസം മുട്ടി മരിക്കുകയായിരുന്നുവെന്നും പോലീസ് കോടതിയിൽ വ്യക്തമാക്കി.

ഡൽഹി പോലീസ് കോടതിയിൽ സമര്‍പ്പിച്ച കുറ്റപത്രം അനുസരിച്ച് സംഭവത്തിൻ്റെ വിശദാംശങ്ങള്‍ ഇങ്ങനെയാണ്. പ്രതികളിൽ ഒരാളായ രാധേയ് ശ്യാം കുട്ടിയെ ബലാത്സംഗം ചെയ്യുന്നതിനിടെ വായ പൊത്തിപ്പിടിക്കുകയാിരുന്നു. തുടര്‍ന്ന് ശ്വാസം മുട്ടി കുട്ടി മരിക്കുകയായിരുന്നുവെന്ന് ഹിന്ദുസ്ഥാൻ ടൈംസ് കോടതിരേഖകള്‍ ഉദ്ധരിച്ച് റിപ്പോര്‍ട്ട് ചയ്തു. കുട്ടിയെ ഇയാള്‍ ബലാത്സംഗം ചെയ്യുന്ന സമയത്ത് മറ്റൊരു പ്രതിയായ കുല്‍ദീപ് സിങ് കുട്ടിയുടെ കൈകള്‍ ബലമായി പിടിച്ചു വെച്ചിരിക്കുകയായിരുന്നുവെന്നും പോലീസ് വ്യക്തമാക്കി.

Also Read: ഒരു നക്കിപ്പൂച്ച പോലും അനിൽകുമാറിനെ അധ്യക്ഷനാക്കണമെന്ന് പറഞ്ഞില്ല; കെപി അനിൽകുമാറിനെതിരെ സുധാകരൻ

മുഖ്യപ്രതിയായ രാധേയ് ശ്യാം (55), കൂട്ടുപ്രതിയായ കുൽദീപ് സിങ്, സലിം അഹമ്മദ്, ലക്ഷ്മി നാരായൺ തുടങ്ങിയവര്‍ തന്നെയാണ് കുട്ടിയുടെ അമ്മയെ മരണവിവരം അറിയിച്ചത്. കൂളറിൽ നിന്ന് വെള്ളമെടുക്കുന്നതിനിടെ കുട്ടി ഷോക്കേറ്റു മരിക്കുകയായിരുന്നുവെന്നാണ് പ്രതികള്‍ ഇരയുടെ അമ്മയോടു പറഞ്ഞത്. പോലീസിൽ അറിയിച്ചാൽ അവര്‍ കുട്ടിയുടെ കിഡ്നി മോഷ്ടിക്കുമെന്നു പറഞ്ഞാണ് സംഭവം അധികൃതരെ അറിയിക്കാതെ മൃതദേഹം ദഹിപ്പിച്ചതെന്നു മുൻപു റിപ്പോര്‍ട്ടുകളുണ്ടായിരുന്നു.

Also Read: നെല്ലിയമ്പം ഇരട്ട കൊലപാതകം; യുവാവ് അറസ്റ്റിൽ

“ശ്മശാനത്തിലെ പുരോഹിതൻ എന്നെ വിളിച്ചു കുട്ടി വൈദ്യുതാഘാതമേറ്റു മരിച്ചെന്നു പറഞ്ഞു. നമ്മള്‍ പോലീസിൽ അറിയിക്കുകയോ ആശുപത്രിയിലെത്തിക്കുകയോ ചെയ്താൽ അവര്‍ കുട്ടിയുടെ വൃക്ക മോഷ്ടിക്കുമെന്നും പറഞ്ഞു. കുട്ടിയുടെ മൃതദേഹം സൗജന്യമായി ദഹിപ്പിക്കാമെന്നും പ്രതികള്‍ വാഗ്ദാനം ചെയ്തു. കുട്ടിയുടെ മൃതദേഹം കത്തിച്ച നിലയിൽ കണ്ട ഞാൻ ഞെട്ടിപ്പോയി. എനിക്ക് എൻ്റെ മകളെ തിരിച്ചു വേണം.” ഇങ്ങനെയായിരുന്നു സംഭവത്തിനു ശേഷം കുട്ടിയുടെ അമ്മ പ്രതികരിച്ചതെന്നാണ് ദ ക്വിൻ്റ് റിപ്പോര്‍ട്ട്.

കേസിൻ്റെ ആദ്യഘട്ടത്തിൽ പോലീസ് ഗുരുതരമായ വീഴ്ച വരുത്തിയെന്ന് പോലീസിനെതിരെയും ആരോപണം ഉയര്‍ന്നിരുന്നു. മകളുടെ മൃതദേഹം സംസ്കരിക്കുന്നത് തടയാൻ പോലീസ് ഇടപെട്ടില്ലെന്നാണ് കുടുംബം ആരോപിക്കുന്നത്. ചിതയിലേയ്ക്ക് വെള്ളം ഒഴിക്കാൻ പോലീസിനോടു ആവശ്യപ്പെട്ടെങ്കിലും അവര്‍ ചെയ്തില്ലെങ്കിലും ചിത കെടുത്താൻ ശ്രമിച്ച നാട്ടുകാരെ പോലീസ് തടഞ്ഞെന്നും മരിച്ച കുട്ടിയുടെ അമ്മ പറഞ്ഞു. കേസിൽ പരാതി നല്‍കാനായി എത്തിയ കുട്ടിയുടെ മാതാപിതാക്കളെ പോലീസ് ഒരു ദിവസം മുഴുവൻ സ്റ്റേഷനിൽ ഇരുത്തിയതായി ആം ആദ്മി പാര്‍ട്ടി എംഎൽഎ അജയ് ദത്തും ആരോപിച്ചിരുന്നു. ഡൽഹി സര്‍ക്കാരിനെതിരെ ആരോപണം ഉയര്‍ന്ന സാഹചര്യത്തിൽ ആം ആദ്മി പാര്‍ട്ടി കേന്ദ്രസര്‍ക്കാരിനെയും വിമര്‍ശിച്ചു.