തീവ്രവാദമാണ് സമാധാനം സൃഷ്ടിക്കുന്നതിനുള്ള പ്രധാന പ്രതിസന്ധി: പ്രധാനമന്ത്രി നരേന്ദ്ര മോദി

ന്യൂഡൽഹി: ലോകത്ത് സമാധാനം ഉണ്ടാക്കുന്നതിനു ഏറ്റവും വലിയ പ്രതിസന്ധിയാകുന്നതെന്ന് പ്രധാനമന്ത്രി നരേന്ദ്ര മോദി. ഷാങ്ഹായ് കോര്‍പ്പറേഷൻ ഓര്‍ഗനൈസേഷൻ ഉച്ചകോടിയിൽ പങ്കെടുത്തു സംസാരിക്കുമ്പോഴായിരുന്നു പ്രധാനമന്ത്രി ഇക്കാര്യം വ്യക്തമാക്കിയത്. കൊവിഡ് സാഹചര്യത്തിൽ ഇത്തവണയും എസ്‍സിഓ ഉച്ചകോടി വെര്‍ച്വൽ രൂപത്തിലാണ് നടത്തിയത്. അഫ്ഗാനിസ്ഥാൻ വിഷയം ഉയര്‍ത്തിക്കാണിച്ചു കൊണ്ടായിരുന്നു മോദി പരിപാടിയിൽ സംസാരിച്ചത്.



അഫ്ഗാനിസ്ഥാനിലും ദക്ഷിണേഷ്യൻ മേഖല മൊത്തത്തിലുമുണ്ടായിരിക്കുന്ന തീവ്രവാദത്തിൻ്റെ വളര്‍ച്ചയാണ് സമാധാനത്തിനും സുരക്ഷയ്ക്കും അഫ്ഗാനിസ്ഥാനിലെ അരക്ഷിതാവസ്ഥയ്ക്കും കാരണമായിരിക്കുന്നതെന്ന് പ്രധാനമന്ത്രി പറഞ്ഞു. ആറു മിനിട്ടോളം നീണ്ടു നിൽക്കുന്നതായിരുന്നു പരിപാടിയിൽ പ്രധാനമന്ത്രിയുടെ പ്രസംഗം.

പ്രദേശത്ത് ഭീകരത വളരുന്നില്ലെന്നു എസ്‍‍സിഓ രാജ്യങ്ങള്‍ ഉറപ്പാക്കണമെന്നും പ്രധാമന്ത്രി ആവശ്യപ്പെട്ടു. ഇന്ത്യയുടെ അയൽരാജ്യങ്ങളായ പാകിസ്ഥാനും ചൈനയും ഉള്‍പ്പെടെ എസ്‍‍സിഓ കൂട്ടായ്മയുടെ ഭാഗമാണ്. “അഫ്ഗാനിസ്ഥാനിൽ എന്താണ് സംഭവിക്കുന്നതെന്നു നമുക്ക് ഇന്നു കാണാം. അവിടെ ഭീകരത വര്‍ദ്ധിക്കുന്നില്ലെന്ന് എസ്‍‍സിഓ അംഗങ്ങള്‍ ഉറപ്പാക്കേണ്ടതുണ്ട്.” പ്രധാനമന്ത്രി വ്യക്തമാക്കി. ഇസ്ലാം മതവുമായി ബന്ധപ്പെട്ട് സഹിഷ്ടുതയും മിതവാദവും വെച്ചുപുലര്‍ത്തുകയും മറ്റു വിഭാഗങ്ങളെ അഗീകരിക്കുകയും ചെയ്യുന്ന മുസ്ലീം സംഘടനകളുടെ കൂട്ടായ്മ രൂപപ്പെടണമെന്നും പ്രധാനമന്ത്രി ആവശ്യപ്പെട്ടു.

Also Read: നാർക്കോട്ടിക്ക് ജിഹാദ്; വാക്കുകൾ സൂക്ഷിക്കണം; ഏതെങ്കിലും ഒരു വിഭാഗത്തിന്റെ തലയിൽ ചാർത്തരുത്; ബിജെപി നേതാവ് സി കെ പദ്മനാഭൻ

അഫ്ഗാനിസ്ഥാനിൽ നിന്ന് യുഎസ് സൈന്യം പൂര്‍ണമായും പിന്മാറിയതോടെ താലിബാൻ നിയന്ത്രണത്തിലാണ് രാജ്യം. ഭീകരസംഘടനയായ താലിബാൻ്റെ നേതൃത്വത്തിൽ സര്‍ക്കാര്‍ രൂപീകരിക്കാൻ ശ്രമം തുടരുകയാണെങ്കിലും ലോകരാജ്യങ്ങള്‍ ഇതുവരെ താലിബാനെ അംഗീകരിച്ചിട്ടില്ല. താലിബാൻ ഭരണത്തിനു കീഴിൽ അഫ്ഗാനിസ്ഥാൻ ആഗോള ഭീകരത്താവളമാകുമോ എന്ന ആശങ്കയും സജീവമാണ്. ഇതിനിടയിലാണ് എസ്‍‍സിഓ ഉച്ചകോടിയിൽ പ്രധാനമന്ത്രിയുടെ പരാമര്‍ശം. തജിക്കിസ്ഥാൻ തലസ്ഥാനമായ ദുഷാൻബേയിലാണ് ഇത്തവണത്തെ എസ്‍‍സിഓ ഉച്ചകോടി നടക്കുന്നത്.



Also Read: ‘പാലാ ബിഷപ്പ് പാണ്ഡിത്യമുള്ള വ്യക്തി, ചേരിതിരിവ് ഉണ്ടാക്കാൻ ശ്രമിക്കുന്നത് തീവ്രവാദികൾ’; മന്ത്രി വി എൻ വാസവൻ

അതേസമയം, അഫ്ഗാനിലെ താലിബാൻ ഭരണകൂടത്തെ പരോക്ഷമായി പിന്തുണയ്ക്കുന്നതായിരുന്നു പാക് പ്രധാനമന്ത്രി ഇമ്രാൻ ഖാൻ്റെ പ്രസംഗം. അഫ്ഗാനിസ്ഥാനിൽ പുതിയ യാഥാര്‍ഥ്യം നിലവിൽ വന്നെന്നും അഫ്ഗാനിസ്ഥാനിൽ രാഷ്ട്രീയ സ്ഥിരത കൊണ്ടുവരാനും രാജ്യത്തെ സ്ഥിതിഗതികള്‍ മെച്ചപ്പെടുത്താനും അന്താരാഷ്ട്ര സമൂഹം സഹകരിക്കണമെന്നും ഇമ്രാൻ ഖാൻ ആവശ്യപ്പെട്ടു. അതേസമയം, അഫ്ഗാനിസ്ഥാൻ്റെ അവകാശങ്ങളെ ബഹുമാനിക്കണമെന്നും എന്നാൽ രാജ്യം ഭീകരതയുടെ താവളമാകാൻ അനുവദിക്കരുതെന്നും ഇമ്രാൻ ഖാൻ ആവശ്യപ്പെട്ടു. അഫ്ഗാനിസ്ഥാനിലെ അരക്ഷിതാവസ്ഥ മൂലം പ്രശ്നങ്ങള്‍ അനുഭവിക്കുന്ന പാകിസ്ഥാന് അവിടുത്തെ സ്ഥിതിഗതികള്‍ മെച്ചപ്പെടുന്നതിൽ സന്തോഷമുണ്ടെന്ന് ഇമ്രാൻ ഖാൻ അറിയിച്ചതായും പാക് മാധ്യമമായ ഡോൺ റിപ്പോര്‍ട്ട് ചെയ്തു. അഫ്ഗാനിസ്ഥാനിൽ താലിബാൻ ഭരണം പിടിക്കാനായി ആഭ്യന്തരയുദ്ധമോ രക്തച്ചൊരിച്ചിലോ കൂട്ടപ്പലായനമോ നടന്നില്ലെന്നത് ആശ്വാസത്തിനു വക നൽകുന്ന കാര്യമാണെന്നും ഇമ്രാൻ ഖാൻ പറഞ്ഞു.

താലിബാനുമായി നയതന്ത്രബന്ധം സ്ഥാപിക്കാൻ വൈകി മാത്രം ശ്രമം തുടങ്ങിയ ഇന്ത്യ നിലവിൽ താലിബാൻ നേതാക്കളിൽ നിന്ന് അകലം പാലിക്കുകയാണ്. പാക് സർക്കാരും താലിബാൻ നേതൃത്വവും തമ്മിൽ അടുത്ത ബന്ധമുണ്ടെന്ന് മുൻപ് റിപ്പോർട്ടുകൾ വന്നിരുന്നു. താലിബാൻ നേതൃത്വവുമായുള്ള ബന്ധം ഗുണം ചെയ്യില്ലെന്ന് ഇൻ്റലിജൻസ് മുന്നറിയിപ്പും കേന്ദ്രത്തിന് ലഭിച്ചിട്ടുണ്ട്. ഈ സാഹചര്യത്തിൽ മേഖലയിലെ നീക്കങ്ങൾ സസൂക്ഷ്മം നിരീക്ഷിക്കുകയാണ് ഇന്ത്യ.