ശശി തരൂരിനെതിരായ ‘കഴുത’ പരാമര്‍ശം; മാപ്പുപറഞ്ഞ് തെലങ്കാന കോണ്‍ഗ്രസ് അധ്യക്ഷന്‍; പ്രശ്‌നം തീര്‍ന്നെന്ന് തരൂര്‍

ന്യൂഡല്‍ഹി: കോണ്‍ഗ്രസ് നേതാവും പാര്‍ലമെന്‍റംഗവുമായ ശശി തരൂരിന് എതിരെ നടത്തിയ ‘കഴുത’ പരാമർശത്തിൽ മാപ്പ് പറഞ്ഞ് തെലങ്കാന പി സി സി അധ്യക്ഷൻ. പരാമർശം പിൻവലിക്കുന്നതായും തെലങ്കാന കോൺഗ്രസ് അധ്യക്ഷൻ എ രേവന്ത് റെഡ്ഡി അറിയിച്ചു. റെഡ്ഡി പരാമർശം പിൻവലിച്ചതിന് പിന്നാലെ പ്രശ്നങ്ങൾ അവസാനിച്ചെന്ന് വ്യക്തമാക്കി ശശി തരൂരും രംഗത്തെത്തി.



ക്ഷമാപണം സ്വീകരിക്കുന്നുവെന്നും ഇതോടെ പ്രശ്‌നങ്ങള്‍ അവസാനിച്ചുവെന്നും തിരുവനന്തപുരം എംപി ശശി തരൂർ വ്യക്തമാക്കിയതായി വാർത്താ ഏജൻസിയായ എ എൻ ഐ റിപ്പോർട്ട് ചെയ്തു. “റെഡ്ഡി തന്നെ വിളിച്ചിരുന്നു. അദ്ദേഹം നടത്തിയ പരാമർശത്തിൽ മാപ്പ് പറഞ്ഞു. ക്ഷമാപണം താൻ സ്വീകരിക്കുകയാണ്. ദൗര്‍ഭാഗ്യകരമായ പ്രശ്നം അവസാനിപ്പിക്കുന്നതില്‍ സന്തോഷമുണ്ട്” കോൺഗ്രസ് എം പി വ്യക്തമാക്കി.

Also Read : ഒരു നക്കിപ്പൂച്ച പോലും അനിൽകുമാറിനെ അധ്യക്ഷനാക്കണമെന്ന് പറഞ്ഞില്ല; കെപി അനിൽകുമാറിനെതിരെ സുധാകരൻ



തെലങ്കാനയിലും രാജ്യം മുഴുവനും കോൺഗ്രസിനെ ശക്തിപ്പെടുക്കാൻ തങ്ങൾ ഒരുമിച്ച് പ്രവർത്തിക്കുമെന്നും ശശി തരൂർ ട്വീറ്റ് ചെയ്തു. കഴിഞ്ഞ ദിവസമായിരുന്നു ശശി തരൂരിനെ രേവന്ത് റെഡ്ഡി കഴുത എന്ന് വിശേഷിപ്പിക്കുന്ന ഓഡിയോ സന്ദേശം പുറത്ത് വന്നത്. തെലങ്കാനയിലെ ഐ ടി മന്ത്രി കെ ടി രാമറാവുവിനെ പ്രസംശിച്ച തരൂരിന്‍റെ നിലപാടിനോടുള്ള എതിർപ്പ് രേഖപ്പെടുത്തവെയായിരുന്നു രേവന്ത് റെഡ്ഡിയുടെ വിവാദ പരാമർശം.

Also Read : ആവശ്യമുള്ളപ്പോൾ പ്രതികരിക്കും, ഒരു പരാതിയും നൽകിയിട്ടില്ല; താൻ ബഹുമാനിക്കുന്ന നേതാവാണ് കാനമെന്ന് ജോസ് കെ മാണി



ഇംഗ്ലീഷ് അനായാസം സംസാരിക്കാന്‍ കഴിയും എന്നതുകൊണ്ട് ഒരാള്‍ അറിവുള്ള ആളാണെന്ന് കരുതാനാവില്ല. ഭാഷ ആശയവിനിമയം നടത്താനുള്ളതാണെന്നും രേവന്ത് റെഡ്ഡി പറഞ്ഞിരുന്നു. പരാമർശം വിവാദമായതിന് പിന്നാലെയാണ് ഇദ്ദേഹം ക്ഷമാപണവുമായി രംഗത്തെത്തിയത്. പരാമര്‍ശം സഹപ്രവര്‍ത്തകനെ വേദനിപ്പിച്ചുവെങ്കില്‍ ക്ഷമാപണം നടത്തുന്നുവെന്നും അദ്ദേഹം ട്വീറ്റ് ചെയ്തു.

Also Read : കോളേജുകളിൽ യുവതികളെ മുസ്ലീം തീവ്രവദാത്തിലേയ്ക്ക് ആക‍ര്‍ഷിക്കുന്നു; താലിബാൻ അനുകൂല ചര്‍ച്ചകള്‍ ഗുരുതരമെന്ന് സിപിഎം



“ശശി തരൂരുമായി സംസാരിച്ചു. എന്‍റെ പരാമർശങ്ങൾ പിൻവലിക്കുകയും മുതിർന്ന സഹപ്രവർത്തകനെ ബഹുമാനിക്കുന്നുവെന്ന് വ്യക്തമാക്കുകയും ചെയ്യുന്നു” തെലങ്കാന കോൺഗ്രസ് അധ്യക്ഷൻ പറഞ്ഞു. നേരത്തെ ശശി തരൂരിനെതിരെ രേവന്ത് നടത്തിയ പരാമർശങ്ങൾക്കെതിരെ നിരവധി നേതാക്കൾ രംഗത്ത് വന്നിരുന്നു. പരാമർശം പിൻവലിക്കണമെന്നും നിരവധി നേതാക്കൾ ആവശ്യപ്പെട്ടതിന് പിന്നാലെയാണ് രേവന്ത് ഖേദപ്രകടനവുമായി രംഗത്തെത്തിയത്.