തൊടുപുഴയിൽ നഗരസഭാ കൗൺസില‍ര്‍ ഉൾപ്പെടെ ജോസഫ് പക്ഷം നേതാക്കൾ സിപിഎമ്മിൽ

കൊച്ചി: തൊടുപുഴയിൽ കേരളാ കോൺഗ്രസ് ജോസഫ് പക്ഷം നേതാവും നഗരസഭ 11-ാം വാർഡ് കൗൺസിലറുമായ മാത്യു ജോസഫ് സിപിഎമ്മിലെത്തി. കേരളാ കോൺഗ്രസ് മുനിസിപ്പൽ മണ്ഡലം പ്രസിഡന്റായിരുന്നു അദ്ദേഹം. തദ്ദേശ സ്വയംഭരണ തെ‍രഞ്ഞെടുപ്പിൽ മാത്യു അടക്കം രണ്ട് അംഗങ്ങളാണ് ചെണ്ട ചിഹ്നത്തിൽ വിജയിച്ചത്. മാത്യു പാ‍ര്‍ട്ടി വിട്ടതോടെ ഇത് ഒന്നായി കുറഞ്ഞിരിക്കുകയാണ്.



Also Read: 50 വർഷം ഭരിച്ച ബാങ്ക് കൈവിട്ടു, യുഡിഎഫിന് കനത്ത തിരിച്ചടി; നഷ്ടം മോൻസിൻ്റെ ശക്തികേന്ദ്രത്തിൽ!

ജോസഫ് പക്ഷം നേതാവിന്റെ കൂറുമാറ്റത്തോടെ നഗരസഭയിൽ കേവല ഭൂരിപക്ഷമില്ലാതെ യുഡിഎഫ് അംഗങ്ങളുടെ എണ്ണം 12 ആയി. എൽഡിഎഫ് അംഗങ്ങളുടെ എണ്ണം 15 ആയി. ബിജെപിക്ക് എട്ട് അംഗങ്ങൾ നഗരസഭയിൽ ഉണ്ട്. മാത്യു ജോസഫിനെതിരെ കൂറുമാറ്റ നിരോധന നിയമപ്രകാരം തെരഞ്ഞെടുപ്പ് കമ്മീഷന് പരാതി നൽകുമെന്ന് കേരളാ കോൺഗ്രസ് വ്യക്തമാക്കി. രണ്ട് അംഗങ്ങളിൽ ഒരാൾ കൂറുമാറിയാൻ നിയമം ബാധകമാകില്ലെന്നാണ് എൽഡിഎഫിന്റെ വാദം.

മാത്യു ജോസഫിന്റെ കൂറുമാറ്റത്തോടെ നഗരസഭയ്ക്കെതിരെ അവിശ്വാസം കൊണ്ടുവരാനുള്ള യുഡിഎഫിന്റെ നീക്കത്തിനാണ് തിരിച്ചടി ലഭിച്ചിരിക്കുന്നതെന്ന് റിപ്പോ‍ര്‍ട്ടര്‍ ടിവി റിപ്പോ‍ര്‍ട്ട് ചെയ്തു. മാത്യുവിനെ കൂടാതെ, യൂത്ത് കോൺഗ്രസ് വെസ്റ്റ് മണ്ഡലം പ്രസിഡന്റും ടൗൺ സ‍ര്‍വ്വീസ് സഹകരണ ബോര്‍ഡ് മെമ്പറുമായ വി ടി രാജീവ്, ജോസഫ് വിഭാഗം പ്രവ‍ര്‍ത്തകരായ പൗലോസ്, മാത്യൂസ് എന്നിവരും സിപിഎമ്മിലെത്തി. സിപിഎം സംസ്ഥാന സെക്രട്ടറിയേറ്റ് അംഗം എം എം മണിയുടെ നേതൃത്വത്തിലാണ് ഇവരെ പാ‍ര്‍ട്ടിയിലേക്ക് സ്വീകരിച്ചത്.

Also Read: നാർക്കോട്ടിക്ക് ജിഹാദ്; വാക്കുകൾ സൂക്ഷിക്കണം; ഏതെങ്കിലും ഒരു വിഭാഗത്തിന്റെ തലയിൽ ചാർത്തരുത്; ബിജെപി നേതാവ് സി കെ പദ്മനാഭൻ

അതേസമയം, അമ്പത് വ‍ര്‍ഷം യുഡിഎഫിന്റെ കൈവശമുണ്ടായിരുന്ന കീഴൂർ സർവീസ് സഹകരണ ബാങ്കിൽ എൽഡിഎഫ് കൊണ്ടുവന്ന അവിശ്വാസപ്രമേയം പാസായി. വൈക്കം അസിസ്റ്റന്റ് രജിസ്ട്രാർ ജോസഫിന്റെ അധ്യക്ഷതയിലാണ് അവിശ്വാസ പ്രമേയം ചർച്ചയ്‍ക്കെടുത്തത്. ചർച്ചയിൽ പ്രസിഡന്റ് ജോജി അലക്സ് നേതൃത്വം നൽകുന്ന പതിമൂന്നംഗ യുഡിഎഫ് ഭരണസമിതിക്കെതിരെ കേരള കോൺഗ്രസ് എമ്മിന്റെയും സിപിഐഎമ്മിന്റെയും ഉൾപ്പെടെ എട്ട് അംഗങ്ങൾ ബാങ്ക് വൈസ് പ്രസിഡന്റ് ജോർജ് കടമ്പൻകുഴി അവതരിപ്പിച്ച അവിശ്വാസത്തെ പിന്തുണയ്ക്കുകയായിരുന്നു. ഇതോടെ തുടർച്ചയായ 50 വർഷക്കാലം ഭരണം നടത്തി വരുന്ന ബാങ്കിൽ നിന്ന് യുഡിഎഫ് പുറത്തായി. ജോസഫ് ഗ്രൂപ്പിന് രണ്ട് അംഗങ്ങളുള്ള ബാങ്കിൽ ഒരാൾ കൂടി കേരള കോൺഗ്രസ് എമ്മിന് ഒപ്പം അവിശ്വാസത്തെ പിന്തുണച്ചു.